ກອງປະຊຸມໃຫຍ່ໜ່ວຍຮາກຖານຊາວໜຸ່ມ ຄັ້ງທີ III
ໃນວັນທີ 04 ຕຸລາ 2024 ພະແນກພາຍໃນ ນະຄອນຫຼວງວຽງຈັນ ໄດ້ເປີດກອງປະຊຸມໃຫຍ່ຂອງໜ່ວຍຮາກຖານຊາວໜຸ່ມ ຄັ້ງທີ III ໂດຍເປັນປະທານຂອງສະຫາຍ ວິລະສອນ ພັນດານຸວົງ ເລຂາຊາວໜຸ່ມ ປປລ ໜ່ວຍຮາກຖານພະແນກພາຍໃນ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງສະຫາຍ ນ. ສຸມາລີ ທຳມະວົງ ເລຂາໜ່ວຍພັກ, ຫົວໜ້າພະແນກພາຍໃນ ມີສະຫາຍ ຫຸມແພງ ສີສົມບັດ ເລຂາຄະນະບໍລິຫານງານຊາວໝຸ່ມ ປປລ ນະຄອນຫຼວງວຽງຈັນ ແຂກຖືກເຊີນພາຍໃນຕຶກສຳນັກງານປົກຄອງ ນະຄອນຫຼວງວຽງຈັນ ແລະ ສະມາຊິກຊາວໜຸ່ມພາຍໃນພະແນກເຂົ້າຮ່ວມ.
ສະຫາຍ ນາງ ພິດສະນິກອນ ພຣະໄຊມະຫາຣາດ ຮອງເລຂາຊາວໜຸ່ມ ປປລ ໜ່ວຍຮາກຖານພະແນກພາຍໃນ ໄດ້ຜ່ານບົດສະຫຼຸບວ່າ: ໃນໄລຍະ 5 ປີຜ່ານມາອົງການຈັດຕັ້ງຊາວໜຸ່ມ ພວກເຮົາໄດ້ເອົາໃຈໃສ່ ແລະ ຖືເປັນບັນຫາສຳຄັນໃນວຽກງານສຶກສາອົບຮົມ ການເມືອງ-ແນວຄິດໃຫ້ສະມາຊິກ, ພາຍໃຕ້ການນຳພາ-ຊີ້ນຳ ຂອງຄະນະໜ່ວຍພັກ ພະແນກພາຍໃນນະຄອນຫຼວງວຽງຈັນ ໄດ້ນຳເອົາແນວທາງນະໂຍບາຍຂອງພັກ-ລັດ ເຊັ່ນ: ຂໍ້ກຳນົດ, ຄຳສັ່ງ, ແຈ້ງການ, ບົດແນະນຳ, ກົດລະບຽບ ແລະ ກົດໝາຍ ລົງເຜີຍແຜ່ຮ່ຳຮຽນໃຫ້ບັນດາສະມາຊິກຊາວໜຸ່ມ ໄດ້ຮັບຮູ້ຢ່າງກ້ວາງຂວາງ. ນອກຈາກນັ້ນແລ້ວ ກໍ່ຍັງໄດ້ເຂົ້າຮ່ວມຟັງປາຖະກະຖາເລົ່າມູນເຊື້ອວັນສຳຄັນຂອງພັກ-ຂອງຊາດ ທີ່ການຈັດຕັ້ງຂັ້ນເທິງ ແລະ ຄະນະໜ່ວຍພັກຈັດຂຶ້ນ ເຊັ່ນ: ວັນສ້າງຕັ້ງກອງທັບ, ວັນສ້າງຕັ້ງພັກ, ວັນສ້າງຕັ້ງຄະນະຊາວໜຸ່ມ ປະຊາຊົນ ປະຕິວັດລາວ, ວັນຊາດທີ 2 ທັນວາ, ວັນຢຶດອຳນາດ 23 ສິງຫາ ແລະອື່ນໆ, ຈໍານວນ 22 ຄັ້ງມີຜູ້ເຂົ້າຮ່ວມ 434 ເທື່ອຄົນ, ຍິງ 162 ເທື່ອຄົນ, ຜ່ານຂະບວນການເຊື່ອມຊືມ, ຮ່ຳຮຽນເອກະສານດັ່ງກ່າວເຮັດໃຫ້ ສະມາຊິກຊາວໜຸ່ມຢູ່ພະແນກພາຍໃນ ນະຄອນຫຼວງວຽງຈັນ.
