ນະຄອນຫຼວງວຽງຈັນ ໄດ້ຈັດຕັ້ງປາຖະກະຖາ ແນວຄິດອັນສໍາຄັນ ຂອງສະຫາຍ ສີ ຈິນຜິງ ເລຂາທິການໃຫຍ່ພັກກອມມູນິຈີນ, ປະທານປະເທດແຫ່ງ ສປ ຈີນ ກ່ຽວກັບການລົບລ້າງຄວາມທຸກຍາກໃຫ້ຖືກເປົ້າໝາຍ ໃນວັນທີ 28 ພະຈິກ 2024 ທີ່ຫ້ອງວ່າການ ນະຄອນຫຼວງວຽງຈັນ. ເປັນກຽດປາຖະກະຖາຂອງທ່ານ ຊີ ຈີນທົງ ກຳມະການສຳຮອງສູນກາງພັກກອມມູນິດຈີນ, ເລຂາພັກບ້ານ-ນາຍບ້ານ 18 ຖໍ້າ, ເມືອງຮວາຢວນ, ແຂວງຫູໜານ, ສປ ຈີນ. ໃຫ້ກຽດເຂົ້າຮ່ວມຂອງທ່ານ ອານຸພາບ ຕຸນາລົມ ເລຂາທິການສູນກາງພັກ, ເລຂາຄະນະພັກ ນະຄອນຫຼວງວຽງຈັນ, ປະທານສະພາປະຊາຊົນ ນະ ຄອນຫຼວງວຽງຈັນ, ມີທ່ານ ອາດສະພັງທອງ ສີພັນດອນ ກຳມະການສູນກາງພັກ, ຮອງເລຂາຄະນະພັກ, ເຈົ້າຄອງນະຄອນຫຼວງວຽງຈັນ, ສະຫາຍ ບຸນເຫຼືອ ພັນດານຸວົງ ຮັກ ສາການຫົວໜ້າຄະນະພົວພັນຕ່າງປະເທດສູນກາງພັກ, ທ່ານນາງ ຟາງຫົງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ, ຕາງໜ້າຈາກຂັ້ນສູນກາງ, ພະນັກງານຫຼັກ ແຫຼ່ງຈາກນະຄອນຫຼວງວຽງຈັນ ພ້ອມດ້ວຍເລຂາພັກບ້ານ-ນາຍບ້ານ 09 ເມືອງເຂົ້າຮ່ວມ.
ທ່ານ ຊີ ຈີນທົງ ໄດ້ເລົ່າປະຫວັດຄວາມເປັນມາຂອງການລົບລ້າງຄວາມທຸກຍາກໃຫ້ຖືກເປົ້າໝາຍຂອງບ້ານ 18 ຖໍ້າ; ບ້ານສິບແປດຖ້ຳເມືອງຮົວຢວນກິ່ງແຂວງປົກຄອງຕົນເອງເຜົ່າມົ້ງ ເຜົ່າຖູເຈ່ຍຊ່ຽງຊີແຂວງຫູໜານຕັ້ງຢູ່ລະຫວ່າງຖ້ຳຫີນຍ້ອຍທຳມະຊາດ 18 ຖ້ຳ, ຫ່າງຈາກເທດສະບານເມືອງ 34 ກິໂລແມັດ, ແລະຫ່າງຈາກນະຄອນສາງຊ່າ ເທດສະບານແຂວງ 416 ກິໂລແມັດ. ເນື້ອທີ່ດິນປູກຝັງສະເລ່ຍຕໍ່ຫົວຄົນຊາວບ້ານມີບໍ່ຮອດ 0,06 ເຮັກຕາ, ປີ 2013 ລາຍໄດ້ສະເລ່ຍຕໍ່ຄົນຕໍ່ປີມີພຽງແຕ່ 1,668 ຢວນ, ເທົ່າກັບບໍ່ຮອດ 1 ສ່ວນ 5 ຂອງລາຍໄດ້ສະເລ່ຍຕໍ່ຫົວຄົນຂອງຊາວກະສິກອນໃນທົ່ວປະເທດຈີນ, ຈຶ່ງເປັນບ້ານທຸກຍາກທີ່ສຸດ.
