ປາຖະກະຖາວັນສຳຄັນຂອງຊາດ
ໃນວັນທີ 4 ທັນວາ 2024, ໂຮງຮຽນການເມືອງ ແລະ ການປົກຄອງ ນະຄອນຫຼວງວຽງຈັນ ໄດ້ຈັດພິທີໂຄສະນາປາຖະກະຖາວັນຊາດ ທີ 2 ທັນວາ ຄົບຮອບ 49 ປີ, ວັນເກີດປະທານ ໄກສອນ ພົມວິຫານ ຄົບ ຮອບ 104 ປີ ທີ່ສະໂມສອນໂຮງຮຽນດັ່ງກ່າວ ປາຖະກະຖາໂດຍ ທ່ານ ເຂັມເພັດ ແພງດວງຈັນ ອະດີດກຳມະການພັກ ຫົວໜ້າຄະນະໂຄສະນາອົບຮົມ ນະຄອນຫຼວງວຽງຈັນ ມີທ່ານ ພວນສະຫວັດ ອອນລັດບຸນມີ ວ່າການຫົວໜ້າໂຮງຮຽນການເມືອງ ແລະ ການປົກຄອນ ນະຄອນຫຼວງວຽງຈັນ ພ້ອມດ້ວຍຄະນະ, ຄູ-ອາຈານ, ພະນັກງວິຊາການ ແລະ ນັກສຶກສາເຂົ້າຮ່ວມ.
ໃນພິທີດັ່ງກ່າວ ເປັນການທົບທວນຫວນຄືນມູນເຊື້ອ ພາລະກິດຕໍ່ສູ້ກູ້ຊາດ ຂອງຜູ້ນຳພັກ-ລັດເຮົາໃນແຕ່ລະໄລຍະ ຂອງການປະຕິວັດ ແລະ ຄວາມອົງອາດກ້າແກ່ນ ຂອງກອງທັບປະຊາຊົນ ປະຕິວັດລາວໃນເມື່ອກ່ອນ ພ້ອມທັງຮັບຊົມການສາຍຮູບເງົາສາລະຄະດີກ່ຽວກັບມູນເຊື້ອ, ຜົນງານການເຄື່ອນໄຫວດ້ານຕ່າງໆ ຂອງພັກ ຂອງທ່ານຜູ້ນຳ.
ພາຍຫຼັງປະເທດລາວ ໄດ້ຕົກເປັນຫົວເມືອງຂຶ້ນ ຂອງຈັກກະພັດຝຣັ່ງ ໃນປີ 1893 ປະຊາຊົນລາວ ໄດ້ຖືກກົດຂີ່ຂົ່ມເຫັງຢ່າງໂຫດຮ້າຍປ່າເຖື່ອນ, ບໍ່ມີອິດສະຫຼະພາບ, ຖືກເກນໄປເປັນຂ້ອຍຂ້າ, ເປັນຂ້າທາດຮັບໃຊ້ຝຣັ່ງທຸກຮູບແບບ ຍ້ອນທົນຕໍ່ການກົດຂີ່ຂົມເຫັງບໍ່ໄຫວ ປະຊາຊົນລາວບັນດາເຜົ່າ ຈຶ່ງໄດ້ລຸກຮື້ຂຶ້ນຕ້ານການປົກຄອງ ຂອງຝຣັ່ງ ຢູ່ຫຼາຍແຂວງ ຂອງປະເທດລາວ ເຊິ່ງເລີ່ມຕົ້ນດ້ວຍຂະບວນການຕໍ່ສູ້ ຂອງພໍ່ກະດວດ, ອົງແສນ, ເຈົ້າຟ້າປັດໄຈ ອົງແກ້ວ-ອົງກົມມະດໍາ, ນາຍຄູຄຳ ແລະ ຜູ້ອື່ນໆ, ແຕ່ກໍບໍ່ມີຂະບວນການຕໍ່ສູ້ໃດທີ່ສາມາດຍາດໄດ້ໄຊຊະນະ ຍ້ອນຫຼາຍສາເຫດແຕ່ປັດໃຈສໍາຄັນຕົ້ນຕໍແມ່ນບໍ່ມີພັກນໍາພາ.
ພາຍຫຼັງພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂຶ້ນໂດຍແມ່ນ ປະທານ ໄກສອນ ພົມວິຫານ ເປັນເລຂາທິການໃຫຍ່ ພາຍໃຕ້ການນໍາພາອັນສະຫຼາດສ່ອງໃສ ຂອງພັກ, ຂະບວນການປະຕິ ວັດໄດ້ກ້າວຂຶ້ນສູ່ລະດັບໃໝ່ ແລະ ໄດ້ຮັບໄຊຊະນະເປັນກ້າວໆ ຈິ່ງເຮັດໃຫ້ຈັກກະພັດຝຣັ່ງ ຍອມເຊັນສັນ ຍາເຊີແນວ 1954 ແລະ ຈັກກະພັດອາເມລິກາ ກໍໂດດເຂົ້າມາແທນ ພວກເຂົາໄດ້ດໍາເນີນການກົດຂີ່ຂູດຮີດ ປະຊາຊົນລາວຍິ່ງໜັກໜ່ວງກວ່າເດີມ ແລະ ການຕໍ່ສູ້ ຂອງປະຊາຊົນລາວ ແມ່ນປະເຊີນກັບສັດຕູໂຕຮ້າຍກາດ ແລະ ເຂັ້ມແຂງທີ່ສຸດ, ແຕ່ກອງທັບ ແລະ ປະຊາຊົນລາວເດັດຂາດບໍ່ຍອມຈໍານົນສັດຕູ ຕໍ່ສູ້ຢ່າງພິລະອາດຫານ, ເດັດຂາດມີໄຊ, ຜ່ານຂະບວນການຕໍ່ສູ້ອັນຍືດເຍື້ອຍາວນານ ໄດ້ມີຫຼາຍເຫດການສໍາຄັນ ເຊິ່ງເປັນສິ່ງມະຫັດສະຈັນຖືກຈາລຶກໄວ້ໃນໜ້າປະຫວັດສາດ ຂອງຊາດ ເປັນຕົ້ນແມ່ນ: ການຜ່າວົງປິດລ້ອມ ຂອງກອງພັນທີ 2 ຂອງຝ່າຍປະເທດລາວ ຢູ່ທົ່ງໄຫຫີນຊຽງຂວາງ, ຜູ້ນໍາແນວລາວຮັກຊາດ ໂຕນອອກຈາກຄຸກໂພນເຄັງ, ການຍຶດອໍານາດການປົກຄອງດ້ວຍ 3 ບາດຄ້ອນຍຸດທະສາດ ແບບບົວບໍ່ຊໍ້ານໍ້າບໍຂຸ່ນ ແຕ່ຈັບປາໄດ້ໝົດ ແລະ ເຫດການອື່ນໆໃນທີ່ສຸດກໍກ້າວໄປເຖິງໄຊຊະນະຢ່າງສົມບູນ ສະຖາປະນາ ສປປລາວ ຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ 1975.
ຕະຫຼອດໄລຍະ 49 ປີ ແຫ່ງການປົກປັກຮັກສາ ແລະ ສ້າງສາລະບອບໃໝ່ນີ້, ເຖີງວ່າຈະປະເຊີນກັບຄວາມຫຍຸ້ງຍາກ, ອຸປະສັກ ແລະ ການທົດສອບນາໆປະການກໍ່ຕາມ, ແຕ່ພາຍໃຕ້ການນໍາພາຂອງພັກ ແລະ ຄວາມສາມັກ ຄີເປັນປຶກແຜ່ນ ແລະ ພ້ອມພຽງຂອງປະຊາຊົນລາວທັງຊາດ ໄດ້ກ້າວເດີນຢ່າງໜັກແໜ້ນ ສູ່ຈຸດໝາຍປາຍທາງທີ່ວາງໄວ້ ແລະ ສາມາດຢືນຢັນດ້ວຍຄວາມພາກພູມໃຈວ່າ: ບໍ່ມີຍຸກໃດ, ສະໄໝໃດທີ່ປະເທດຊາດອັນແສນຮັກ ຂອງພວກເຮົາໄດ້ມີຄວາມຮົ່ມເຢັນເປັນສຸກ ແລະ ໄດ້ຮັບການພັດທະນາຈະເລີນກ້າວໜ້າ, ຍ້ອນມີການນໍາພາຂອງພັກ, ມີແນວທາງອັນຖືກຕ້ອງ ແລະ ການພົວພັນຮ່ວມມືທີ່ດີກັບບັນດາປະເທດເພື່ອນມິດຢຸດທະສາດ ຈິງເຮັດໃຫ້ ສປປ ລາວ ມີບົດບາດພົ້ນເດັ່ນສູງຂຶ້ນໃນເວທີພາກພື້ນ ແລະ ສາກົນ.