ຄອບຄົວພົງສະຫວັນ ໄດ້ດໍາເນີນທຸລະກິດມາແຕ່ປີ 1978 ໃນເງື່ອນໄຂສະພາບປະເທດຫາກໍປົດປ່ອຍໃໝ່ ດ້ວຍຄວາມພະຍາຍາມ, ຄວາມອົດທົນ, ຄວາມບຸກບືນ ປັດຈຸບັນທຸລະກິດຂອງຄອບຄົວພົງສະຫວັນ ມີການເຕີບໃຫຍ່ຂະຫຍາຍຕົວກ້າວເປັນບໍລິສັດພົງສະຫວັນແລ້ວ ມີ 30 ຫົວໜ່ວຍທຸລະກິດທີ່ດໍາເນີນກິດຈະການໃນຫລາຍຂະແໜງການທົ່ວປະເທດ ມີພະນັກງານວິຊາການຫລາຍກວ່າ 5.000 ຄົນ. ກຸ່ມບໍລິສັດ ພົງສະຫວັນ ຈໍາກັດ ເປັນບໍລິສັດທີ່ດໍາເນີນທຸລະກິດຄົບວົງຈອນ ສາມາດຕອບໂຈດກັບຄວາມຕ້ອງການດ້ວຍການບໍລິການທາງສັງຄົມທີ່ຫລາກຫລາຍ ມີຫລາຍຂະແໜງການ, ຫົວໜ່ວຍທຸລະກິດ ຊຶ່ງເປັນບໍລິສັດແຖວໜ້າທີ່ມີຮາກຖານໝັ້ນຄົງຢູ່ໃນ ສປປ ລາວ ມີສ່ວນຮ່ວມໃນການຂັບເຄື່ອນເສດຖະກິດ-ສັງຄົມຂອງປະເທດເຮົາ ພ້ອມທັງມີການຂະຫຍາຍຖານທຸລະກິດ ແລະ ເຊື່ອມໂຍງການຄ້າ-ການລົງທຶນທີ່ກວ້າງຂວາງໃນກຸ່ມປະເທດອາຊຽນ ເພື່ອກ້າວສູ່ການເປັນອົງກອນທຸລະກິດຂອງພາກພື້ນໄດ້ຢ່າງເຕັມຮູບແບບ. ປັດຈຸບັນບໍລິສັດມີທັງໝົດ 8 ຂະແໜງການ ຄື: ຂະແໜງການກະສິກໍາ, ການເງິນ-ທະນາຄານ, ພະລັງງານ-ຂົນສົ່ງ, ກໍ່ສ້າງ, ອະສັງຫາລິມະຊັບ, ການຄ້າຂາອອກ-ຂາເຂົ້າ ແລະ ມູນນິທິ ຊຶ່ງແຕ່ລະຂະ ແໜງການມີຈຸດພິເສດໜ້າວຽກທີ່ແຕກຕ່າງກັນ.