ວັນທີ 3 ພະຈິກ 2013, ທ່ານ ສີ ຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ ໄດ້ເດີນທາງໄປຢ້ຽມຢາມແລະເຮັດວຽກບ້ານສິບແປດຖ້ຳເພື່ອເກັບກຳສະພາບການຜະລິດ ແລະການດຳລົງຊີວິດຂອງປະຊາຊົນຢູ່ເຂດພູດອຍທີ່ທຸກຍາກ. ເພິ່ນຈັບປາຍເບິ່ງຜ້າຫົ່ມ,ກວດເບິ່ງໄຫເຂົ້າ, ເຮືອນຄົວ, ນັ່ງອ້ອມເຕົາໄຟໂອ້ລົມກັບຊາວບ້ານຢ່າງໃກ້ຊິດ. ເພິ່ນໃຫ້ກຳລັງໃຈແກ່ຄົນທັງຫຼາຍຈົ່ງເພີ່ມຄວາມໝັ້ນໃຈ, ປ່ຽນແປງຊີວິດການເປັນຢູ່ຂອງຕົນດ້ວຍສອງຝາມືຢ່າງດຸໝັ່ນ. ຢູ່ລານຕາກເຂົ້າຂອງທ່ານຊືເສີງຟູ້ ຊາວບ້ານສິບແປດຖ້ຳ, ທ່ານ ສີ ຈິ້ນຜິງ ໄດ້ສະເໜີແນວຄິດ “ຫຼຸດຜ່ອນຄວາມທຸກຍາກຢ່າງຖືກເປົ້າໝາຍ” ເປັນຄັ້ງທຳອິດ.
“ໃນເວລາຫຼຸດຜ່ອນຄວາມທຸກຍາກ, ຢ່າຮ້ອງແຕ່ຄຳຂວັນລ້າໆ ແລະ ຢ່າຕັ້ງເປົ້າໝາຍສູງເກີນໄປແບບບໍ່ສອດຄ່ອງກັບຄວາມເປັນຈິງ. ສ່ວນບັ້ນ ຫຼຸດຜ່ອນຄວາມທຸກຍາກນັ້ນ, ແມ່ນຕ້ອງຕິດແທດກັບຄວາມເປັນຈິງ, ເສີມຂະຫຍາຍທ່າແຮງຂອງທ້ອງຖິ່ນ. ສຳລັບການຊີ້ນຳຕາມທຸກປະເພດ, ຫຼຸດຜ່ອນຄວາມທຸກຍາກຢ່າງຖືກເປົ້າໝາຍ,ໜຶ່ງແມ່ນການພັດທະນາການຜະລິດ, ເວົ້າຕາມຄວາມຈິງແລ້ວ, ຈະພັດທະນາຫຍັງໄດ້? ຕ້ອງປະຕິບັດຢ່າງແທ້ຈິງ. ອີກອັນໜຶ່ງ ໃນດ້ານການບໍລິການສາທາລະນະ, ສຳລັບບ້ານທຸກຍາກຄືແບບນີ້ ຄວນໃຫ້ການຮັບປະກັນອັນໃດ? ຕ້ອງໃຫ້ການຮັບປະກັນອັນນັ້ນຢ່າງແທ້ຈິງ. ອັນທີສາມ, ແມ່ນຈະເຮັດສິ່ງໃດແດ່ໃຫ້ຄົນຮຸ່ນຕໍ່ໄປ. ຕາມຂ້າພະເຈົ້າເຫັນວ່າ ນັບແຕ່ນີ້ໄປຈົນຮອດກ່ອນປີ2020 ຕ້ອງເຮັດວຽກງານເຫຼົ່ານີ້ໃຫ້ເປັນຮູບປະທຳກໍໄດ້ແລ້ວ.”
“ຕິດແທດກັບຄວາມເປັນຈິງ, ເສີມຂະຫຍາຍທ່າແຮງຂອງທ້ອງຖິ່ນ, ຊີ້ນຳຕາມທຸກປະເພດ, ຫຼຸດຜ່ອນຄວາມທຸກຍາກຢ່າງຖືກເປົ້າໝາຍ”. ຄຳຊີ້ນຳທີ່ສຳຄັນດັ່ງກ່າວຂອງທ່ານສີຈິ້ນຜິງ ແມ່ນທິດທາງລວມຂອງວຽກງານຫຼຸດຜ່ອນຄວາມທຸກຍາກ ເຊິ່ງໄດ້ກະຕຸ້ນຈິດໃຈຂອງຊາວບ້ານສິບແປດຖ້ຳ. ເດືອນມັງກອນປີ 2014, ຄະນະພັກເມືອງຮົວຢວນໄດ້ສັບຊ້ອນພະນັກງານສະມາຊິກພັກທີ່ມີປະສົບການຈຳນວນ 5 ຄົນປະກອບເປັນໜ່ວຍງານຫຼຸດຜ່ອນຄວາມທຸກຍາກຢ່າງຖືກເປົ້າໝາຍ ເຊິ່ງເປັນການເປີດບັ້ນຫຼຸດຜ່ອນຄວາມທຸກຍາກຢ່າງຖືກເປົ້າໝາຍຢູບ້ານສິບແປດຖ້ຳ.
