ໜ່ວຍພັກຮາກຖານຊາວໜຸ່ມພະແນກພາຍໃນ ນະຄອນຫຼວງວຽງຈັນ ຈັດພິທີມອບໃບຢັ້ງຢືນຊາວໜຸ່ມ 4 ບຸກ ໃນວັນທີ 24 ກໍລະກົດ ຢູ່ທີ່ຫ້ອງວ່າການນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ວິລະສອນ ພັນດານຸວົງ ເລຂາໜ່ວຍຮາກຖານຊາວໜຸ່ມພະແນກພາຍໃນ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ສຸມາລີ ທໍາມະວົງ ກໍາມະການພັກ, ຫົວໜ້າພະແນກພາຍໃນ ນະຄອນຫຼວງວຽງຈັນ ທ່ານ ສີລິວັນ ຫຼຽນວິໄລສັກ ຮອງເລຂາຄະນະບໍລິຫານງານຊາວໜຸ່ມ ນະຄອນຫຼວງວຽງຈັນ ມີບັນດາທ່ານຕາງໜ້າຈາກຮາກຖານຊາວໜຸ່ມທີ່ຖືກເຊີນ ແລະ ສະມາຊິກຊາວໜຸ່ມພະແນກພາຍໃນ ນະຄອນຫຼວງວຽງຈັນ ເຂົ້າຮ່ວມ.
ໃນພິທີ່ດັ່ງກ່າວ ທ່ານ ວິລະສອນ ພັນດານຸວົງ ເລຂາໜ່ວຍຮາກຖານຊາວໜຸ່ມພະແນກພາຍໃນ ນະຄອນຫຼວງວຽງຈັນ ໄດ້ໃຫ້ຮູ້ວ່າ: ຜ່ານການຈັດຕັ້ງປະຕິບັດ ແລະ ການປະເມີນກວດກາຂໍ້ແຂງຂັນ 4 ບຸກ ໃນປີ 2024 ຂອງໜ່ວຍຮາກຖານຊາວໜຸ່ມພະແນກພາຍໃນ ນະຄອນຫຼວງວຽງຈັນ ເຫັນວ່າ: ສະມາຊິກຊາວໜຸ່ມພາຍໃນໜ່ວຍ ແມ່ນມີທັດສະນະຫຼັກໝັ້ນການເມືອງໜັກແໜ້ນ, ມີຄວາມເຊື່ອໝັ້ນ ແລະ ເປັນເອກະພາບສູງຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເວົ້າລວມ ເວົ້າສະເພາະແມ່ນຂອງຄະນະພັກ, ຄະນະໜ່ວຍ ແລະ ສະມາຊິກພາຍໃນໜ່ວຍ ສະແດງອອກໃນຖັນແຖວສະມາຊິກຊາວໜຸ່ມ ແມ່ນມີຄວາມອຸ່ນອຽນທຸ່ນທ່ຽງ, ຫ້າວຫັ້ນໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍ, ເປັນເຈົ້າການໃນການປະຕິບັດແນວທາງນະໂຍບາຍຂອງພັກ, ຮຽນຮູ້ວິທະຍາສາດເຕັກນິກທີ່ທັນສະໄໝ ເພື່ອນຳໃຊ້ເຂົ້າໃນການປະຕິບັດວຽກງານທີ່ໄດ້ຮັບມອບໝາຍ, ດ້ານການຈັດຕັ້ງແມ່ນໄດ້ຮັບການປັບປຸງ ແລະ ມີຄວາມເຂັ້ມແຂງ ມີແບບແຜນການນຳພາຢ່າງຖືກຕ້ອງ, ສອດຄ່ອງ ເຮັດໃຫ້ພາຍໃນ ໜ່ວຍມີຄວາມສາມັກຄີ ມີຄວາມສະຫງົບ ມີຂະບວນການທີ່ພົ້ນເດັ່ນ. ພ້ອມດຽວກັນນີ້, ກໍໄດ້ຊຸກຍູ້ສົ່ງເສີມໃຫ້ສະມາຊິກສ້າງລາຍຮັບເສີມເວລານອກໂມງການຕາມເງື່ອນໄຂຂອງແຕ່ລະຄອບຄົວ. ຜ່ານການປະເມີນການເຄື່ອນໄຫວຈັດຕັ້ງປະຕິບັດ ຂໍ້ແຂ່ງຂັນ 4 ບຸກ ເຮັດໃຫ້ສະມາຊິກຊາວໜຸ່ມຈຳນວນຫຼາຍໄດ້ຮັບໃບຍ້ອງຍໍໃນການຈັດຕັ້ງເຄື່ອນໄຫວ 4 ບຸກ ດັ່ງນັ້ນ, ຈຶ່ງສາມາດຢັ້ງຢືນ ແລະ ຮັບຮອງເອົາຂອງໜ່ວຍຮາກຖານຊາວໜຸ່ມພະແນກພາຍໃນ ນະຄອນຫຼວງວຽງຈັນ ເປັນໜ່ວຍ 4 ບຸກ ປະຈຳປີ 2024; ໄດ້ມອບໃບຍ້ອງຍໍໃຫ້ສະມາຊິກທີ່ມີຜົນງານດີເດັ່ນ ແລະ ມອບໃບຍ້ອງຍໍໃຫ້ສະມາຊິກພົ້ນກະສຽນ ບຸກຄົນທີ່ມີຜົນງານດີເດັ່ນ; ເປັນກຽດມອບໂດຍທ່ານ ສີລິວັນ ຫຼຽນວິໄລສັກ ຮອງເລຂາຄະນະບໍລິຫານງານຊາວໜຸ່ມ ນະຄອນຫຼວງວຽງຈັນ.
ຕອນທ້າຍພິທີ ຍັງໄດ້ຮັບຟັງການໂອ້ລົມຈາກທ່ານ ສີລິວັນ ຫຼຽນວິໄລສັກ ຮອງເລຂາຄະນະບໍລິຫານງານຊາວໜຸ່ມ ນະຄອນຫຼວງວຽງຈັນ ຊຶ່ງທ່ານໄດ້ຕີລາຄາຍ້ອງຍໍຊົມເຊີຍ ຕໍ່ກັບໜ່ວຍຮາກຖານຊາວໜຸ່ມພະແນກພາຍໃນ ນະຄອນຫຼວງວຽງຈັນ ທີ່ໄດ້ເຄື່ອນໄຫວຈັດຕັ້ງປະຕິບັດຂໍ້ແຂ່ງຂັນ 4 ບຸກ ຕະຫຼອດໄລຍະ 1 ປີ ຜ່ານມາ. ພ້ອມດຽວກັນນັ້ນ, ທ່ານຍັງໄດ້ມີຄໍາເຫັນເພີ່ມຕື່ມ: ເພື່ອເພີ່ມທະວີການເຊື່ອມຊຶມແນວທາງຂອງພັກ, ກໍາແໜ້ນບັນດານິຕິກໍາຕ່າງໆ, ຮໍ່າຮຽນຄົ້ນຄວ້າ ແລະ ຝຶກຝົນຕົນເອງ ເປັນແບບຢ່າງໃຫ້ແກ່ມະຫາຊົນ; ເປັນເສນາທິການໃຫ້ແກ່ຄະນະພັກ, ເອົາໃຈໃສ່ໃຈຕໍ່ກັບວຽກງານວິຊາສະເພາະໂດຍສະເພາະທີ່ຕິດພັນກັບວຽກງານ 4 ບຸກ, ເພີ່ມທະວີຄວາມສາມັກຄີພາຍໃນໜ່ວຍ ໃຫ້ເປັນຈິດໜຶ່ງໃຈດຽວ, ເຄື່ອນໄຫວຈັດຕັ້ງປະຕິບັດແບບລວມສູນປະຊາທິປະໄຕ ແລະ ສືບຕໍ່ຮັກສາມູນເຊື້ອສູ້ຊົນຈັດຕັ້ງປະຕິບັດຂໍ້ແຂ່ງຂັນ 4 ບຸກ ໃຫ້ບັນລຸຕາມແຜນການ.