ທ່ານ ໄພບູນ ພົງສະຫວັນ ເລຂາຄະນະພັກຮາກຖານ, ຮອງປະທານຄະນະຂາຮຸ້ນກຸ່ມບໍລິສັດ ພົງສະຫວັນ ຈໍາກັດ ໄດ້ກ່າວວ່າ: ຜົນສໍາເລັດໃນການຈັດຕັ້ງປະຕິບັດແຜນພັດທະນາຂອງຂະແໜງການໃນ 5 ປີຜ່ານມາ (2019-2024) ຄື: ຂະແໜງກະສິກໍາຍັງເປັນຂະແໜງການທີ່ຍັງຢູ່ໃນໄລຍະລິເລີ່ມ ຊຶ່ງມີການຂະຫຍາຍຕົວຢູ່ໃນຫລາຍແຂວງ ເຊັ່ນ: ນະຄອນຫລວງວຽງຈັນ, ແຂວງໄຊສົມບູນ, ແຂວງຄໍາມ່ວນ, ແຂວງສະຫວັນນະເຂດ ແລະ ແຂວງອື່ນໆ ຜ່ານມາແມ່ນມີຜົນສໍາເລັດໃນການສ້າງໂຮງເຮືອນປູກທີ່ໄດ້ມາດຕະຖານ, ການວິໄຈເພາະປູກສາຍພັນຜັກ ແລະ ໝາກໄມ້ທີ່ຈະເປັນຜະລິດຕະພັນຄຸນນະພາບຂອງບໍລິສັດ ຊຶ່ງຜັກ ແລະ ໝາກໄມ້ບາງຊະນິດສາມາດສົ່ງອອກຂາຍ ແລະ ກາຍເປັນລາຍໄດ້ຂອງຂະແໜງການດັ່ງກ່າວ; ຂະແໜງການເງິນ-ທະນາຄານ ໄດ້ກາຍເປັນຂະແໜງການທີ່ມີຄວາມສະຖຽນລະພາບ ແລະ ໂດດເດັ່ນໃນເວທີການໃຫ້ບໍລິການທາງດ້ານທຸລະກໍາການເງິນໃນທົ່ວປະເທດ ໂດຍສະເພາະທະນາຄານຄໍາລາວ ໄດ້ເປີດໃຫ້ບໍລິການແລ້ວ ຊຶ່ງໄດ້ຮັບຄວາມສົນໃຈຈາກປະຊາຊົນທັງພາຍໃນ ແລະ ຕ່າງປະເທດ; ອັດຕາການເຂົ້າເຖິງການປະກັນໄພ ຊຶ່ງຄົນລາວທົ່ວໄປກໍສາມາດຮັບຄຸ້ມຄອງທັງສຸຂະພາບ, ເຮືອນຊານ, ອຸທົກກະໄພ, ອັກຄີໄພ ແລະ ການຊື້ປະກັນໄພຂອງປະຊາຊົນ, ບັນດາຫົວໜ່ວຍທຸລະກິດກໍເພີ່ມຂຶ້ນ. ການສະໜອງທາງດ້ານພະລັງງານເຊື້ອໄຟ ແລະ ບໍລິການຂົນສົ່ງ ສາມາດຕອບສະໜອງຄວາມຕ້ອງການຂອງບັນດາຫົວໜ່ວຍທຸລະກິດພາຍໃນ ແລະ ນອກບໍລິສັດໄດ້ແບບຄົບວົງຈອນ; ຂະແໜງການກໍ່ສ້າງ ສາມາດສະໜອງການບໍລິການເປັນທີ່ປຶກສາອອກແບບ ແລະ ກໍ່ສ້າງອາຄານສະຖານທີ່ໃຫ້ລູກຄ້າ ຊຶ່ງໄດ້ຮັບການຍອມຮັບ ແລະ ເປັນທີ່ຕ້ອງການນັບມື້ນັບສູງຂຶ້ນຢູ່ໃນສັງຄົມ; ທຸລະກິດອະສັງຫາລິມະຊັບສາມາດກະຕຸ້ນການລົງທຶນ ຂອງບັນດານັກລົງທຶນຈາກພາຍໃນ ແລະ ຕ່າງປະເທດ; ການຄ້າຂາອອກ-ຂາເຂົ້າ ໃຫ້ບໍລິການສິນຄ້າທີ່ຫລາກຫລາຍສາມາດຕອບສະໜອງນໍາສົ່ງສິນຄ້າເຂົ້າເຖິງສູນຈໍາໜ່າຍສິນຄ້າລາຍຍ່ອຍ, ບັນດາຮ້ານຄ້າຕ່າງໆໃນທົ່ວປະເທດ ແລະ ມູນນິທິພົງສະຫວັນ ສາມາດດໍາເນີນກິດຈະກຳທາງສັງຄົມໂດຍບໍ່ຫວັງຜົນກໍາໄລ ສາມາດຊ່ວຍເຫລືອທາງດ້ານວັດຖຸອຸປະກອນ, ອາຫານ, ປິ່ນປົວສຸຂະພາບ ແລະ ສະໜອງທາງດ້ານການເງິນຊ່ວຍເຫລືອແກ້ໄຂຄວາມທຸກຍາກໃຫ້ປະຊາຊົນ ຢູ່ເຂດຫ່າງໄກສອກຫລີກ.
