(ຮູບພາບ: ເປັນພຽງພາບປະກອບ)
ຜ່ານການຈັດຕັ້ງປະຕິບັດມະຕິກອງປະຊຸມໃຫຍ່ແຕ່ລະຄັ້ງ ຂອງພັກໃນໄລຍະທີ່ຜ່ານມາໄປພ້ອມໆກັບວຽກງານ ອື່ນໆ. ວຽກງານກໍ່ສ້າງພັກ-ພະນັກງານຢູ່ໃນແຕ່ລະຂັ້ນ, ແຕ່ລະຂົງເຂດ, ແຕ່ລະຂະແໜງການ ລ້ວນແຕ່ໄດ້ຮັບການປັັບປຸງ ແລະ ຈັດຕັ້ງປະຕິບັດຢ່າງຕໍ່ເນື່ອງ ເຮັດໃຫ້ປະຊາທິປະໄຕພາຍໃນພັກ ໄດ້ຮັບການເສີມຂະຫຍາຍຢ່າງແຂງແຮງ, ບັນດາຈຸດອ່ອນ, ຂໍ້ຄົງຄ້າງ ທີ່ເປັນໄພອັນຕະລາຍຕໍ່ບົດບາດການນໍາພາຂອງພັກ ໄດ້ຮັບການຄົ້ນຄວ້າວິເຄາະໄຈ້ແຍກ ແລະ ແກ້ໄຂຢ່າງກວ້າງຂວາງ, ສ້າງຄວາມຮັບຮູ້ເປັນເອກະພາບພາຍໃນຄະນະພັກແຕ່ລະຂັ້ນ ແລະ ຢູ່ໃນທົ່ວສັງຄົມຖືກຕາມຄວາມເປັນຈິງ, ການເຄົາລົບ ແລະ ປະຕິບັດບັນດາຫລັກການຈັດຕັ້ງເຄື່ອນໄຫວຂອງພັກມີການຫັນປ່ຽນຢ່າງຕັ້ງໜ້າ,ອັນໄດ້ຈໍາກັດ ແລະ ຕີຖອຍບັນດາປະກົດການຫຍໍ້ທໍ້ໃນຖັນແຖວພະນັກງານ, ສະມາຊິກພັກ; ການບໍາລຸງສ້າງ, ການເລືອກເຟັ້ນ ແລະ ຈັດວາງພະນັກງານຢ່າງເປັນລະບົບໄດ້ຮັບການຈັດຕັ້ງປະຕິບັດເປັນຮູບປະທໍາຫລາຍຂຶ້ນ; ກໍາລັງຄວາມສາມາດນໍາພາ ແລະ ບົດບາດເປັນແກນນໍາ ຂອງອົງຄະນະພັກແຕ່ລະຂັ້ນ ໄດ້ຮັບການຮັກສາ ແລະ ເສີມຂະຫຍາຍ, ຄວາມເປັນແບບຢ່າງນໍາໜ້າຂອງສະມາຊິກພັກໄດ້ຮັບການປັບປຸງຢ່າງຕໍ່ເນື່ອງ.
ມະຕິກອງປະຊຸມໃຫຍ່ ຄັ້ງທີ XI ຂອງພັກ ໄດ້ວາງທິດທາງ, ໜ້າທີ່ກ່ຽວກັບວຽກງານຈັດຕັ້ງພັກ-ພະນັກງານ, ສໍາລັັບຊຸມປີ 2021-2025 ແນໃສ່ຍົກສູງຄວາມຮັບຜິດຊອບ, ຄວາມສາມາດນໍາພາຂອງພັກ, ຂອງອົງຄະນະພັກແຕ່ລະຂັ້ນ ແລະ ຄວາມເປັນແບບຢ່າງນໍາໜ້າຂອງສະມາຊິກພັກ, ເດັດດ່ຽວແກ້ໄຂຈຸດອ່ອນ, ຂໍ້ຄົງຄ້າງ, ຮັກສາບົດບາດເປັນແກນນໍາໃນລະບົບການເມືອງຢ່າງໜັກແໜ້ນ ໂດຍສຸມໃສ່ເພື່ອສູ້ຊົນໃຫ້ບັນລຸບັນດາຄາດໝາຍແຕ່ລະດ້ານ.
