ກອງປະຊຸມໃຫ່ຍຄັ້ງທີ 9 ສະຫະພັນກໍາມະບານເມືອງ ໄຊເສດຖາ
ກອງປະຊຸມໃຫ່ຍຄັ້ງທີ 9 ຜູ້ແທນສະຫະພັນກໍາມະບານເມືອງ ໄຊເສດຖາ ໄດ້ໄຂຂື້ນໃນວັນທີ 25 ຕຸລາ 2024 ຢູ່ທີ່ ຫ້ອງວ່າການປົກຄອງເມືອງດັ່ງກ່າວ ໂດຍການເຂົ້າຮ່ວມຂອງສະຫາຍ ດາວເພັດ ອາລຸນ ປະທານສະຫະພັນກໍາມະບານ ນະຄອນຫຼວງວຽງຈັນ, ສະຫາຍ ນ. ວິໄລວອນ ຈັນທະລາຕີ ເຈົ້າເມືອງໄຊເສດຖາ ພ້ອມດ້ວຍຜູ້ແທນສົມບູນ ແລະ ແຂກຖືກເຊີນເຂົ້າຮ່ວມ.
ສະຫະພັນກໍາມະບານເມືອງ ໄຊເສດຖາ ແມ່ນອົງການຈັດຕັ້ງການເມືອງຫນື່ງ ມີພາລະບົດບາດເຕົ້າໂຮມຄວາມສາມັກຄີ ແລະ ປົກປ້ອງສິດຜົນປະໂຫຍດອັນຊອບທໍາ ໃນຖັນແຖວສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານ. ເຊີ່ງໃນໄລຍະ 5 ປີຜ່ານມາ ໄດ້ສໍາເລັດການປັບປຸງກົງ ຈັກການຈັດຕັ້ງ ແລະ ການເຄື່ອນໄຫວຂອງສະຫະພັນກໍາມະບານເມືອງຈາກ 5 ຫນ່ວຍງານເປັນ 3 ຫນ່ວຍງານ ແລະ ໄດ້ປັບປຸງຊັບຊ້ອນຫນ້າວຽກຂອງພະນັກງານຄືນໃຫມ່, ໄດ້ສໍາເລັດການເປີດກອງ ປະຊຸມໃຫ່ຍ ສະມາຊິກກໍາມະບານຮາກຖານທົ່ວເມືອງໄດ້ 23 ຮາກຖານ, ປັບປຸງການຈັດຕັ້ງກໍາມະບານໄດ້ 17 ຮາກຖານ, ສໍາເລັດການມອບກາປະທັບ ໃຫ້ກໍາມະບານຮາກຖານ ເພື່ອນໍາໃຊ້ເຂົ້າໃນການ ເຄື່ອນໄຫວວຽກງານກໍາມະບານຢູ່ ຮາກຖານ 36 ຮາກຖານ, ໄດ້ເອົາໃຈໃສ່ວຽກງານຂໍ້ແຂ່ງຂັນ 5 ເປັນເຈົ້າ ໂດຍສົມທົບກັບຄະນະກໍາມະບານແຕ່ລະຮາກຖານ ຖືເອົາການຈັດຕັ້ງປະຕິບັດ ຂໍ້ແຂ່ງຂັນ 5 ເປັນເຈົ້າ ເປັນບ່ອນອີງໃນການນໍາພາຄະນະກໍາມະບານຮາກຖານ ແລະ ສະມາຊິກກໍາມະບານ ໃນການ ເຄື່ອນໄຫວວຽກງານຂະບວນການຕ່າງໆ ເຮັດໃຫ້ໄດ້ຮັບໃບຢັ້ງຢືນ ແລະ ຮັບຮອງກໍາມະບານຮາກຖານ 5 ເປັນເຈົ້າໃນແຕ່ລະປີ ພ້ອມດຽວກັນນີ້ ຍັງໄດ້ເອົາໃຈໃສ່ວຽກງານປົກປ້ອງສິດ ແລະ ຜົນປະໂຫຍດອັນຊອບທໍາ ຂອງສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານ ເຊີ່ງໄດ້ຊຸກຍູ້ສ້າງສັນຍາແຮງງານບຸກຄົນໄດ້ 3.840 ຄົນ ແລະ ສັນຍາແຮງງານລວມຫມູ່ໄດ້ 4 ສະບັບ, ໄດ້ລົງຕິດຕາມ ກວດກາ ຊຸກຍູ້ການປະຕິບັດເງີນເດືອນພື້ນຖານ ( ຄ່າແຮງງານຂັ້ນຕໍ່າ ) ທີ່ລັດຖະບານປະກາດໃຊ້ໃນແຕ່ລະໄລຍະ ຢູ່ຫົວຫນ່ວຍແຮງງານພາກເອກະຊົນໄດ້ 25 ຄັ້ງ. ໃນພິທີ ຍັງໄດ້ປະດັບຫຼຽນກາກໍາມະບານລາວ, ມອບທຸງໄຊ ແລະ ເປີດປ້າຍກຽດຕິຍົດ 5 ເປັນເຈົ້າ ພ້ອມທັງ ໄດ້ປ່ອນບັດເລືອກເອົາຄະນະສະຫະພັນກໍາມະບານເມືອງຊຸດໃຫມ່ ເຊີ່ງສະຫມັກ 21 ສະຫາຍ ເລືອກເອົາ 19 ສະຫາຍ ໂດຍຜົນການປ່ອບັດ ໄດ້ເປັນເອກະພາບຮັບຮອງເອົາ ສະຫາຍ ບຸນພະຈິດ ມະໂນສານ ເປັນປະທານກໍາມະບານ ສະຫາຍ ເກດສະໜາ ນິວອນ ເປັນຮອງປະທານ ສະຫາຍ ນ. ພິມພອນ ລໍວັນໄຊ ເປັນຮອງປະທານ ທັງເປັນປະທານກວດກາ ສະຫາຍ ສຸພາລັກ ວົງໄຊ ເປັນຮອງປະທານກວດກາ ແລະ ສະຫາຍ ອານຸເດດ ພົມປິດາ ເປັນຄະນະກວດກາ.