ແຜນຈຸດສຸມໃນ 5 ປີຕໍ່ໜ້າ (2025-2030) ບໍລິສັດຈະສຸມໃສ່ການພັດທະນາບັນດາຂະແໜງການຕ່າງໆ ຄື: ຂະແໜງກະສິກໍາ: ພະຍາຍາມນໍາໃຊ້ເຄື່ອງມືທີ່ທັນສະໄໝເຂົ້າມາຊ່ວຍ ນັບແຕ່ການກະກຽມ ການເພາະປູກ, ການເບິ່ງແຍງຮັກສາໄປຈົນເຖິງການເກັບກ່ຽວ ໂດຍສະເພາະການນໍາໃຊ້ເຄື່ອງບິນ (ໂດຣນ) ເຂົ້າໃນການຫວ່ານເມັດພືດ, ສີດພົ່ນປຸຍ ແລະ ຢາຂັບໄລ່ສັດຕູພືດ ຊຶ່ງສາມາດຊ່ວຍຫລຸດຜ່ອນຄ່າແຮງງານໄດ້ຫລາຍຂຶ້ນ. ພັດທະນາໃຫ້ມີລະບົບອັດຕະໂນມັດໂຮງເຮືອນ ທີ່ສາມາດຄວບຄຸມອຸນຫະພູມຄວາມຊື້ນ, ການໃຫ້ນໍ້າ, ຝຸ່ນ ແລະ ຄວາມເຂັ້ມຂອງແສງໄດ້ ເພື່ອໃຫ້ເໝາະສົມຕໍ່ການຈະເລີນເຕີບໂຕຂອງພືດພາຍໃນໂຮງເຮືອນ ພ້ອມນັ້ນຕົວໂຮງເຮືອນຍັງຈະເປັນໂຄງສ້າງທີ່ສາມາດຮອງຮັບຕໍ່ການປ່ຽນແປງຂອງສະພາບດິນຟ້າອາກາດຕ່າງໆ ແລະ ບັນດາສັດຕູພືດນ້ອຍ-ໃຫຍ່ຈາກພາຍນອກໄດ້. ພັດທະນາໃຫ້ມີໂຮງງານຜະລິດພືດໃຫ້ສາມາດປູກພືດພາຍໃນຕຶກອາຄານ ແລະ ສາມາດຜະລິດພືດໄດ້ຕະຫລອດປີ ໂດຍບໍ່ຈໍາເປັນຕ້ອງອາໄສລະດູການເໝືອນກັບທີ່ປູກກາງແຈ້ງ ໂດຍການນໍາໃຊ້ເຕັກໂນໂລຊີ ເອໄອ (AI) ເຂົ້າໃນກວດສອບສາຍພັນ, ລະດັບການໃຫ້ນໍ້າ, ການວັດລະດັບແສງ ແລະ ລະດັບອຸນຫະພູມ; ນໍາໃຊ້ລະບົບດາວທຽມ, ລະບົບເຊັນເຊີ, ອຸປະກອນທີ່ທັນສະໄໝອື່ນໆ ເພື່ອເປັນຕົວຊ່ວຍໃນການປະເມີນ, ຕັດສິນໃຈຢ່າງຖືກຕ້ອງ ແລະ ມີປະສິດຕິພາບໃນຂົງເຂດວຽກງານກະສິກໍາ ໂດຍສະພາະເນັ້ນໃຫ້ມີການຫລຸດຜ່ອນການນໍາໃຊ້ບຸກຄະລາກອນທີ່ເກີນຄວາມຈໍາເປັນ ແຕ່ຈະເນັ້ນການເຝິກອົບຮົບ-ບຳລຸງສ້າງບຸກຄະລາກອນທີ່ຈຳເປັນໃຫ້ເຂົາເຈົ້າມີຄວາມຮູ້, ຄວາມສາມາດ ແລະ ທັກສະຮອບດ້ານ.
