ດໍາເນີນຊີວິດການເມືອງ ຄະນະພັກຮາກຖານພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ

ພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ໄດ້ດໍາເນີນຊີວິດການເມືອງຂອງຕົ້ນຂຶ້ນໃນວັນທີ 12 ສິງຫາ 2025 ຢູ່ທີ່ຫ້ອງປະຊຸມຂອງພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ພາຍໃຕ້ເປັນປະທານຂອງສະຫາຍ ຊົງເລົ່າ ຢົງນູ ຮອງເລຂາຄະນະພັກ ນະຄອນຫຼວງວຽງຈັນ ໂດຍການເຂົ້າຮ່ວມຂອງສະຫາຍ ສີລິລາດທົງສິນ ທອງເພັງ ຮອງເຈົ້າຄອງນະຄອນຫຼວງວຽງຈັນ, ມີບັນດາສະຫາຍຄະນະໜ່ວຍພັກຂຶ້ນກັບຄະນະພັກຮາກຖານ, ໜ່ວຍພັກອຸດສາຫະກໍາ, ໜ່ວຍພັກຕະຫຼາດເຊົ້າ, ໜ່ວຍພັກລັດວິສາຫະກິດການຄ້າ, ໜ່ວຍພັກລັດວິສາຫະກິດສະບຽງອາຫານ, ໜ່ວຍພັກບໍລິສັດສັນຕິພາບສັງກະສີລາວ, ໜ່ວຍພັກລາວລົງທຶນ ແລະ ພັດທະນາຊັບພະຍາກອນ, ໜ່ວຍພັກກົນຈັກໂລຫະ ແລະ ແກັສອຸດສາຫະກໍາ, ໜ່ວຍພັກອາພອນລາວ ແລະ ສະມາຊິກພັກພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ເຂົ້າຮ່ວມ.

 

 

 

 

 

 

 

 

ໃນທີ່ປະຊຸມ ສະຫາຍ ນາງ ວັນມະນີ ພິມມະສານ ກໍາມະການພັກ, ເລຂາໜ່ວຍພັກຮາກຖານພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ໄດ້ຜ່ານບົດສໍາຫຼວດການນໍາພາລວມຂອງຄະນະພັກຮາກຖານພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ໄດ້ສໍາເລັດກອງປະຊຸມໃຫຍ່ ຄັ້ງທີ IV ໃນວັນທີ 04 ກຸມພາ 2025, ມີຄະນະພັກຮາກຖານ ຈໍານວນ 7 ສະຫາຍ, ຍິງ 3 ສະຫາຍ; ມີ 10 ໜ່ວຍພັກທີ່ຂຶ້ນກັບ ໃນນີ້: ມີໜ່ວຍພັກພາກລັດບໍລິຫານ 3 ໜ່ວຍພັກ, ລັດວິສາຫະກິດ 2 ໜ່ວຍພັກ ແລະ ໜ່ວຍພັກເອກະຊົນ 5 ໜ່ວຍພັກ. ມີສະມາຊິກພັກທັງໝົດ 175 ສະຫາຍ, ຍິງ 62 ສະຫາຍ; ເປັນສະມາຊິກພັກສົມບູນ 173 ສະຫາຍ, ຍິງ 62 ສະຫາຍ ແລະ ສະມາຊິກພັກສໍາຮອງ 2 ສະຫາຍ.

ເພື່ອຈັດຕັ້ງຜັນຂະຫຍາຍຍຸດທະສາດ ການພັດທະນາອຸດສາຫະກຳປຸງແຕ່ງ ແລະ ການຄ້າ ສປປ ລາວ ກໍຄື ນະຄອນຫຼວງວຽງຈັນ ໂດຍປິ່ນອ້ອມ 8 ຍຸດທະສາດ ຕົ້ນຕໍ ເຊັ່ນ: ຍຸດທະສາດການພັດທະນາ ແລະ ສົ່ງເສີມການສົ່ງອອກ, ຍຸດທະສາດດ້ານການພັດທະນາຕະຫຼາດ ແລະ ການຄຸ້ມຄອງລາຄາ-ສິນຄ້າ, ຍຸດທະສາດການພົວພັນຮ່ວມມືດ້ານການຄ້າຕ່າງປະເທດ, ຍຸດທະສາດທາງດ້ານການຄຸ້ມຄອງ ແລະ ນໍາໃຊ້ຄຸນປະໂຫຍດຈາກການນໍາເຂົ້າສິນຄ້າ, ຍຸດທະສາດເປັນໃຈກາງເຊື່ອມໂຍງທຸລະກິດການຄ້າສິນຄ້າ ແລະ ການຄ້າການ ບໍລິການຜ່ານແດນ, ຍຸດທະສາດດ້ານການສົ່ງເສີມ ແລະ ພັດທະນາວິສາຫະກິດຂະໜາດນ້ອຍ ແລະ ກາງ, ຍຸດທະສາດ ການຫັນເປັນອຸດສາຫະກຳທັນສະໄໝໃນຂະແໜງອຸດສາຫະກຳ ແລະ ການຄ້າ, ຍຸດທະສາດການພັດທະນາບຸກຄະລາກອນ ແລະ ລະບົບຄຸ້ມຄອງບໍລິການ.

