ຫວນຄືນມູນເຊື້ອປະຫວັດສາດ

ລາຍລະອຽດ

ສ້າງຂື້ນເມື່ອ ວັນພຸດ, 22 ມີນາ 2023 02:21

ຂຽນໂດຍ ຄອຂ ນະຄອນຫຼວງ

ຫວນຄືນມູນເຊື້ອປະຫວັດສາດ

        ໃນວັນທີ 21 ມີນາ 2023 ຄະນະໂຄສະນາອົບຮົມ ເມືອງຫາດຊາຍຟອງ ໄດ້ຈັດປາຖະ ກະຖາເນື່ອງໃນໂອກາດລະນຶກ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ, ວັນຜູ້ເສຍອົງຄະ ແລະ ເສຍສະລະຊີວິດ ເພື່ອປະເທດຊາດ ຄົບຮອບ 77 ປີ ແລະ ວັນສ້າງຕັ້ງກໍາລັງປ້ອງກັນຄວາມສະຫງົບ ປະຊາຊົນ ຄົບຮອບ 62 ປີ. ທີ່ສະໂມສອນປົກຄອງເມືອງຫາດຊາຍຟອງ ໂດຍເປັນປະທານເລົ່າມູນເຊື້ອໂດຍ ສະຫາຍ ພົຈວ ສົມພອນ ສີສຸວັນນະ ຄະນະປະຈໍາພັກ, ຮອງຫົວໜ້າການເມືອງ ວິທະຍາຄານປ້ອງກັນຊາດໄກສອນພົມວິຫານ, ມີຄະນະບໍລິຫານງານພັກເມືອງ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ເລຂາຄະນະພັກຮາກຖານ, ເລຂາໜ່ວຍພັກບ້ານ 60 ບ້ານ, ເລຂາໜ່ວຍພັກໂຮງຮຽນ ແລະ ໂຮງໜໍ ລວມມີ 116 ໜ່ວຍພັກ ເຂົ້າຮ່ວມ.

        ການປະຖະກະຖາຄັ້ງນີ້ ແມ່ນມີຈຸດປະສົງຄື:

      1. ເພື່ອສຶກສາອົບຮົມການເມືອງ-ແນວຄິດ ໃຫ້ພະນັກງານ, ສະມາຊິກພັກ, ທະຫານ, ຕໍາຫຼວດ,​ ນັກຮຽນຮູ້ປັນຍາຊົນ ແລະ ປະຊາຊົນບັນດາເຜົ່າ ໄດ້ຮັບຮູ້ເຊື່ອມຊຶມ ແລະ ກໍາແໜ້ນຢ່າງເລິກເຊິ່ງກ່ຽວກັບມູນເຊື້ອຜົນງານການນໍາພາ-ຊີ້ນນໍາຂອງພັກປະຊາຊົນ ປະຕິວັດລາວ ໃນການນໍາພາປວງຊົນລາວທັງຊາດຕໍ່ສູ້ຕ້ານການຮຸກຮານຂອງພວກລາເມືອງຂຶ້ນແບບເກົ່າ, ແບບໃໝ່ ແລະ ຜົນງານໃນການນໍາພາປົກປັກຮັກສາ ແລະ ສ້າງສາປະເທດຊາດ ໃນໄລຍະຜ່ານມາ.

      2. ແນ່ໃສ່ທຸກຄົນຮັບຮູ້ ແລະ ເຂົ້າໃຈບັ້ນຮົບປ້ອງກັນຕົວເມືອງທ່າແຂກ ແມ່ນໜຶ່ງໃນບັ້ນຮົບຕໍ່ສູ້ທີ່ສໍາຄັນທີ່ສຸດຢູ່ໃນລາວ ມັນບໍ່ພຽງແຕ່ເປັນ “ ວັນຄຽດແຄ້ນ” ຂອງປະຊາຊົນລາວຕໍ່ພວກລ່າເມືອງຂຶ້ນຝະລັ່ງ ຜູ້ຮຸກຮານ ມັນຍັງເປັນວັນສາມັກຄີຕໍ່ສູ້ດ້ວຍເລືອດເປັນຕາຍນໍາກັນລະຫວ່າງ 2 ຊາດລາວ-ຫຽວດນາມ ອ້າຍນ້ອງທີ່ເປັນແວ່ນແຍງອັນເຫຼືອມໃສ ຂອງນໍ້າໃຈສູ້ຮົບຢ່າງພິລາດອາດຫານ, ບໍ່ຍອມຈໍານົນຂອງກອງທັບ ແລະ ປະຊາຊົນເມືອງທ່າແຂກ ກໍຄືການບັນຊາທີ່ເດັດດ່ຽວໜຽວແໜ້ນຂອງຄະນະບັນຊາ ປະກອບອາວຸດຂອງພວກເຮົາ ໂດຍແມ່ນປະທານ ສຸພານຸວົງ ເປັນຜູ້ນໍາໜ້າ, ມັນໄດ້ຝັງເລິກໃນດວງໃຈຂອງປະຊາຊົນລາວ ແລະ ຫຽວດນາມ ທີ່ຮັກຊາດຈົນກວ່າກາລະນານ.

  3. ເພື່ອເປັນການຈັດຕັ້ງຜັນຂະຫຍາຍມະຕິ XI ຂອງພັກ ຕິດພັນກັບ ມະຕິ VII ຂອງອົງຄະນະພັກນະຄອນຫຼວງວຽງຈັນ ແລະ ມະຕິຂອງພັກຂັ້ນຕົ້ນຕາມທິດຫັນປ່ຽນໃໝ່ຂອງພັກ ຢ່າງແຂງແຮງ ເລິກເຊິ່ງ ຮອບດ້ານ ທັງເປັນການຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາໃຫ້ປະກົດຜົນເປັນຈິງ.