ຂະແໜງການເງິນ: ທາງທະນາຄານຈະເນັ້ນໃສ່ການສະໜອງເງິນທຶນໃຫ້ແກ່ຜູ້ທີ່ຕ້ອງການເງິນທຶນໃນທຸກລະດັບ ບໍ່ວ່າຈະເປັນປະຊາຊົນທົ່ວໄປ, ພະນັກງານລັດ-ເອກະຊົນ, ບັນດາຫົວໜ່ວຍທຸລະກິດຂະ ໜາດນ້ອຍ, ຂະໜາດກາງ ແລະ ຂະໜາດໃຫຍ່; ສູ້ຊົນລະດົມເງິນຝາກ ແລະ ໃຫ້ບໍລິການທາງດ້ານການຂາຍບັດ Credit Card ໃຫ້ເປັນອັນດັບ 1 ຂອງປະເທດ ເພີ່ມຮູບແບບການຄຸ້ມຄອງທຸລະກິດໃຫ້ເຂັ້ມແຂງທີ່ສຸດ ໂດຍສະເພາະການບໍລິການຄຸ້ມຄອງເງິນໃນໄລຍະຍາວ. ຍົກລະດັບການບໍລິການ ການເຂົ້າຫາລູກຄ້າແລະ ເປັນທີ່ປຶກສາດ້ານຕ່າງໆ ເພື່ອຫາວິທີທາງແກ້ໄຂຊ່ວຍເຫລືອລູກຄ້າ ນຳເອົາຖານຂໍ້ມູນທັງໝົດເຂົ້າລະບົບ Cloud ນຳເອົາເຕັກໂນໂລຊີລະດັບສາກົນເຂົ້າມານຳໃຊ້ໃນການບໍລິການ E-Banking (Internet Banking ແລະ Mobile Banking) ນໍາໃຊ້ລະບົບເອໄອ (AI) ໃນການບໍລິການວິເຄາະທຸລະກິດ, ວິເຄາະຖານລູກຄ້າ ແລະ ອື່ນໆ. ສ້າງສະຖຽນລະພາບ, ຄວາມເຂັ້ມແຂງທາງດ້ານການເງິນໃຫ້ປະເທດ ໂດຍສະເພາະໃນໄລຍະວິກິດເສດຖະກິດ ແລະ ທີ່ສໍາຄັນອາດຈະຊ່ວຍຫລຸດຜ່ອນຄວາມບໍ່ສະເໝີພາບທາງດ້ານການເງິນ ຂອງປະຊາຊົນລາວບັນດາເຜົ່າ; ສະເໜີໃຫ້ເນັ້ນໃສ່ການຫັນລະບົບການເຮັດວຽກຕ່າງໆເຂົ້າເປັນລະບົບດິຈິຕອນ ແລະ ນໍາໃຊ້ລະບົບປັນຍາປະດິດ ຫລື ເອໄອ (AI) ເນັ້ນໃສ່ຄວາມຍືນຍົງ ໂດຍການໃຫ້ທຶນແກ່ໂຄງການສີຂຽວປະສົມປະສານເງື່ອນໄຂ ແລະ ປັດໄຈດ້ານສິ່ງແວດລ້ອມ ສັງຄົມ ແລະ ການປົກຄອງເຂົ້າໃນຍຸດທະສາດທຸລະກິດຂະຫຍາຍບໍລິການລູກຄ້າຜ່ານລະບົບທັນສະໄໝໃຫ້ບໍລິການບັນຊີເງິນຝາກ ແລະ ເງິນກູ້ແບບດິຈິຕອນ; ນໍາໃຊ້ການຖາມ-ຕອບດ້ວຍລະບົບເອໄອ (AI) ແລະ ລະບົບປ້ອງກັນການໂຈລະກໍາຂໍ້ມູນທີ່ທັນສະໄໝ.
