ຈູດທຳລາຍຢາເສບຕິດຫລາຍລາຍການ ສະຫລອງວັນແຫ່ງຊາດຕ້ານຢາເສບຕິດ ຄົບຮອບ 23 ປີ
ອົງການປົກຄອງນະຄອນຫລວງວຽງຈັນ, ກອງບັນຊາການປ້ອງກັນຄວາມສະຫງົບ ນວ ສົມທົບກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບ ໄດ້ຈັດພິທີຈູດທຳລາຍຢາເສບຕິດ ເພື່ອສະເຫລີມສະ ຫລອງວັນແຫ່ງຊາດຕ້ານຢາເສບຕິດ ຄົບຮອບ 23 ປີ (ວັນທີ 12 ຕຸລາ 2001 – 12 ຕຸລາ 2024) ຂຶ້ນໃນວັນທີ 26 ຕຸລາ ນີ້ ທີ່ເດີ່ນດິນເປົ່າວ່າງບ້ານໂນນສະອາດ ເມືອງໄຊທານີ ນວ ໂດຍມີ ທ່ານ ອານຸພາບ ຕຸນາລົມ ຄະນະເລຂາທິການສູນກາງພັກ ເລຂາຄະນະພັກ ນວ ປະທານສະພາປະຊາຊົນ ນວ ປະທານປ້ອງກັນຊາດ-ປ້ອງຄວາມສະຫງົບ ນວ, ທ່ານ ພົນຕີ ຄໍາກິ່ງ ຜຸຍຫລ້າມະນີວົງ ຄະນະປະຈຳພັກ ຮອງລັດຖະມົນຕີກະຊວງ ປກສ ຫົວໜ້າກົມໃຫຍ່ຕຳຫລວດ ຜູ້ຊີ້ນໍາວຽກງານກວດກາ ແລະ ຄວບຄຸມຢາເສບຕິດກະຊວງ ປກສ, ມີພະເຖລານຸເຖລະ, ມີບັນດາອົງການຈັດຕັ້ງສາກົນ, ຜູ້ຕາງໜ້າຈາກກະຊວງ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ພົຈວ ບົວພັນ ຟອງມະນີ ຄະນະປະຈຳພັກ ເລຂາຄະນະພັກ ຫົວໜ້າກອງບັນຊາການປ້ອງກັນຄວາມສະຫງົບ ນວ ໄດ້ລາຍງານວ່າ: ໃນໄລຍະ 1 ປີຜ່ານມາ, ເຈົ້າໜ້າທີ່ປ້ອງກັນຄວາມສະຫງົບ (ປກສ) ນວ ໄດ້ເຮັດວຽກງານສະກັດກັ້ນ ແລະ ແກ້ໄຂບັນຫາຢາເສບຕິດໄດ້ທັງໝົດ 967 ເລື່ອງ, ກັກຜູ້ຖືກຫາໄດ້ຈຳນວນ 1,641 ຄົນ ຍິງ 187 ຄົນ. ໃນນັ້ນ, ຕ່າງປະເທດ 75 ຄົນ ຍິງ 2 ຄົນ ແລະ ໄດ້ຢຶດວັດຖຸເຄື່ອງຂອງກາງຈໍານວນຫລາຍລາຍການເປັນຕົ້ນແມ່ນ: ປະເພດຢາເສບຕິດຢາບ້າ ຈໍານວນ 15,549,234 ເມັດ, ຢາບົດມຸ່ນ 280 ກຣາມ, ຢາບ້າປຽກນໍ້າ (ເປື່ອຍ) 3 ກິໂລ ກັບ 3 ຖົງນ້ອຍ, ຢາໄອສ ຈຳນວນ 546 ກິໂລ 310.52 ກຣາມ 28 ຫໍ່, 170 ຖົງນ້ອຍ, ຢາອີ 2,281 ເມັດ, ຢາອີເມັດສີຂຽວ, ສີເຫຼືອງ, ສີບົວ ລວມມີ 284 ເມັດ, ຢາເອັມດີ 9 ກິໂລ ກັບ 500 ກຣາມ, ເຄຕາມິນ 4 ກິໂລ ກັບ 105.6 ກຣາມ 24 ຫໍ່ 154 ຖົງນ້ອຍ 1 ຊອງ, ເຮໂລອິນ 4 ກິໂລ ກັບ 716.3 ກຣາມ 110 ແທ່ງ 12 ຖົງນ້ອຍ, ຄັນຊາ 398 ກຣາມ 30 ຖົງນ້ອຍ, ຝິ່ນ 11 ກິໂລ ກັບ 500 ກຣາມ, ກ້ອນສີຂາວ, ສີຂຽວ, ສີມ່ວງ, ສີນໍ້າຕານ ລວມມີ 5,952.64 ກິໂລກຣາມ 5 ກ້ອນ 15 ຖົງນ້ອຍ, ຄໍລາເຈນປະສົມຢາເສບຕິດ 1,063 ຊອງ ກັບ 8 ຖົງ, ກາເຟປາຕີ້ 25 