ພິທີແຫ່ຜາສາດເຜິ້ງ ໃນງານບຸນນະມັດສະການພຣະທາດຫຼວງວຽງຈັນ ໄດ້ດຳເນີນແຕ່ເວລາ 13:30 ນາທີ ຂອງມື້ຂຶ້ນ 14 ຄໍ່າ ເດືອນ 12 ລາວ ກົງກັບວັນທີ 14 ພະຈິກ 2024, ໂດຍໄດ້ເຕົ້າໂຮມກັນທີ່ວັດໜອງບອນ ແລ້ວແຫ່ເຂົ້າມາກົມມະລຽນທາດຫຼວງ 3 ຮອບ ເພື່ອເປັນການບູຊາ, ຄຸນພະພຸດ, ພະທຳ ແລະ ພະສົງ ໂດຍມີຂະບວນພະສົງອອກນຳໜ້າ ແລະ ການນຳພັກ-ລັດ ໂດຍການນໍາພາຂອງ ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພ້ອມດ້ວຍຂະບວນມວນຊົນ ຈາກຫຼາຍພາກສ່ວນ ເຂົ້າຮ່ວມແຫ່ຢ່າງຟົດຟື້ນມ່ວນຊື່ນ ເຕັມໄປດ້ວຍຄວາມຮັກແພງສາມັກຄີ ຂອງປວງຊົນລາວທັງຊາດ ພ້ອມທັງຮັກສາໄດ້ດ້ານວັດທະນະທຳ ແລະ ຮີດຄອງປະເພນີອັນດີງາມຂອງຊາດ.

        ປະເພນີແຫ່ຜາສາດເຜິ້ງ ເປັນອີກໜຶ່ງກິດຈະກຳທີ່ໄດ້ສືບທອດ ແລະ ປະຕິບັດກັນມາ ໃນງານບຸນນະມັດສະການພຣະທາດຫຼວງວຽງຈັນ ເປັນເວລາຫຼາຍກວ່າ 4 ສະຕະວັດຜ່ານມາ. ການແຫ່ຜາສາດເຜິ້ງ ແມ່ນໄດ້ຈັດຂຶ້ນທຸກໆປີ ແນໃສ່ເພື່ອສືບທອດເອກະລັກ ແລະ ປົກປັກຮັກສາຮີດຄອງປະເພນີອັນດີງາມຂອງລາວໄວ້ ໃຫ້ເຖິງເຊັ່ນລູກ-ຫຼານ, ໃນການແຫ່ຜາສາດເຜິ້ງ ຈະມີມວນຊົນຊາວລາວບັນດາເຜົ່າບໍ່ວ່າຈະເປັນຜູ້ເຖົ້າອາວຸໂສ, ຊາວໜຸ່ມຍິງ-ຊາຍ, ເດັກນ້ອຍ ກໍໄດ້ເຂົ້າຮ່ວມຢ່າງຟົດຟື້ນມ່ວນຊື່ນ ໂດຍຖືຜາສາດເຜິ້ງແຫ່ໄປຕາມຂະບວນ, ມີການປະສົມປະສານດ້ວຍສຽງຄັບ, ສຽງລໍາຈາກທ້ອງຖິ່ນຕ່າງໆ ທີ່ຟັງແລ້ວເປັນຕາສະອອນໃຈ ພ້ອມທັງຍັງມີການນຸ່ງຖືຂອງຊົນເຜົ່າຕ່າງໆ ສະແດງໃຫ້ເຫັນເຖິງການເຕົ້າໂຮມ ຄວາມສາມັກຄີຂອງປວງຊົນລາວບັນດາເຜົ່ານັ້ນເອງ.

       ການແຫ່ຜາສາດເຜິ້ງນັ້ນ ຈະແຫ່ 3 ຮອບອ້ອມພຣະທາດຫຼວງຢູ່ດ້ານໃນກົມມະລຽນ ແຕ່ລະຄົນແມ່ນໄດ້ນຳເອົາຜາສາດເຜິ້ງ ແລະ ດອກໄມ້ທູບທຽນຂອງຕົນນໍາໄປວາງໄວ້ອ້ອມຮອບຕີນພຣະທາດຫຼວງເພື່ອເປັນການບູຊາ, ອາທິຖານຕໍ່ໜ້າພຣະທາດຫຼວງ ແລະ ຂໍພອນຕາມຄວາມເຊື່ອຖືຂອງຊາວລາວເຮົາ ເຮັດໃຫ້ຂະບວນການແຫ່ຜາສາດເຜິ້ງ ໄດ້ຮັບຄວາມສົນໃຈຈາກບັນດານັກທ່ອງທ່ຽວທັງພາຍໃນ ແລະ ຕ່າງປະເທດ, ໃນແຕ່ລະປີມີນັກທ່ອງທ່ຽວເຂົ້າມາຮ່ວມ ແລະ ທ່ຽວຊົມຂະບວນການດັ່ງກ່າວ ເປັນຈຳນວນຫຼວງຫຼາຍ. ຈາກນັ້ນ, ຕໍ່ຈາກພິທີແຫ່ຜາສາດເຜິ້ງ ກໍຍັງມີພິທີທາງສາດສະໜາຕາມຄີດຄອງປະເພນີ້ທີ່ສືບທອດປະຕິບັດກັນມາຢ່າງດົນນານ.