ແລກປ່ຽນບົດຮຽນດ້ານວຽກງານການເມືອງ-ແນວຄິດ

ລາຍລະອຽດ

ສ້າງຂື້ນເມື່ອ ວັນພຸດ, 26 ກຸມພາ 2020 08:06

ແລກປ່ຽນບົດຮຽນດ້ານວຽກງານການເມືອງ-ແນວຄິດ

ສະຫາຍ ເຂັມເພັດ ແພງດວງຈັນ ກຳມະການພັກ ຫົວໜ້າຄະນະໂຄສະນາອົບຮົມ ນະຄອນຫລວງວຽງຈັນ ໄດ້ນຳພາຄະນະ ຈຳນວນ 10 ສະຫາຍ ເດີນທາງຢ້ຽມຢາມ ແລະແລກປ່ຽນບົດຮຽນຮ່ວມກັບຄະນະໂຄສະນາສຶກສາ ນະຄອນຫລວງຮ່າໂນ້ຍ ສສ ຫວຽດນາມ ລະຫວ່າງ ວັນທີ 25-29 ພະຈິກ 2019.

ວັນທີ 26 ພະຈິກ ເວລາ 8:15’ ຄະນະໄດ້ເຂົ້າຢ້ຽມຂ່ຳນັບສະຫາຍ ເລ ແມ໋ງ ຮຸ່ງ ຮອງຫົວໜ້າຄະນະໂຄ ສະນາສຶກສາ ສູນກາງພັກກອມມູນິດຫວຽດນາມ ເວລາ 8:55’ ເຂົ້າຢ້ຽມຂໍ່ານັບ-ພົບປະກັບສະຫາຍ ນາງ ໂງ ທິ ແທ໋ງ ຮັ່ງ ກຳມະການສູນກາງພັກ ຮອງເລຂາຄະນະພັກ ຮອງເຈົ້າຄອງນະຄອນຫລວງຮ່າໂນ້ຍ ທັງເປັນຜູ້ປະຈຳ ການ ແລະ ໃນເວລາ 9:30’ ສອງຝ່າຍໄດ້ພົບປະ ແລະແລກປ່ຽນບົດຮຽນຮ່ວມກັນ ໂດຍສະຫາຍ ເຂັມເພັດ ແພງດວງຈັນ ກຳມະການພັກ ຫົວໜ້າຄະນະໂຄສະນາອົບຮົມ ແລະສະຫາຍ ຫງວຽນ ວັນ ຟອງ ກຳມະການປະຈຳພັກ ຫົວໜ້າຄະນະໂຄສະນາສຶກສາ ເຊິ່ງສອງຝ່າຍໄດ້ແຈ້ງສະພາບການພັດທະນາເສດຖະກິດ-ສັງຄົມ ຂອງສອງນະ ຄອນຫລວງໃຫ້ກັນຊາບ ໂດຍສະເພາະແມ່ນວຽກງານເປັນເສນາທິການ ແລະເປັນອົງການວິຊາສະເພາະໃຫ້ຄະນະປະຈຳພັກ-ຄະນະບໍລິຫານງານພັກ ດ້ານວຽກງານໂຄສະນາອົບຮົມ ກໍຄືວຽກງານການເມືອງ-ແນວຄິດ ທັງດຳເນີນການເຮັດວຽກງານຕົວຈິງ ແລະທັງຕິດຕາມ ຊຸກຍູ້ ກວດກາຕີລາຄາ ສະຫລຸບລາຍງານສະພາບ ແລະຮັບປະກັນໃຫ້ວຽກງານໂຄສະນາອົບຮົມ ກໍຄືວຽກງານການເມືອງ-ແນວຄິດຂອງຄະນະພັກຂັ້ນຕ່າງໆ ໃຫ້ໄປຕາມຫລັກການລວມສູນເປັນເອກະພາບ ສອງຝ່າຍຍັງໄດ້ປຶກສາຫາລື ແລະເປັນເອກະພາບໃນບົດບັນທຶກການຮ່ວມມື ແຕ່ນີ້ເເຖິງປີ 2020 ເຊິ່ງສອງຝ່າຍເຫັນດີໃນການແລກປ່ຽນການຮ່ວມມື ພັດທະນາກ່ຽວກັບວຽກງານການເມືອງ-ແນວຄິດ ແລະທິດສະດີ ວຽກງານວາລະສານ ການຜັນຂະຫຍາຍແນວທາງນະໂຍບາຍ ມະຕິຂອງພັກໄປສູ່ພະນັກງານ ສະມາຊິກພັກ ແລະປະຊາຊົນ.

ວັນທີ 27 ພະຈິກ ຄະນະຜູ້ແທນກໍໄດ້ເດີນທາງຢ້ຽມຢາມແຂວງ ແຄ່ງຮວາ ແລະໄດ້ພົບປະ ແລະແລກປ່ຽນບົດຮຽນກັບສະຫາຍ ໂຮ່ ວັນ ມຶ່ງ ກຳມະການປະຈຳພັກ ຫົວໜ້າຄະນະໂຄສະນາສຶກສາແຂວງ ແຄ່ງຮວາ ແຄ່ງຮວາ ມີເນື້ອທີ່ທັງໝົດ 5.217,7 ກມ² ມີປະຊາກອນ 1,2  ລ້ານກວ່າຄົນ  ມີ 9 ເມືອງ 2 ນະຄອນ 1 ເທດສະ ບານ ເສດຖະກິດຕົ້ນຕໍແມ່ນມາຈາກທະເລ ແລະການເພິ່ມຂຶ້ນສະເລ່ຍ 7,5%/ປີ ລາຍຮັບສະເລ່ຍ 2.800 ໂດລາ/ຄົນ/ປີ ມີສະໜາມບິນສາກົນ ແລະມີເສັ້ນທາງຫລວງເຊື່ອມຕໍ່ແຂວງພູພຽງ ແລະ ໄດ້ມີການພົວພັນແຮກສ່ຽວກັບແຂວງອັດຕະປື ແລະແຂວງຈຳປາສັກ ການຢ້ຽມຢາມຄັ້ງນີ້ ຄະນະຜູ້ແທນຍັງໄດ້ຢ້ຽມຊົມສະຖານທີ່ທ່ອງທ່ຽວປະ ຫວັດສາດ ວັດທະນະທຳຢູ່ນະຄອນຫລວງຮ່າໂນ້ຍ ແລະນະຄອນຢາຈາງ ອີກດ້ວຍ.  

• < ຕໍ່ໄປ
• ຕໍ່ໄປ >