ຊອງ, ໂລໂຢດີປະສົມສານເສບຕິດ 176 ຊອງ, ແປ້ງຝຸ່ນປະສົມຜະລິດ ເປັນຢາເສບຕິດ ມີ 197 ກິໂລ 480 ກຣາມ 55 ຖົງ ນ້ອຍ, ສານເສບຕິດຊອງສີແດງ, ສີບົວ, ສີດຳ, ສີຂຽວ ລວມມີ 123 ຊອງ 1 ຖົງ, ສານໄນຕັດອອກຊາຍ 130 ບັ້ງ ກັບ 12 ຖັງ, ຢາສູບໄຟຟ້າ 64,273 ອັນ, ເມັດມະນີສີຂາວ, ສີນໍ້າຕານ ລວມມີ 10 ຖົງນ້ອຍ, ໃບກະທ້ອມ 677 ກິໂລ ກັບ 800 ກຣາມ, ນໍ້າກະທ້ອມ 366 ລິດ ກັບ 67 ຕຸກ, ຢາດີໄອ (ໃຊ້ປະສົມນໍ້າກະທ້ອມ) 2.097 ແກ້ວ. ປະເພດວັດຖຸມີຄ່າ: ເງິນສົດ (ກີບ) ຈໍານວນ 1,347,746,000 ກີບ, ເງິນສົດ (ບາດ) 7,388,090 ບາດ, ເງິນສົດ (ໂດລາ) 74,188 ໂດລາ, ເງິນສົດ (ຢວນ) 5,713 ຢວນ, ເງິນສົດ (ດົງ) 50,000,000 ດົງ, ເງິນສົດ (ວອນ) 11,000 ວອນ. ປະເພດພາຫະນະ, ອຸປະກອນ ແລະ ອາວຸດເສິກ: ລົດໃຫຍ່ ຈໍານວນ 93 ຄັນ, ລົດຈັກ 246 ຄັນ, ເຄື່ອງບົດຢາເສບຕິດ 2 ເຄື່ອງ, ເຄື່ອງອົບຢາເສບຕິດ 2 ເຄື່ອງ, ເຄື່ອງລີດຊອງຄໍລາເຈນ 10 ເຄື່ອງ, ເຄື່ອງປັ່ນ 1 ເຄື່ອງ, ປືນສັ້ນ 18 ບອກ ພ້ອມລູກ 166 ລູກ, ປືນລູກຊອງ 1 ບອກ ພ້ອມລູກ 52 ລູກ, ປືນອາກາ 2 ກະບອກ ພ້ອມລູກ 44 ລູກ, ປືນຍາວຊະນິດ M4 1 ບອກ ພ້ອມຊຸດແຕ່ງ 1 ຊຸດ, ລູກປືນຊະນິດ 5,56 ລູກ, ລູກປືນຊະນິດ 38 ມີ 268 ລູກ, ລູກປືນຊະນິດ 9 ມມ 259 ລູກ, ລູກປືນຊະນິດ 11 ມມ 150 ລູກ, ລູກປືນອາກາ 4 ລູກ, ລູກປືນຊະນິດ 45 ອໍໂຕ 4 ລູກ, ລູກປືນຊະນິດ 28 ມີ 1 ລູກ, ລູກປືນຊະນິດ 12.7 ມີລີ 1 ລູກ, ລະເບີດຄ້ວນ 1 ໜ່ວຍ, ໝາກແຕກ 5 ໜ່ວຍ ແລະ ອື່ນໆ.
ໃນພິທີຄັ້ງນີ້, ໄດ້ຈູດທໍາລາຍປະເພດຢາບ້າ ຈໍານວນ 2,515,231 ເມັດ ເທົ່າກັບ 301 ກິໂລ ກັບ 624 ກຣາມ, ຢາໄອສ 350.6 ກິໂລກຣາມ, ຢາອີ 5 ເມັດ ເທົ່າກັບ 2.7 ກຣາມ, ເຄຕາມິນ 1 ຫໍ່ ກັບ 2 ຖົງນ້ອຍ ເທົ່າກັບ 1.99 ກິໂລກຣາມ ລວມນໍ້າໜັກຢາເສບຕິດທັງ ໝົດ 652 ກິໂລ ກັບ 731.7 ກຣາມ. ນອກຈາກນີ້, ຍັງມີຢາສູບໄຟຟ້າ (ໄພລອດ) ຈໍານວນ 202 ແກັດ. ໃນນີ້, ມີແກັດເຕັມ ຈໍານວນ 176 ແກັດ, ແກັດບໍ່ເຕັມ ຈຳນວນ 26 ແກັດ ແລະ ແກັດທີ່ບໍ່ມີຢາສູບໄຟຟ້າ (ແກັດເປົ່າ) ຈຳນວນ 101 ແກັດ. ການຈູດ-ທຳລາຍຢາເສບຕິດໃນຄັ້ງນີ້ ຍັງສະແດງອອກເຖິງປະສິດທິຜົນໃນການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢູ່ ນວ ປີ 2024 ຕື່ມອີກ.