ທະນະຄານຄໍາລາວ: ສຸມໃສ່ສະໜອງການບໍລິການລະດັບສາກົນທາງດ້ານການເງິນ-ທະນາຄານທີ່ຕິດພັນກັບວັດຖຸຄໍາ ພ້ອມຍົກລະດັບຄຸນນະພາບໃຫ້ໄດ້ຕາມມາດຕະຖານສາກົນ LBMA ແລະ ຄ້ຳປະກັນໃຫ້ສະກຸນເງິນກີບແຂງຄ່າຂຶ້ນເປັນທີ່ຍອມຮັບຈາກສະກຸນເງິນ non-convertible ກາຍເປັນ convertible currency ທີ່ສາມາດແລກປ່ຽນໄດ້ໃນຕະຫລາດສາກົນ.
ຂະແໜງປະກັນໄພ: ສຸມໃສ່ເພີ່ມຜະລິດຕະພັນໃຫ້ມີຄວາມຫລາກຫລາຍ ແລະ ຄວບຄຸມຮອບດ້ານໃຫ້ລູກຄ້າ ແນ່ໃສ່ຄົ້ນຫາຜະລິດຕະພັນ ຫລື ສິດທິພິເສດ ເພື່ອມາຮອງຮັບຄວາມຕ້ອງການຂອງປະຊາຊົນ ມີປະກັນດ້ານຊັບສິນ (ຕຶກ, ອາຄານ), ປະກັນສຸຂະພາບໂລກໄພໄຂ້ເຈັບທີ່ຮ້າຍແຮງ ເພື່ອກ້າວເປັນບໍລິສັດທີ່ໃຫ້ບໍລິການດ້ານປະກັນໄພທີ່ຄົບວົງຈອນ ໂດຍລວມເນັ້ນໃສ່ການຫັນເປັນດິຈິຕອນ ຕິດພັນກັບລູກຄ້າດ້ວຍການນໍາໃຊ້ໂມບາຍແອັບທີ່ເປັນມິດກັບຜູ້ໃຊ້ ແລະ ຜະລິດຕະພັນປະກັນໄພທີ່ເໝາະກັບແຕ່ລະກຸ່ມລູກຄ້າ ນໍາໃຊ້ລະບົບ ເອໄອ (AI) ແລະ ວິເຄາະຂໍ້ມູນ ໃຊ້ລະບົບ Telematics ແລະ ວິເຄາະຂໍ້ມູນ ເພື່ອໃຫ້ນະໂຍບາຍປະກັນໄພແບບອັດຕະໂນມັດ ແລະ ການກໍານົດລາຄາທີ່ສາມາດແຂ່ງຂັນໄດ້ ເພີ່ມປະສົບການດ້ານການປະກັນໄພໃຫ້ລູກຄ້າ ແລະ ສ້າງທາງເລືອກປະກັນໄພໃໝ່ໆ.
ຂະແໜງພະລັງງານ ແລະ ຂົນສົ່ງ: ຂະແໜງພະລັງງານໃນປັດຈຸບັນສາມາດໃຫ້ບໍລິການນໍ້າມັນທີ່ມີຄຸນນະພາບໃນທົ່ວປະເທດ ຊຶ່ງມີຫລາຍກວ່າ 40 ສະຖານີບໍລິການນໍ້າມັນ ໂດຍສະເພາະໃນຊົນນະບົດເຂດຫ່າງໄກ ສະຖານີບໍລິການນໍ້າມັນແມ່ນໄດ້ຮັບການພັດທະນາມາເລື້ອຍໆ ນັບຕັ້ງແຕ່ກໍ່ຕັ້ງຈົນຮອດປັດຈຸບັນ ແລະ ໃນ 5 ປີຕໍ່ໜ້າຈະສຸມໃສ່ການລົງທຶນໃສ່ໃນພະລັງງານທາງເລືອກທີ່ຫລາກຫລາຍ ໂດຍສະເພາະພະລັງງານສະອາດ ປ່ຽນຜ່ານດ້ານພະລັງງານດ້ວຍການລົງທຶນໃສ່ໃນພະລັງງານທົດແທນ ພ້ອມທັງຮັກສາ ແລະ ພັດທະນາສະຖານີນໍ້າມັນໃຫ້ທັນສະໄໝໃນແຕ່ລະໄລຍະ ພ້ອມທັງເພີ່ມປະສິດທິພາບການດໍາເນີນງານຕ່າງໆ; ສະເພາະວຽກງານຂົນສົ່ງ: ຈະສຸມໃສ່ການຫັນລະບົບເຮັດວຽກເຂົ້າສູ່ລະບົບດິຈິຕອນຫັນເປັນລະບົບສາງອັດສະລິຍະ, ການວິເຄາະຂໍ້ມູນທີ່ລໍ້າໜ້າ, ລົດຂົນສົ່ງແບບອັດຕະໂນມັດ, ລະບົບຕິດຕາມທີ່ທັນສະໄໝ, ນໍາໃຊ້ພາຫະນະຂົນສົ່ງໄຟຟ້າ ປະສົມປະສານການຂົນສົ່ງ, ການຈັດສົ່ງ ແລະ ທາງເລືອກແບບດິຈິຕອນ ເພື່ອໃຫ້ບໍລິການຄຸ້ມຄອງລະບົບຕ໋ອງໂສ້ ການສະໜອງແບບຄົບວົງຈອນ ເວົ້າລວມ, ເວົ້າສະເພາະຈະເພີ່ມການຮ່ວມມືກັບຫວຽດນາມໃນການພັດທະນາໃຫ້ມີທ່າເຮືອຂະໜາດໃຫຍ່ຂຶ້ນ ເພື່ອຮອງຮັບສິນຄ້າໄດ້ຫລາຍຂຶ້ນ ນໍາໃຊ້ລະບົບເອໄອ (AI) ເຂົ້າມາຊ່ວຍບໍລິຫານຈັດການເລື່ອງລະບົບເອກະສານໃນການຂົນສົ່ງສິນຄ້າຂາອອກ ແລະ ຂາເຂົ້າ ລວມໄປເຖິງນໍາໃຊ້ເຂົ້າໃນການຊ່ວຍວິເຄາະສະພາບດິນຟ້າອາກາດທີ່ມີຄວາມຊັດເຈນ ພ້ອມທັງສາມາດຊ່ວຍບໍລິຫານຈັດການເລື່ອງລະບົບຄວາມປອດໄພຂອງສິນຄ້າ ທັງກ່ອນການຂົນສົ່ງ ແລະ ລະຫວ່າງການຂົນສົ່ງ.
ຂະແໜງການກໍ່ສ້າງ: ຍົກສູງບົດບາດຂອງບໍລິສັດໃຫ້ເປັນທີ່ຮູ້ຈັກໃນທົ່ວສັງຄົມ ພັດທະນາທຸລະກິດ ແລະ ຂະຫຍາຍໜ້າວຽກ ເປັນຕົ້ນ: ສ້າງເສັ້ນທາງ, ຂົວທາງ, ສະໜາມບິນ, ສະໜາມກິລາ, ສະມາສຟາມ, ເຂື່ອນໄຟຟ້າ, ອາຄານຂະໜາດໃຫຍ່ ຫລື ການກໍ່ສ້າງທີ່ມີຂະໜາດໃຫຍ່; ສົ່ງເສີມໃຫ້ພະນັກງານວິຊາການມີຄວາມເຂັ້ມແຂງດ້ານວິຊາສະເພາະຂອງຕົນ ໂດຍສະເພາະເລື່ອງເຕັກນິກການກໍ່ສ້າງ ພ້ອມທັງເພີ່ມທະວີການພົວພັນກັບຕ່າງປະເທດ ເພື່ອພັດທະນາໃຫ້ກາຍເປັນບໍລິສັດກໍ່ສ້າງສາກົນ ຊຶ່ງເນັ້ນໃສ່ການຄຸ້ມຄອງໂຄງການໃຫ້ມີປະສິດທິພາບສູງສຸດ ໂດຍນໍາໃຊ້ເຕັກໂນໂລຊີສະໄໝໃໝ່ເຂົ້າໃນວຽກກໍ່ສ້າງ, ຄຸ້ມຄອງຄວາມສ່ຽງ, ເນັ້ນໃສ່ຄວາມຍືນຍົງ ແລະ ການກໍ່ສ້າງສີຂຽວທີ່ສາມາດຫລຸດຜ່ອນຜົນກະທົບທາງສິ່ງແວດລ້ອມ ດໍາເນີນໂຄງການກໍ່ສ້າງເນັ້ນໃສ່ເອົາລູກຄ້າເປັນຈຸດໃຈກາງ ໂດຍມີເປົ້າໝາຍນໍາໃຊ້ເຕັກໂນໂລຊີແບບອັດສະລິຍະເຂົ້າຊ່ວຍໃນວຽກງານດັ່ງກ່າວ.