ບົນພື້ນຖານຢຶດໝັ້ນແນວທາງປ່ຽນແປງໃໝ່ຢ່າງຮອບດ້ານ ແລະ ມີຫລັກການຂອງພັກ ກ່ອນອື່ນໝົດແມ່ນການປ່ຽນແປງໃໝ່ດ້ານຈິນຕະນາການ ຕິດພັັນກັບການຍົກສູງຄຸນນະພາບ ແລະ ປະສິດທິຜົນໃນການເຄື່ອນໄຫວວຽກງານການເມືອງ-ແນວຄິດ; ສືບຕໍ່ຄົ້ນຄວ້າວິທີເຊື່ອມຊຶມ, ຜັນຂະຫຍາຍແນວທາງ, ມະຕິຂອງພັກແຕ່ລະໄລຍະ; ເພີ່ມທະວີວຽກງານໂຄສະນາສຶກສາອົບຮົມທົ່ວອົງຄະນະພັກໃນໄລຍະໃໝ່, ຢຶດໝັ້ນທິດສະດີມາກ-ເລນິນ, ແນວຄິດ ໄກສອນ ພົມວິຫານ, ແນວທາງຂອງພັກຢ່າງສະເໝີຕົ້ນສະເໝີປາຍ, ຍົກສູງຫລັກໝັ້ນການເມືອງ, ຄຸນສົມບັດສິນທໍາປະຕິວັດ, ສະຕິປັນຍາ, ລັກສະະນະຕໍ່ສູ້ຂອງທົ່ວອົງຄະນະພັກ ແລະ ສະມາຊິກພັກ; ຢຶດໝັ້ນຈຸດໝາຍສັງຄົມນິຍົມ, ຮັກສາທາດແທ້ຂອງຊົນຊັ້ນກໍາມະກອນ, ບົດບາດກອງນໍາໜ້າ, ຄວາມເປັນແບບຢ່າງຂອງພະນັກງານ-ສະມາຊິກພັກ, ຍົກສູງຄວາມຮັບຜິດຊອບ ແລະ ຄວາມສາມາດນໍາພາ, ສ້າງໃຫ້ມີການຫັນປ່ຽນຢ່າງແຂງແຮງໃນການຈັດຕັ້ງປະຕິບັດໜ້າທີ່ການເມືອງຂອງພັກ ໃຫ້ກາຍເປັນຮູບປະທໍາ, ປະຕິບັດຫລັກການໃນວຽກງານກໍ່ສ້າງພັກຢ່າງເຂັ້ມງວດ, ດໍາເນີນການຕິຊົມຊຶ່ງກັນ ແລະ ກັນພາຍໃນພັກ, ເສີມຂະຫຍາຍແບບແຜນດໍາລົງຊີວິດທີ່ດີ, ຕ້ານປະກົດ“ການຫັນປ່ຽນຄຸນທາດໂຕເອງ”, ເດັດດ່ຽວແກ້ໄຂທຸກປະກົດການລ່ວງລະເມີດກົດລະບຽບຂອງພັກ, ກໍາແໜ້ນສະພາບ ແລະ ຫາງສຽງສັງຄົມ, ເປັນເຈົ້າການຕອບຕ້ານຖ້ອຍທໍານອງໃສ່ຮ້າຍປ້າຍສີຂອງພວກຄົນບໍ່ດີ, ປະຕິບັດກົນໄກ ສົ່ງເສີມໃຫ້ປະຊາຊົນ ໄດ້ເຂົ້າຮ່ວມກໍ່ສ້າງພັກ, ກໍ່ສ້າງອົງການປົກຄອງຢ່າງກວ້າງຂວາງ; ຍົກລະດັບຄວາມຮູ້, ຄວາມສາມາດຂອງສະມາຊິກພັກ, ພະນັກງານຢ່າງທົ່ວເຖິງ, ມີຄວາມເສຍສະຫລະ, ຄວາມອົດທົນ, ຜ່ານຜ່າຄວາມຫຍຸ້ງຍາກ, ຕື່ນຕົວປະຕິບັດມະຕິຕ່າງໆ ແລະ ບໍ່ເລືອກວຽກ ເລືອກງານທີ່ພັກມອບໝາຍ.
