ສໍາເລັດຊຸດຮຽນທິດສະດີການເມືອງ ຂັ້ນກາງ ຮຸ່ນທີ IV ແລະ ເປີດຊຸດຮຽນທິດສະດີການເມືອງ ຂັ້ນກາງ ຮຸ່ນທີ V ຈັດຂຶ້ນໃນວັນທີ 07 ສິງຫາ 2025 ຢູ່ທີ່ສະໂມສອນໂຮງຮຽນການເມືອງ ແລະ ການປົກຄອງ ນະຄອນຫຼວງວຽງຈັນ ພາຍໃຕ້ເປັນປະທານຂອງສະຫາຍ ຊົງເລົ່າ ຢົງນູ ຮອງເລຂາຄະນະພັກ ນະຄອນຫຼວງວຽງຈັນ ໂດຍການເຂົ້າຮ່ວມຂອງສະຫາຍ ພົງສະຫວັນ ສີລິພັນ ກໍາມະການພັກ, ຫົວໜ້າໂຮງຮຽນການເມືອງ ແລະ ການປົກຄອງ ນະຄອນຫຼວງວຽງຈັນ, ຕາງໜ້າຈາກກົມຈັດຕັ້ງ ຫ້ອງວ່າການ ນະຄອນຫຼວງວຽງຈັນ, ຕາງໜ້າຈາກຄະນະຈັດຕັ້ງນະຄອນຫຼວງວຽງຈັນ, ຕາງໜ້າຈາກພະແນກແຜນການ ແລະ ການລົງທຶນ ນະຄອນຫຼວງວຽງຈັນ, ພ້ອມດ້ວຍຄະນະໂຮງຮຽນ, ຄູ-ອາຈານ ແລະ ນັກສຶກສາ ເຂົ້າຮ່ວມ.
ສະຫາຍ ພົງສະຫວັນ ສີລິພັນ ໄດ້ຂຶ້ນຜ່ານບົດສະຫຼຸບການຈັດຕັ້ງການຮຽນ-ການສອນ ທິດສະດີການເມືອງຂັ້ນກາງ ຮຸ່ນທີ IV ທັງນີ້ ກໍເພື່ອສືບຕໍ່ຜັນຂະຫຍາຍແນວທາງປ່ຽນແປງໃໝ່ຮອບດ້ານຂອງພັກໃຫ້ເລິກເຊິ່ງ ເຂົ້າສູ່ຊີວິດຕົວຈິງ ໂດຍສະເພາະການຜັນຂະຫຍາຍຕາມທິດນໍາຂອງພັກເພື່ອສ້າງການປ່ຽນແປງໃໝ່ ແບບວິທີຄົ້ນຄວ້າຮໍ່າຮຽນ ຍົກສູງຄຸນນະພາບວຽກງານສຶກສາຮໍ່າຮຽນທິດສະດີການເມືອງ ດໍາເນີນການຍົກລະດັບ ແລະ ສະໜອງຄວາມຮູ້ໃໝ່ໃຫ້ພະນັກງານ ສະມາຊິກພັກ ພາຍໃຕ້ການນໍາພາ-ຊີ້ນໍາໂດຍກົງ ໃກ້ຊິດຕິດແທດເຖິງສະພາບຕົວຈິງຂອງຄະນະປະຈຳພັກ ອົງການປົກຄອງ ນະຄອນຫຼວງວຽງຈັນ ແລະ ການນໍາພາ-ຊີ້ນໍາດ້ານວິຊາການຂອງສະຖາບັນການເມືອງ ແລະ ການປົກຄອງແຫ່ງຊາດຢ່າງແຂງແຮງ ເລິກເຊິ່ງ ແລະ ຕໍ່ເນື່ອງ.
ສຳລັບນັກສຶກສາທີ່ສຳເລັດການສຶກສາຮຸ່ນທີ IV ແມ່ນສະມາຊິກພັກ-ພະນັກງານທີ່ມາຈາກພະແນກການ, ອົງການທຽບເທົ່າ ຂັ້ນນະຄອນຫຼວງວຽງຈັນ ມີນັກສຶກສາທັງໝົດ 55 ທ່ານ ຍິງ 19 ທ່ານ ໄດ້ດໍາເນີນການຮຽນ-ການສອນ ມາແຕ່ເດືອນ 30 ທັນວາ 2025 ຫາ 22 ກໍລະກົດ 2025 ຫຼັກສູດທິດສະດີການເມືອງຂັ້ນກາງ ຂອງສະຖາສະບັນການເມືອງ ແລະ ການປົກຄອງແຫ່ງຊາດ ວາງອອກ ມີ 7 ກຸ່ມວິຊາ. ປະກອບມີ: 13 ວິຊາ, ມີ 86 ບົດສອນ ເທົ່າກັບ 720 ຊົ່ວໂມງ. ໃນນັ້ນ, ຂຶ້ນຫ້ອງຟັງບັນຍາຍ 370 ຊົ່ວໂມງ. ສໍາມະນາ 73 ຊົ່ວໂມງ, ແກ້ຂໍ້ຂ້ອງໃຈ 47 ຊົ່ວໂມງ, ປະເມີນຜົນ 53 ຊົ່ວໂມງ (ສອບເສັງ 18 ຊົ່ວໂມງ, ຂຽນບົດເກັບກ່ຽວ 35 ຊົ່ວໂມງ ແລະ ທັດສະນະສຶກສາ 21 ຊົ່ວໂມງ), ໃຊ້ເວລາໃນການຮຽນທັງໝົດ 06 ເດືອນ.
ສະຫາຍ ຊົງເລົ່າ ຢົງນູ ຮອງເລຂາຄະນະພັກ ນະຄອນຫຼວງວຽງຈັນ ກໍໄດ້ມອບໃບຢັ້ງຢືນຂັ້ນກາງຮຸ່ນທີ IV ແລະ ໃນພິທີກໍໄດ້ມອບໃບຍ້ອງ ຍໍໃຫ້ນັກສຶກສາຮຽນເກັ່ງ, ມີວິໄນດີ ປະເພດ I ຊຶ່ງມີທັງໝົດ 46 ສະຫາຍ, ຍິງ 15 ສະຫາຍ ແລະ ມອບໃບຍ້ອງຍໍໃຫ້ນັກສຶກສາຮຽນເກັ່ງ, ມີວິໄນດີ ປະເພດ II ຊຶ່ງມີທັງໝົດ 09 ສະຫາຍ, ຍິງ 04 ສະຫາຍ.
ໂອກາດນີ້, ຍັງໄດ້ຮັບຟັງການໂອ້ລົມຈາກສະຫາຍຮອງເລຂາຄະພັກ ສະຫາຍກໍໄດ້ກ່າວສະແດງຄວມຍ້ອງຍໍຊົມເຊີຍຕໍ່ບັນດາຄູອາຈານ ແລະ ນັກສຶກສາທີ່ໄດ້ເອົາໃຈໃສ່ຢ່າງຕັ້ງໜ້າເຮັດໃຫ້ການຮຽນ-ການສອນ ຄັ້ງນີ້ໄດ້ຮັບຜົນສຳເລັດເປັນຢ່າງດີ, ພ້ອມທັງແນະນຳໃຫ້ນັກສຶກສາທີ່ຮຽນຈົບໃນຄັ້ງນີ້, ຈົ່ງ ນໍາເອົາເນື້ອໃນຈິດໃຈ, ຄວາມຮູ້, ຄວາມສາມາດທີ່ຕົນເອງໄດ້ຮຽນມາ ໄປນໍາໃຊ້ເຂົ້າໃນວຽກງານຕົວຈິງ ທີ່ຕົນເອງຮັບຜິດຊອບໃຫ້ເກີດດອກອອກຜົນ ແລະ ໄດ້ຮັບຜົນດີ, ພ້ອມກັນສືບຕໍ່ຝຶກຝົນຫຼໍ່ຫຼອມຕົນເອງໃນທຸກດ້ານ ເພື່ອກຽມພ້ອມເປັນພະນັກງານນໍາພາ-ຄຸ້ມຄອງ ທີ່ມີຄຸນນະພາບ ເພື່ອພ້ອມກັນສ້າງສາພັດທະນາບ້ານເມືອງ ໃຫ້ຈະເລີນກ້າວໜ້າຕະຫລອດໄປ.
