ກອງປະຊຸມອົງການປົກຄອງ ນະຄອນຫຼວງວຽງຈັນ ຄັ້ງທີ 49 ຈັດຂຶ້ນວັນທີ 31 ກໍລະກົດ 2025 ຢູ່ສຳນັກງານອົງການປົກຄອງ ນະຄອນຫຼວງວຽງຈັນ ໂດຍເປັນປະທານຂອງທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ມີຮອງເຈົ້າຄອງ ຫົວໜ້າພະແນກການ ເຈົ້າເມືອງ ແລະ ອົງການທຽບເທົ່າ ຂັ້ນນະຄອນຫຼວງວຽງຈັນ ເຂົ້າຮ່ວມ.
ກອງປະຊຸມຄັ້ງນີ້ ໄດ້ສຸມໃສ່ພິຈາລະນາຄົ້ນຄວ້າ ແລະ ປະກອບຄຳເຫັນຫຼາຍບັນຫາສໍາຄັນກ່ຽວກັບວຽກງານຂອງອົງການປົກຄອງ ນະຄອນຫຼວງວຽງຈັນ ຜ່ານມາ ແລະ ໃນຕໍ່ໜ້າໃຫ້ມີຜົນສຳເລັດ ເປັນຕົ້ນ ຮັບຟັງການລາຍງານກ່ຽວກັບແຜນການປ້ອງກັນ ແລະ ຄວບຄຸມໄພພິບັດ (ຕ້ານນໍ້າຖ້ວມ) ປະຈຳປີ 2025 ຢູ່ ນະຄອນຫຼວງວຽງຈັນ, ຮັບຟັງການລາຍງານກ່ຽວກັບໂຄງການສໍາຫຼວດ-ອອກແບບ ວາງແຜນເທດສະບານ ເມືອງນາຊາຍທອງ, ເມືອງນາຊາຍທອງ ແລະ ເມືອງປາກງື່ມ ຢູ່ນະຄອນຫຼວງວຽງຈັນ, ຮັບຟັງການລາຍງານກ່ຽວກັບຄວາມພ້ອມໃນການຈັດງານວາງສະແດງສິນຄ້າ ໃນງານບຸນນະມັດສະການພະທາດຫຼວງວຽງຈັນ ປະຈຳປີ 2025 ແລະ ຮັບຟັງການລາຍງານກ່ຽວກັບບົດສະຫຼຸບສະພາບພົ້ນເດັ່ນປະຈໍາເດືອນກໍລະກົດ ແລະ ແຜນວຽກຈຸດສຸມປະຈໍາເດືອນສິງຫາ 2025 ຂອງອົງການປົກຄອງນະຄອນຫຼວງວຽງຈັນ ຈໍານວນໜຶ່ງ.
ໂອກາດນີ້, ໃນຕອນທ້າຍປະຊຸມ ຍັງໄດ້ຮັບຟັງການໂອ້ລົມຈາກທ່ານເຈົ້າຄອງ ນະຄອນຫຼວງວຽງຈັນ ເພື່ອໃຫ້ທິດຊີ້ນຳ ແລະ ເປັນທິດທາງໃຫ້ແກ່ການຈັດຕັ້ງປະຕິບັດວຽກງານແຕ່ລະຂົງເຂດ ກໍຄືການດໍາເນີນວຽກງານຕ່າງໆໃນຕໍ່ໜ້າ ໃຫ້ມີຜົນສຳເລັດຍິ່ງຂຶ້ນຕື່ມອີກ.