ກ່ອນອື່ນໝົດ, ທາງບ້ານໄດ້ວາງແຜນຫຼຸດຜ່ອນຄວາມທຸກຍາກຢ່າງຖືກເປົ້າໝາຍ, ຖືເອົາ 5 ອຸດສາຫະກໍາໃຫຍ່ຄືການປູກຝັງ, ການປັກແສ່ວເຜົ່າມົ້ງ, ການເຄື່ອນຍ້າຍແຮງງານ, ການທ່ອງທ່ຽວ, ແລະບໍ່ນ້ຳຢູ່ເຂດພູດອຍເປັນທິດທາງຈຸດສຸມເພື່ອຫຼຸດຜ່ອນຄວາມທຸກຍາກ. ອຸດສາຫະກຳທີໜຶ່ງແມ່ນການປູກຝັງ. ແນໃສ່ແກ້ໄຂບັນຫາທີ່ບ້ານສິບແປດຖ້ຳມີຄົນຫຼາຍແຕ່ມີດິນປູກຝັງໜ້ອຍ, ໄດ້ຂໍໂອນຖ່າຍສິດນຳໃຊ້ທີ່ດິນໃນເນື້ອທີ່ປະມານ 67 ເຮັກຕານຳຕາແສງໃກ້ຄຽງເພື່ອສ້າງເປັນຖານການຜະລິດໝາກກີວີຄຸນນະພາບດີ. ໃນລະດູໃບໄມ້ປົ່ງປີ 2017, ຕົ້ນກີວີເປັນໝາກຄັ້ງທຳອິດ, ສ້າງລາຍຮັບຈາກການຈຳໜ່າຍໄດ້5ລ້ານຢວນ, ຊາວບ້ານໄດ້ຮັບເງິນປັນຜົນເຖິງ 1,000 ຢວນຕໍ່ຄົນ. ນອກນີ້, ທາງບ້ານໄດ້ສ້າງຕັ້ງສະຫະກອນເຜີຍແຜ່ວິທີການປູກຕົ້ນຄາເມເລຍໃນເນື້ອທີ່ 33 ເຮັກຕາ, ຜະລິດນ້ຳມັນຄາເມເລຍຍີ່ຫໍ້ບ້ານສິບແປດຖ້ຳ ເຊິ່ງໄດ້ຮັບປະກັນການສ້າງລາຍຮັບເພີ່ມໃຫ້ຊາວບ້ານຢ່າງໝັ້ນທ່ຽງ.
ອຸດສາຫະກຳທີສອງແມ່ນການປັກແສ່ວເຜົ່າມົ້ງ, ນີ້ແມ່ນສີມືອັນຍອດຍິ່ງຂອງແມ່ຍິງບ້ານສິບແປດຖ້ຳ. ໜ່ວຍງານຫຼຸດຜ່ອນຄວາມທຸກຍາກໄດ້ນຳພາຊາວບ້ານສ້າງຕັ້ງສະຫະກອນເຄື່ອງປັກແສ່ວເຜົ່າມົ້ງ, ເຮັດໃຫ້ແມ່ຍິງທີ່ເຝົ້າເຮືອນ ຈຳນວນ 62 ຄົນ ສາມາດປະກອບອາຊີບຢູ່ພາຍໃນບ້ານ.
ອຸດສາຫະກຳທີສາມແມ່ນເສດຖະກິດແຮງງານ. ທາງບ້ານໄດ້ເພີ່ມທະວີການເຝິກອົບຮົມສີມືແຮງງານໃຫ້ຊາວບ້ານ, ໂດຍໄດ້ຕັ້ງໜ້າຈັບຄູ່ຮ່ວມມືກັບຕະຫຼາດແຮງງານນະຄອນເຊິ່ນເຈີ້ນ, ແຂວງເຈີ້ຈ່ຽງ, ແຂວງຈ່ຽງຊູ. ປີ 2022, ແຮງງານທັງໝົດ 224 ຄົນໃນທົ່ວບ້ານໄດ້ບັນລຸການປະກອບອາຊີບແບບເຄື່ອນຍ້າຍ, ສ້າງລາຍຮັບເພີ່ມຂຶ້ນ6ລ້ານກວ່າຢວນ.
