ແນວລາວສ້າງຊາດ ນະຄອນຫຼວງວຽງຈັນ ໄດ້ຈັດພິທີ ມອບ-ຮັບ ໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2025 ໃນຕອນບ່າຍຂອງວັນທີ 23 ກໍລະກົດ 2025 ຢູ່ທີ່ຫ້ອງວ່າການນະຄອນຫຼວງວຽງຈັນ ພາຍໃຕ້ເປັນປະທານຂອງສະຫາຍ ສົມໃຈ ຊົ່ງຈົ່ງເຕັງ ເລຂາໜ່ວຍພັກຮາກຖານແນວລາວສ້າງຊາດສ້າງຊາດ ນະຄອນຫຼວງວຽງຈັນ ມີບັນດາສະຫາຍທີ່ຕາງໜ້າຈາກໜ່ວຍພັກຮາກຖານຄະນະໂຄສະນາອົບຮົມ, ຄະນະຈັດຕັ້ງ, ຄະນະກວດກາພັກ, ອົງການກວດກາລັດ, ຫ້ອງວ່າການ, ສະຫະພັນກໍາມະບານ, ຄະນະຊາວໜຸ່ມປະຊາຊົນ ປະຕິວັດລາວ ນະຄອນຫຼວງວຽງຈັນ ແລະ ພະນັກງານ ຫຼັກແຫຼ່ງ ເຂົ້າຮ່ວມ.
ໃນພິທີ່ດັ່ງກ່າວ ສະຫາຍ ນາງ ວັນນະພາ ພົມມະຫາໄຊ ຂຶ້ນຜ່ານມະຕິຕົກລົງຂອງຄະນະປະຈໍາພັກ ວ່າດ້ວຍການຮັບຮອງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2024 ສະບັບເລກທີ 353/ຄປພ.ນວ, ລົງວັນທີ 18 ມີນາ 2025 ໂດຍໃຫ້ກຽດຂຶ້ນມອບໃບຢັ້ງຢືນໂດຍ ສະຫາຍ ສົມໃຈ ຊົ່ງຈົ່ງເຕັງ ເລຂາໜ່ວຍພັກຮາກຖານແນວລາວສ້າງຊາດສ້າງຊາດ ນະຄອນຫຼວງວຽງຈັນ ໃນໂອກາດທີ່ມີຄວາມຫມາຍຄວາມສໍາຄັນນີ້ ສະຫາຍ ສົມໃຈ ຊົ່ງຈົ່ງເຕັງ ກໍໄດ້ໂອ້ລົມຕໍ່ບັນດາ ສະຫາຍ ໃນຄະນະສະມາຊິກພັກພາຍໃນໜ່ວຍ ເຊິ່ງສະຫາຍກໍໄດ້ໃຫ້ຄໍາຍ້ອງຍໍຊົມເຊີຍຕໍ່ໜ່ວຍພັກພາຍໃນທີ່ສາມາດບຸກບືນຈົນໄດ້ກາຍເປັນໜ່ວຍພັກປອດໃສທຸກໆປີ ຈົ່ງພ້ອມກັນຮັກສາມູນເຊື້ອຕໍ່ໄປ ພ້ອມກັນນັ້ນ ສະຫາຍກໍຍັງໄດ້ເນັ້ນໜັກບາງບັນຫາເພີ່ມເຕີມຕໍ່ ຄະນະພັກ, ສະມາຊິກພັກພາຍໃນໜ່ວຍໃຫ້ມີຄວາມອຸນອຽນທຸນທ່ຽງ, ມີຄວາມສາມັກຄີພາຍໃນ ແລະ ນອກ ມີຄວາມຮູ້ ຄວາມເຂົ້າໃຈຢ່າງເລິກເຊິ່ງຕໍ່ແນວທາງນະໂຍບາຍລະບຽບການຂອງພັກ-ລັດ ປະຕິບັດກົດລະບຽບກົດໝາຍຂອງລັດໄປຄຽງຄູ່ກັນ ແລະ ມີຄວາມເຊື່ອໜັ້ນຕໍ່ການນໍາພາ-ຊີ້ນໍາ ຂອງພັກ-ລັດ, ມີການຕໍານິສົ່ງຂ່າວເພື່ອກໍ່ສ້າງກັນຊ່ວຍເຫຼືອເຊິ່ງກັນ ແລະ ກັນ ພາຍໃນໜ່ວຍພັກ.