ນະຄອນຫຼວງວຽງຈັນ ໄດ້ຈັດກອງປະຊຸມທາບທາມບຸກຄະລາກອນອອກສະໝັກເລືອກຕັ້ງ ຄະນະບໍລິຫາງງານພັກ ນະຄອນຫຼວງວຽງຈັນ ສະໄໝທີ VIII ຮອບທີ I ໃນວັນທີ 08 ສິງຫາ 2025 ຢູ່ທີ່ຫ້ອງປະຊຸມແຫ່ງຊາດ ພາຍໃຕ້ການເປັນປະທານຂອງສະຫາຍ ອານຸພາບ ຕຸນາລົມ ເລຂາທິການສູນກາງພັກ, ເລຂາຄະນະພັກ, ປະທານສະພາປະຊາຊົນ ນະຄອນຫຼວງວຽງຈັນ, ມີບັນດາສະຫາຍໃນຄະນະບໍລິຫານງານພັກ ນະຄອນຫຼວງວຽງຈັນ ສະໄໝທີ VII ທີ່ຍັງປະຈໍາການ, ກໍາມະການປະຈໍາ, ປະທານ, ຮອງປະທານຄະນະກໍາມາທິການ, ເລຂາ, ຮອງເລຂາທິການສະພາປະຊາຊົນ ນະຄອນຫຼວງວຽງຈັນ, ຄະນະບໍລິຫານງານພັກກອງບັນຊາການປ້ອງກັນຊາດ, ຄະນະບໍລິຫານງານພັກກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ, ຄະນະບໍລິຫານງານພັກເມືອງ, ຄະນະບໍລິຫານງານພັກກອງບັນຊາການປ້ອງກັນຊາດ, ຄະນະບໍລິຫານງານພັກກອງບັນຊາການປ້ອງກັນຄວາມສະຫງົບເມືອງ, ສະມາຊິກພັກສົມບູນທີ່ມີຕໍາແໜ່ງຂັ້ນຫົວໜ້າຂະແໜງ ແລະ ທຽບເທົ່າຂຶ້ນໄປ ແລະ ສະມາຊິກພັກສົມບູນທີ່ມີຕໍາແໜ່ງບໍລິຫານຂັ້ນຮອງຫົວໜ້າຫ້ອງການ ແລະ ທຽບເທົ່າຂອງເມືອງຂຶ້ນໄປ ເຂົ້າຮ່ວມ.
ໃນທີ່ປະຊຸມ ສະຫາຍ ຊົງເລົ່າ ຢົງນູ ຮອງເລຂາຄະນະພັກ ໄດ້ຂຶ້ນຜ່ານຄໍາສັ່ງ ຂອງຄະນະເລຂາທິການສູນກາງພັກ ສະບັບເລກທີ 411/ຄລສພ, ລົງວັນທີ 08 ສິງຫາ 2023 ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ; ຜ່ານແຈ້ງການ ຂອງຄະນະຈັດຕັ້ງສູນກາງພັກ ສະບັບເລກທີ 186/ຄຈສພ, ລົງວັນທີ 03 ກໍລະກົດ 2024 ກ່ຽວກັບການຄົ້ນຄວ້າ, ເລືອກເຟັ້ນກຳມະການຄະນະບໍລິຫານງານພັກ ຊຸດປະຈຸບັນ ທີ່ມີອາຍຸກະສຽນເກີນເງື່ອນໄຂ ຕາມທີ່ນິຕິກຳກຳນົດໄວ້ ເພື່ອເປັນເປົ້າໝາຍທາບທາມບຸກຄະລາກອນ ທີ່ຈະອອກສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກຊຸດໃໝ່ ແລະ ສະຫາຍ ຄໍາມາ ແສງມີໄຊ ກໍາມະການປະຈໍາພັກ, ຫົວໜ້າຄະນະຈັດຕັ້ງ ນະຄອນຫຼວງວຽງຈັນ ໄດ້ຂຶ້ນຜ່ານມາດຖານເງື່ອນໄຂຜູ້ສະໝັກເຂົ້າໃນຄະນະບໍລິຫາງງານພັກ ນະຄອນຫຼວງວຽງຈັນ ສະໄໝທີ VIII ແລະ ປະທານກອງປະຊຸມ ໄດ້ມີຄໍາເຫັນຊີ້ນໍາ ກ່ອນການທາບທາມ ຮອບທີ I. ຫຼັງຈາກນັ້ນ, ຄະນະຮັບຜິດຊອບ ກໍໄດ້ດໍາເນີນການທາບທາມບຸກຄະລາກອນອອກສະໝັກເລືອກຕັ້ງ ຄະນະບໍລິຫາງງານພັກ ນະຄອນຫຼວງວຽງຈັນ ສະໄໝທີ VIII ຮອບທີ I.