ເຂົ້າໃຈ ແລະ ປະຕິບັດຢ່າງຖືກຕ້ອງ ເປັນເອກະພາບທັດສະນະຂອງພັກ ກ່ຽວກັບວຽກງານຈັດຕັ້ງພັກ-ພະນັກງານຕາມທິດກະທັດຮັດ, ມີປະສິດທິຜົນ ແລະ ຍົກສູງຄວາມສາມາດຂອງອົງການເສນາທິການ ວຽກງານຈັດຕັ້ງ-ພະນັກງານ; ສືບຕໍ່ປັບປຸງແຜນກໍານົດພະນັກງານນໍາພາ-ຄຸ້ມຄອງແຕ່ລະຂັ້ນ ໃຫ້ສອດຄ່ອງກັບຄວາມຮຽກຮ້ອງຂອງໜ້າທີ່ການເມືອງ, ຮັບປະກັນລັກສະນະສືບທອດປ່ຽນແທນ; ເພີ່ມທະວີການກວດກາ, ຕິດຕາມ, ທາບທາມຫາງສຽງ ແລະ ປະເມີນຜົນການປະຕິບັດໜ້າທີ່ຂອງພະນັກງານຢ່າງເຄັ່ງຄັດ, ເສີມຂະຫຍາຍປະຊາທິປະໄຕ ແລະ ຄວາມເປັນເຈົ້າຂອງພະນັກງານ, ຄວາມຮັບຜິດຊອບລວມຂອງໝູ່ຄະນະ ແລະ ບຸກຄົນໃນຄະນະພັກ ເພື່ອເປັນບ່ອນອີງໃຫ້ແກ່ການວາງແຜນກໍານົດ, ສັບຊ້ອນ, ນໍາໃຊ້ ແລະ ປະຕິບັດນະໂຍບາຍຕໍໍ່ພະນັກງານຢ່າງຖືກຕ້ອງ, ເພີ່ມທະວີຄວາມຮັບຜິດຊອບຂອງຄະນະພັກທຸກຂັ້ນຕໍ່ວຽກງານປ້ອງກັນພັກ, ປ້ອງກັນພາຍໃນ, ເດັດດ່ຽວຕໍ່ສູ້ກັບແນວຄິດທ້ອງຖິ່ນ, ພັກພວກ, ຈຸ້ມເຈື້ອ, ຄົນເຈົ້າ-ຄົນຂ້ອຍ.