ໃນໄລຍະຜ່ານມາ ຄະນະພ້ອມດ້ວຍສະມາຊິກຊາວໜຸ່ມພະແນກພາຍໃນ ນະຄອນຫຼວງວຽງຈັນ ໄດ້ເອົ¾ໃຈໃສ່ປັບ ປຸງການຈັດຕັ້ງໃຫ້ມີຄວາມໜັກແໜ້ນເຂັ້ມແຂງທາງດ້ານການເມືອງ ແລະ ມີຄວາມສາມັກຄີເປັນປຶກແຜ່ນ, ເຊິ່ງມັນສະແດງອອກໃນການຮ່ວມຊີວິດປະຈຳເດືອນເປັນປົກກະຕິ ແລະ ເພື່ອກວດກາຕີລາຄາຄືນການປະຕິບັດໜ້າທີ່ວຽກງານວິຊາສະເພາະກໍ່ຄືຂໍ້ແຂ່ງຂັນ 4 ບຸກຂອງຊາວໜຸ່ມລາວ, ພ້ອມນັ້ນກໍ່ໄດ້ຕໍານິສົ່ງຂ່າວເຊິ່ງກັນ ແລະ ກັນ, ເພື່ອພ້ອມກັນກ້າວໜ້າ, ການຈັດຕັ້ງກໍ່ໄດ້ເຫັນດີໄວ້ວາງໃຈແຕ່ງຕັ້ງໃຫ້ມີໜ້າທີ່ຮັບຜິດຊອບ ຂັ້ນຮອງຫົວໜ້າຂະແໜງ ມີ 7 ສະຫາຍ, ຍິງ 3 ສະຫາຍ ແລະ ກໍ່ສ້າງຂະຫຍາຍເຂົ້າເປັນສະມາຊິກພັກປະຊາຊົນປະຕິວັດລາວ ໄດ້ 7 ສະຫາຍ, ຍິງ 4 ສະຫາຍ.
ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາ ຄະນະບໍລິຫານງານ ຊປປລ ຮາກຖານພະແນກພາຍໃນ ນະຄອນຫຼວງວຽງຈັນ ຊຸດໃໝ່ ບົນພື້ນຖານຖືກຕ້ອງ ແລະສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ສະໝັກເລືອກຕັ້ງ 05 ສະຫາຍ ແລະ ເລືອກໄດ້ 03 ສະຫາຍ, ເປັນຍິງ 01 ສະຫາຍ ຄື:ສະຫາຍ ວິລະສອນ ພັນດານຸວົງ ເປັນເລຂາໜ່ວຍຮາກຖານ, ສະຫາຍ ນ. ພິດສະນິກອນ ພຣະໄຊມາຫາຣາດ ເປັນຮອງເລຂາໜ່ວຍຊາວໜຸ່ມຮາກຖານ ທັງເປັນປະທານກວດກາໜ່ວຍຊາວໜຸ່ມ ແລະ ສະຫາຍ ແສງສຸລີ ຄ້ຳພິລາວົງ ເປັນກຳມະການ.
ກອງປະຊຸມໃຫຍ່ ຍັງໄດ້ຮັບຟັງການໂອ້ລົມຈາກ ສະຫາຍ ນາງ ສຸມະລີ ທຳມະວົງ ກຳມະການພັກ, ເລຂາໜ່ວຍພັກ, ຫົວໜ້າພະແນກພາຍໃນ ນະຄອນຫຼວງວຽງຈັນ ແລະ ສະຫາຍ ຫຸມແພງສີສົມບັດ ເລຂາຄະນະບໍລິຫານງານປະຊາຊົນປະຕິວັດລາວ ເຊິ່ງທັງສອງສະຫາຍລ້ວນແລ້ວແຕ່ໄດ້ສະແດງຄວາມຍ້ອງຍໍຊົມເຊີຍຕໍ່ການນຳພາ-ຊີ້ນຳຂອງຄະນະບໍລິຫານງານ ຊປປລ ຮາກຖານພະແນກພາຍໃນ ນະຄອນຫຼວງວຽງຈັນຊຸດທີ່ຜ່ານມາ ທີ່ໄດ້ນຳພາຄະນະຊາວໜຸ່ມ, ສະມາຊິກຊາວໜຸ່ມທຸກຖ້ວນໜ້າປະຕິບັດພາລະບົດບາດ, ໜ້າທີ່ການເມືອງຂອງຕົນ ເຊິ່ງສາມາດຍາດໄດ້ຜົນສຳເລັດຫຼາຍດ້ານ.
