ຄະນະຈັດຕັ້ງ ນະຄອນຫຼວງວຽງຈັນ ຈັດກອງປະຊຸມເຜີຍແຜ່ເຊື່ອມຊຶມ ແນະນໍາກ່ຽວກັບການປັບປຸງກົງຈັກການຈັດຕັ້ງ ໃນການໂຮມວຽກງານພະແນກພາຍໃນ ຈໍານວນໜຶ່ງທີ່ຂຶ້ນກັບ ຄະນະຈັດຕັ້ງ ນະຄອນຫຼວງວຽງຈັນ ໃນວັນທີ 31 ກໍລະກົດ 2025 ພາຍໃຕ້ການເປັນຄະນະປະທານຂອງທ່ານ ຊົງເລົ່າ ຢົງນູ່ ຮອງເລຂາຄະນະພັກນະຄອນຫຼວງວຽງຈັນ, ທ່ານ ນາງ ບຸດສະດີ ທະນະເມືອງ, ກໍາມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ໂດຍການເຂົ້າຮ່ວມຂອງທ່ານ ຄໍາມາ ແສງມີໄຊ ກໍາມະການປະຈໍາພັກ, ຫົວໜ້າຄະນະຈັດຕັ້ງ ນະຄອນຫຼວງວຽງຈັນ, ທ່ານ ນາງ ສຸມາລີ ທໍາມະວົງ ກໍາມະການພັກ, ຫົວໜ້າພະແນກພາຍໃນ ນະຄອນຫຼວງວຽງຈັນ, ເລຂາພັກເມືອງ 9 ເມືອງ, ຫ້ອງການພາຍໃນ 9 ເມືອງ ແລະ ພະນັກງານຫຼັກແຫຼ່ງ ເຂົ້າຮ່ວມ.
ໃນທີ່ປະຊຸມທ່ານ ຄໍາມາ ແສງມີໄຊ ໄດ້ຂຶ້ນຜ່ານແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 696/ຄຈສພ, ລົງວັນທີ 26 ມິຖຸນາ 2025 ກ່ຽວກັບການປັບປຸງກົງຈັກການຈັດຕັ້ງ ໃນການໂຮມວຽກພາຍໃນຈໍານວນໜຶ່ງທີ່ຂຶ້ນກັບ ຄະນະຈັດຕັ້ງນະຄອນຫຼວງວຽງຈັນ ແລະ ບຸກຄະລາກອນ ຂອງພະແນກພາຍໃນ; ທິດທາງການປັບປຸງກົງຈັກການຈັດຕັ້ງຢູ່ທ້ອງຖິ່ນ ສະບັບເລກທີ 302/ຄຈສພ, ວັນທີ 04 ກໍລະກົດ 2025 ແລະ ແຈ້ງການ ການປັບປຸງກົງຈັກຕັ້ງໃນການໂຮມວຽກງານພະແນກພາຍໃນ ຈໍານວນໜຶ່ງທີ່ຂຶ້ນກັບ ຄະນະຈັດຕັ້ງນະຄອນຫຼວງວຽງຈັນ ແລະ ຄະນະຈັດຕັ້ງບັນດາແຂວງ; ກົງຈັກການຈັດຕັ້ງຄະນະຈັດຕັ້ງແຂວງ ພາຍຫຼັງໂຮມເຂົ້າກັນ ເອີ້ນວ່າ: “ຄະນະຈັດຕັ້ງແຂວງ” ປະກອບມີ 5 ຂະແໜງ ຄື: u ຂະແໜງຫ້ອງການ, v ຂະແໜງພັກ, w ຂະແໜງຄຸ້ມຄອງພະນັກງານ-ລັດຖະກອນ, x ຂະແໜງກົງຈັກການຈັດຕັ້ງພັກ-ລັດ ແລະ y ຂະແໜງປົກຄອງ; ກົງຈັກການຈັດຕັ້ງຄະນະຈັດຕັ້ງເມືອງ ພາຍຫຼັງໂຮມເຂົ້າກັນ ເອີ້ນວ່າ: “ຄະນະຈັດຕັ້ງເມືອງ” ປະກອບມີ ໜ່ວຍງານ ຄື: u ໜ່ວຍງານຫ້ອງການ, v ໜ່ວຍພັກ, ພະນັກງານ-ລັດຖະກອນ, w ໜ່ວຍງານພັດທະນາການຈັດຕັ້ງພັກ-ລັດ ແລະ x ໜ່ວຍງານປົກຄອງ.
ໂອກາດນີ້, ໃນຕອນທ້າຍປະຊຸມ ຍັງໄດ້ຮັບຟັງການໂອ້ລົມຈາກຄະນະປະທານຈາກສູນກາງ ແລະ ນະຄອນຫຼວງວຽງຈັນ ເພື່ອໃຫ້ທິດຊີ້ນຳ ແລະ ເປັນທິດທາງໃຫ້ແກ່ການຈັດຕັ້ງປະຕິບັດວຽກງານແຕ່ລະຂົງເຂດ ກໍຄືການດໍາເນີນວຽກງານຕ່າງໆໃນຕໍ່ໜ້າ ໃຫ້ມີຜົນສຳເລັດ.