ຂະແໜງອະສັງຫາລິມະຊັບ: ສືບຕໍ່ໃຫ້ບໍລິການຈັດຫາທີ່ດິນ, ໃຫ້ເຊົ່າອາຄານ, ໂຄສະນາການຊືື້-ຂາຍກໍາມະສິດທີ່ດິນ, ພັດທະນາເນື້ອທີ່ດິນ, ກໍ່ສ້າງຫ້ອງພັກ, ເຮືອນຈັດສັນ, ຄອນໂດມີນຽມ ແລະ ດິິນຈັດສັນ; ສະເໜີໃຫ້ຍົກລະດັບມາດຕະຖານ ແລະ ປະກອບທຶນຮອນໃຫ້ຫລາຍຂຶ້ນ ຊຶ່ງເປັນການຍູ້ແຮງໃຫ້ຫລາຍວຽກຂອງໂຄງການສໍາເລັດຕາມຄາດໝາຍ ນອກຈາກນີ້ຍັງເນັ້ນໃສ່ການນໍາໃຊ້ເຕັກໂນໂລຊີ ເພື່ອການວິເຄາະ, ຄາດຄະເນຄວາມອາດສາມາດທ່າອ່ຽງໃນອະນາຄົດ ແລະ ເປັນຂໍ້ມູນພື້ນຖານໃຫ້ການບໍລິການດ້ານອະ ສັງຫາລິມະຊັບ ເພື່ອເພີ່ມທາງເລືອກທີ່ເປັນປະໂຫຍດສູງສຸດໃຫ້ລູກຄ້າ ເນັ້ນສ້າງຄວາມຍືນຍົງ ໂດຍນໍາໃຊ້ນະວັດຕະກໍາຕ່າງໆເຂົ້າໃນການບໍລິການໃຫ້ຄໍາປຶກສາແບບມີຍຸດທະສາດ, ຊ່ວຍແກ້ໄຂ, ຄຸ້ມຄອງຊັບສິນໃຫ້ເກີດປະສິດທິພາບສູງສຸດ ແລະ ເນັ້ນເອົາລູກຄ້າເປັນໃຈກາງ.
ຂະແໜງການຄ້າຂາອອກ-ຂາເຂົ້າ: ເນັ້ນໃສ່ຮັບປະກັນປະສິດທິພາບການເຮັດວຽກ, ການຄຸ້ມຄອງ ແລະ ປະເມີນຄວາມສ່ຽງ ລົງທຶນໃສ່ໃນການເຮັດທຸລະກິດແບບຍືນຍົງ ນໍາໃຊ້ເຕັກໂນໂລຊີທັນສະໄໝ ສ້າງຄວາມເຂັ້ມແຂງໃນການຄົ້ນຄວ້າຕະຫລາດ, ເຕັກໂນໂລຊີ ເພື່ອໃຫ້ສາມາດຢູ່ລອດໃນຕະຫລາດທີ່ມີການແຂ່ງຂັນສູງດ້ວຍການສ້າງຄວາມຫລາກຫລາຍດ້ານຜະລິດຕະພັນ ໂດຍອີງຕາມທີ່ຕັ້ງພູມສັນຖານໃນແຕ່ລະເຂດ ເພີ່ມທາງເລືອກສິນຄ້າກະສິກໍາໃຫ້ຫລາກຫລາຍ ແລະ ຄຸ້ມຄອງຕ໋ອງໂສ້ການສະໜອງໃຫ້ເຂັ້ມແຂງ.