ການຈັດຕັ້ງປະຕິບັດນິຕິກຳ, ການວາງແຜນພັດທະນາຮ່ວມມືເສດຖະກິດທີ່ກ່ຽວຂ້ອງກັບຂະແໜງອຸດສາຫະກຳ ແລະ ການຄ້າ ໃນແຕ່ລະໄລຍະ, ຄຸ້ມຄອງລາຍຮັບ-ລາຍຈ່າຍ ຕາມແຜນງົບປະມານ ໄດ້ລື່ນແຜນຈໍານວນ 04 ປີ ຄື: ປີ 2021-2024, ຄຸ້ມຄອງຊັບສົມບັດ, ພາຫະນະ ແລະ ຊັບສິນຂອງພະແນກ, ຊີ້ນຳ ແລະ ຄຸ້ມຄອງການຈັດຕັ້ງ ປະຕິບັດວຽກງານທາງດ້ານວິຊາການຂອງຫ້ອງການອຸດສາຫະກຳ ແລະ ການຄ້າເມືອງ ຕາມການແບ່ງຂັ້ນຄຸ້ມຄອງ; ຊຸກຍູ້ສົ່ງເສີມໃຫ້ມີການຂະຫຍາຍຕົວຢ່າງຕໍ່ເນື່ອງ ແລະ ດໍາເນີນການຜະລິດຕາມທິດສີຂຽວ-ຍືນຍົງ ແລະ ເປັນມິດກັບສິ່ງແວດລ້ອມ ຊຶ່ງມີບັນດາຄາດໝາຍທີ່ວາງໄວ້ເຊັ່ນ: ກາຍຂະຫຍາຍຕົວດ້ານ ອຸດສາຫະກຳ ເພີ້ມຂຶ້ນ 11,5%, ມີມູນ ຄ່າ 48,130,102,138,690 ກີບ (48,130 ຕື້ກວ່າກີບ) ທຽບໃສ່ 5 ປີຜ່ານມາ ເຫັນວ່າ: ເພີ່ມຂbhນ 27,289,345,363,360 ກີບ (27,289 ຕື້ກວ່າກີບ) ເທົ່າກັບ 76,37%; ຕົວເລກການສົ່ງອອກຄາດໝາຍບໍ່ໃຫ້ ຫຼຸດ 12%/ປີ, 05 ປີ ຜ່ານມາເຫັນວ່າ ເພີ່ມຂຶ້ນ (3,690 ຕື້ໂດລາ) ເທົ່າກັບ 128,15%, ຕົວເລກການນໍາເຂົ້າ ຄາດໝາຍບໍ່ໃຫ້ເກີນ 17%/ປີ ທຽບໃສ່ 5 ປີຜ່ານມາ ເຫັນວ່າ ເພີ່ມຂຶ້ນ (8,088 ຕື້ໂດລາ) ເທົ່າກັບ 41,99%, ຊຸກຍູ້ການ ໄດ້ຕິດຕາມການພັດທະນາເຂດອຸດສາຫະກຳໃນ ນະຄອນຫຼວງວຽງຈັນ ໂດຍປະສານງານກັບພາກສ່ວນກ່ຽວຂ້ອງ; ໜັງຕີງລາຄາສິນຄ້າຂອງຕະຫຼາດພາຍໃນ, ການຄຸ້ມຄອງລາຄາສິນຄ້າ, ຄ່າບໍລິການແລະ ດັດສົມລາຄາ; ຄຸ້ມຄອງ, ຕິດຕາມ ແລະ ກວດກາບັນດາວິສາຫະກິດທີ່ເຄື່ອນໄຫວທຸລະກິດ, ຕິດຕາມ ແລະ ວາງມາດຕະການສະກັດກັ້ນທຸລະກິດການຄ້ານອກລະບົບ ແລະ ແກ້ໄຂເປັນແຕ່ລະໄລຍະ, ພັດທະນາຕາໜ່າງການຄ້າພາຍໃນ ໃຫ້ມີຄວາມຫຼາກຫຼາຍ, ການຈໍລະຈອນສິນຄ້າມີຄວາມຄ່ອງຕົວ; ອໍານວຍຄວາມສະດວກໃຫ້ແກ່ນັກລົງທຶນກ່ຽວກັບການສ້າງຕັ້ງ, ການປ່ຽນແປງເນື້ອໃນທະບຽນວິສາຫະກິດແລະການຍຸບເລີກວິສາຫະກິດ, ສົ່ງເສີມການປະກອບທຸລະກິດ, ເກັບກຳ, ປົກປັກຮັກສາແລະບໍລິການສະ ໜອງຂໍ້ມູນວິສາຫະກິດແກ່ສາທາລະນະຊົນຕາມກົດໝາຍ, ລະບຽບການ ແລະ ຕາມການແບ່ງຂັ້ນຄຸ້ມຄອງ; ຄົ້ນຄວ້າເອກະສານນໍາເຂົ້າ ແລະ ສົ່ງອອກສິນຄ້າຕາມລະບຽບການ, ອໍານວຍຄວາມສະດວກ ທາງດ້ານການຄ້າບົນພື້ນຖານຄວາມສອດຄ່ອງກັບນະໂຍບາຍ ແລະ ນິຕິກຳທີ່ວາງອອກໃນແຕ່ລະໄລຍະ; ໄດ້ຊຸກຍູ້ສົ່ງເສີມ, ໃຫ້ຄຳປຶກສາ, ແນະນໍາ, ອໍານວຍຄວາມສະດວກການພັດທະນາສິນຄ້າ, ພ້ອມທັງສົ່ງເສີມການນໍາໃຊ້ນະ ວັດຕະກຳໃໝ່ ເຂົ້າໃນການຜະລິດ ເພື່ອສ້າງມູນຄ່າເພີ່ມໃຫ້ສິນຄ້າ ແລະ ທັງເປັນການຊຸກຍູ້ສົ່ງເສີມ ໃຫ້ທຸລະກິດ ປະດິດສ້າງສິນຄ້າໃໝ່ໆ ເພື່ອສະໜອງໃຫ້ຕະຫຼາດ, ຊຸກຍູ້ ສົ່ງເສີມ, ເອື້ອອໍານວຍຄວາມສະດວກເພື່ອພັດທະນາສິນຄ້າ “ໜຶ່ງເມືອງໜຶ່ງຜະລິດຕະພັນ”; ຮັບຄໍາຮ້ອງ, ຄໍາສະເໜີ, ໃຫ້ຄໍາປຶກສາກ່ຽວກັບແບບອຸດສາຫະກຳ, ເຄື່ອງໝາຍການຄ້າ, ລິຂະສິດ ແລະ ສິດກ່ຽວຂ້ອງກັບລິຂະສິດ ລວມທັງການພິຈາລະນາຄໍາສະເໜີແກ້ໄຂຂໍ້ຂັດແຍ່ງ ທີ່ກ່ຽວຂ້ອງກັບການລະເມີດສິດຊັບສິນທາງປັນຍາ, ຄຸ້ມຄອງ, ຕິດຕາມ, ກວດກາການຈັດຕັ້ງປະຕິບັດວຽກງານ ມາດຕະຖານ ແລະ ວັດແທກຕາມກົດໝາຍ ແລະ ລະບຽບການ.

ຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມຈາກສະຫາຍຮອງເລຂາຄະນະພັກ ນະຄອນຫຼວງວຽງຈັນ ເພື່ອໃຫ້ທິດຊີ້ນຳ ແລະ ເປັນທິດທາງໃຫ້ແກ່ການຈັດຕັ້ງປະຕິບັດວຽກງານແຕ່ລະດ້ານ ກໍຄືການດໍາເນີນວຽກງານຕ່າງໆໃນຕໍ່ໜ້າ ໃຫ້ມີຜົນສຳເລັດຂຶ້ນຕື່ມອີກ.