ຍົກສູງຄວາມສາມາດ ແລະ ປະສິດທິຜົນວຽກງານກວດກາ, ຕິດຕາມການປະຕິບັດກົດລະບຽບຂອງພັກ, ກົດໝາຍຂອງລັດ, ຊອກໃຫ້ເຫັນ ແລະ ເສີມຂະຫຍາຍຕົວແບບດີເດັ່ນ ຕ້ອງແກ້ໄຂຢ່າງເດັດຂາດ ແລະ ທັນການຕໍ່ການຈັດຕັ້ງພັກ, ສະມາຊິກພັກ ທີ່ລະເມີດກົດລະບຽບຂອງພັກ, ກົດໝາຍຂອງລັດ; ເພີ່ມທະວີການປ້ອງກັນ ແລະ ຕ້ານການສໍ້ລາດບັງຫລວງ, ການຟຸມເຟືອຍ ໂດຍສະເພາະແມ່ນການຄຸ້ມຄອງ ແລະ ນໍາໃຊ້ທີ່ດິນ, ລາຍຮັບ-ລາຍຈ່າຍງົບປະມານ, ການຈັດຊື້-ຈັດຈ້າງ, ການປະຕິບັດໂຄງການລົງທຶນຂອງລັດ, ວຽກງານພະນັກງານ, ການຄຸ້ມຄອງທຸລະກິດ ແລະ ຕັດສິນໃຈແກ້ໄຂພະນັກງານຜູ້ມີພຶດຕິກໍາສໍ້ລາດບັງຫລວງ, ຟຸມເຟືອຍໃຫ້ຖືກຕ້ອງທັນເວລາ.
ຍົກສູງຄຸນນະພາບ ແລະ ປະສິດທິຜົນດ້ານແບບແຜນນໍາພາ ແລະ ວິທີເຮັດວຽກຂອງອົງຄະນະພັກ, ຄະນະພັກແຕ່ລະຂັ້ນ, ການຈັດຕັ້ງຮາກຖານພັກ ແລະ ສະມາຊິກພັກໂດຍສ້າງໃຫ້ມີການຫັນປ່ຽນຢ່າງຈະແຈ້ງກ່ຽວກັບຄຸນນະພາບ
ການເຄື່ອນໄຫວນໍາພາຂອງການຈັດຕັ້ງພັກ ໂດຍສຸມໃສ່ການຈັດຕັ້ງພັກທີ່ອ່ອນແອ, ການຈັດຕັ້ງພັກຢູ່ຫົວໜ່ວຍການຜະລິດ-ທຸລະກິດ, ເສີມຂະຫຍາຍບົດບາດເປັນແກນນໍາໃນລະບົບການເມືອງຢູ່ຮາກຖານ; ເພີ່ມທະວີການປະສານສົມທົບລະຫວ່າງການນໍາພາຂອງພັກ ກັບການບໍລິຫານຂອງລັດ ແລະ ການບໍລິການຮັບໃຊ້ປະຊາຊົນ ອີງໃສ່ມະຫາຊົນຢູ່ພື້ນທີ່ເພື່ອກໍ່ສ້າງພັກ, ຍູ້ແຮງການກໍ່ສ້າງ ແລະ ການເຄື່ອນໄຫວຂອງການຈັດຕັ້ງພັກ, ອົງການຈັດຕັ້ງການເມືອງຢູ່ໃນຫົວໜ່ວຍທຸລະກິດເອກະຊົນ, ຍົກສູງຄຸນນະພາບໃນການດໍາເນີນຊີວິດຂອງໜ່ວຍພັກ, ຄະນະພັກ, ຄະນະປະຈໍາພັກ, ຊຸກຍູ້ການຕິຊົມຕົນເອງ, ການຕິຊົມກັນ ແລະ ກັນຢ່າງຖືກຕ້ອງ, ກໍ່ສ້າງການຈັດຕັ້ງພັກ ແລະ ຖັນແຖວສະມາຊິກພັກ ປອດໃສ, ເຂັ້ມແຂງ, ໜັກແໜ້ນ, ເດັດດ່ຽວເອົາຜູ້ທີ່ເສຍທາດຂາດຄຸນອອກຈາກພັກ, ຍູ້ແຮງ ແລະ ຖືເປັນສໍາຄັນວຽກງານກໍ່່ສ້າງ, ຂະຫຍາຍສະມາຊິກພັກ ທີ່ມີຕົ້ນກໍາເນີດມາຈາກກໍາມະກອນ, ຊາວຜູ້ອອກແຮງງານ, ປັນຍາຊົນ ແລະ ຊາວໜຸ່ມ.