ອົງການມູນນິທິພົງສະຫວັນ: ເພີ່ມການປະສານສົມທົບກັບໜ່ວຍງານທາງພາກລັດ, ອົງການຈັດຕັ້ງສາກົນໃຫ້ເຂົ້າມາຊ່ວຍເຫລືອເພີ່ມ ໂດຍເນັ້ນໃສ່ບັນຫາສຸຂະພາບ ແລະ ການພັດທະນາການຮ່ວມມືນໍາໃຊ້ເຄືອຂ່າຍອາສາສະໝັກ, ເພື່ອນຮ່ວມງານ ປະສົມປະສານວຽກກັບແຜນຕອບໂຕ້ ແລະ ຫລຸດຜ່ອນໄພພິບັດ ຕອບສະໜອງກັບຄວາມຕ້ອງການອັນຮີບດ່ວນໃນໄລຍະເກີດວິກິດການຕ່າງໆ. ນໍາໃຊ້ເຕັກໂນໂລຊີທັນສະ ໄໝ ເພື່ອລະດົມທຶນ ແລະ ຮັບປະກັນຄວາມໂປ່ງໃສ ລວມທັງເຄື່ອງມືການລາຍງານແບບດິຈິຕອນ ເພື່ອດຶງດູດເອົາຜູ້ໃຫ້ທຶນເພີ່ມ ນອກນັ້ນບັນຫາສະຫວັດດີການຂອງເດັກກໍເປັນອີກບັນຫາໜຶ່ງໃນລະດັບສາກົນ ຊຶ່ງຈະເນັ້ນໃສ່ການນໍາໃຊ້ວິທີການຊ່ວຍເຫລືອ ແລະ ນໍາໃຊ້ຂໍ້ມູນຫລັກຖານໃນການແກ້ໄຂບັນຫາຕ່າງໆທີ່ສົ່ງຜົນຕໍ່ເດັກ.
ການຈັດຕັ້ງປະຕິບັດໂຄງການ (ໂຄງການລົງທຶນຂອງລັດ, ໂຄງການຮ່ວມ, ໂຄງການລົງທຶນຂອງເອກະຊົນ): ໂຄງການກອງທຶນສາມັກຄີ ແລະ ພັດທະນາແນວລາວສ້າງຊາດ, ໂຄງການປັບປຸງລະບົບຊົນລະປະທານ, ໂຄງການນາໄຮ່ໃຫຍ່, ໂຄງການທົດລອງສາທິດຝຸ່ນກາຫົວຄວາຍ, ໂຄງການຕ້ານແລ້ງ-ຕ້ານຖ້ວມ, ໂຄງການສິນເຊື່ອສົ່ງເສີມການຜະລິດກະສິກໍາ-ອຸດສາຫະກໍາ, ໂຄງການກອງທຶນສົ່ງເສີມການຜະລິດຂະໜາດນ້ອຍ, ໂຄງການເຊີງກະສິກໍາ ເປັນຕົ້ນ: ການປູກມັນ, ໝາກກ້ວຍ, ໝາກເຜັດ ແລະ ໝາກໄມ້ຊະນິດອື່ນໆ, ໂຄງການສ້າງຕັ້ງໂຮງງານແປຮູບໝາກໄມ້ອົບແຫ້ງ ທີ່ຮ່ວມມືພັດທະນາກັບປະເທດໄທ ສ້າງຕັ້ງໂຮງງານຢູ່ລາວ ໂດຍນໍາເອົາບັນດາຜົນຜະລິດຂອງໂຄງການກະສິກໍາເຂົ້າມາແປຮູບ, ນອກຈາກນີ້ກຸ່ມຈະໄດ້ປະກອບສ່ວນໃນຂະແໜງອຸດສາຫະກໍາເບົາ ແລະ ທ່ອງທ່ຽວ ໂດຍສືບຕໍ່ຂັບເຄື່ອນໂຄງການໃນຮູບແບບການບໍລິການ ແລະ ການທ່ອງທ່ຽວທີ່ພວມກໍ່ສ້າງ ມີ: ໂຮງແຮມຊໍາເໜືອ, ໂຮງແຮມວຽງໄຊ Smart city ທ່າແຂກ, ພຣາຊາ ແລະ ອື່ນໆ.