ອຸດສາຫະກຳທີສີ່ແມ່ນການທ່ອງທ່ຽວຊົນນະບົດ. ບ້ານສິບແປດຖ້ຳໄດ້ສຸມໃສ່ເອກະລັກພິເສດຂອງບ້ານເຜົ່າມົ້ງ ໂດຍໄດ້ດຳເນີນການດັດສ້າງເຮືອນຊານຊາວບ້ານຈຳນວນ 239 ຄອບຄົວ ແລະ ປະຕິບັດໂຄງການ “ສ້ອມແປງຫ້ອງນ້ຳ”, ຂະຫຍາຍທາງຍ່າງພາຍໃນບ້ານຍາວ 4,8 ກິໂລແມັດໃຫ້ກວ້າງອອກ, ທຸກໆຄອບຄົວມີນ້ຳປະປາ ແລະ ໄຟຟ້າໃຊ້. ໂຮງຮຽນປະຖົມ ແລະ ສຸກສາລາບ່ອນເກົ່າຂອງບ້ານໄດ້ປັບປຸງໃຫ້ໃໝ່ອ່ຽມ, ຈຸດບໍລິການການຄ້າເອເລັກໂຕນິກ, ໂຮງໄປສະນີ ແລະທະນາຄານບ້ານໄດ້ສ້າງສຳເລັດຕາມລຳດັບ. ສັນຍານອິນເຕີເນັດ WiFi ລະບົບ 5G ໄດ້ປົກຄຸມທົ່ວບ້ານ. ບ້ານສິບແປດຖ້ຳທີ່ໄດ້ປ່ຽນໂສມໜ້າໃໝ່ຢ່າງສວຍງາມນັ້ນໄດ້ດຶງດູດນັກທ່ອງທ່ຽວເປັນຈຳນວນຫຼວງຫຼາຍ ເຊິ່ງ ພາໃຫ້ຊາວບ້ານຈຳນວນ 389 ຄົນປະກອບການບໍລິການທ່ອງທ່ຽວແລະອຸດສາຫະກຳທີ່ກ່ຽວຂ້ອງ, ອາຫານເຜົ່າມົ້ງທີ່ແຊບຊ້ອຍເຊັ່ນ: ສາລີສົ້ມ, ຊີ້ນແຫ້ງຊ່ຽງຊີ່, ປານາເຂົ້າແລະອື່ນໆ ໄດ້ເຮັດໃຫ້ໂຮມສະເຕ 10 ກວ່າແຫ່ງໃນທົ່ວບ້ານມີນັກທ່ອງທ່ຽວມາໃຊ້ບໍລິການເຕັມທຸກແຫ່ງ.
ປີ 2021, ບ້ານສິບແປດຖ້ຳໄດ້ຕ້ອນຮັບນັກທ່ອງທ່ຽວ5ແສນເທື່ອຄົນ, ໄດ້ຖືກປະກາດເປັນແຫຼ່ງທ່ອງທ່ຽວແຫ່ງຊາດລະດັບ 5A, ກາຍເປັນສະຖານທີ່ທ່ອງທ່ຽວປະ ຫວັດສາດປະຕິວັດໃນຍຸກໃໝ່.
ອຸດສາຫະກຳທີຫ້າແມ່ນບໍ່ນ້ຳ. ທາງບ້ານໄດ້ອະນຸຍາດໃຫ້ວິສາຫະກິດລົງທຶນສ້າງຕັ້ງໂຮງງານນ້ຳດື່ມ, ສາມາດຜະລິດນ້ຳດື່ມໄດ້ 80000 ຕຸກຕໍ່ມື້. ແຕ່ລະປີສາມາດແບ່ງປັນຜົນກຳໄລໃຫ້ລວມບ້ານໄດ້ເຖິງ 6 ແສນກວ່າຢວນ.
ພາຍໃຕ້ການຊ່ວຍເຫຼືອຢ່າງຕໍ່ເນື່ອງຈາກໜ່ວຍງານຫຼຸດຜ່ອນຄວາມທຸກຍາກ3ຊຸດ, ບ້ານສິບແປດຖ້ຳໄດ້ປະຕິບັດຕາມທິດທາງຫຼຸດຜ່ອນຄວາມທຸກຍາກຢ່າງຖືກເປົ້າໝາຍຂອງທ່ານສີຈິ້ນຜິງ, ສຸມໃສ່ຄຳວ່າ “ຖືກເປົ້າໝາຍ”, ໂດຍໄດ້ຈຳແນກເປົ້າໝາຍທຸກຍາກ, ພັດທະນາອຸດສາຫະກຳເສົາຄ້ຳ, ປັບປຸງຍົກລະດັບພື້ນຖານໂຄງລ່າງ, ພັດທະນາວຽກງານເພື່ອຊີວິດການເປັນຢູ່ຂອງປະຊາຊົນ ແລະປະດິດສ້າງກົນໄກຫຼຸດຜ່ອນຄວາມທຸກຍາກຢ່າງຖືກເປົ້າໝາຍ, ບັນລຸການຫັນປ່ຽນ ຈາກການຊ່ວຍເຫຼືອແບບ“ການໃຫ້ເລືອດ” ໄປສູ່ການຊ່ວຍເຫຼືອແບບ “ການຜະລິດເລືອດ”. ສາມາດບຸກເບີກເສັ້ນທາງແຫ່ງການລຶບລ້າງຄວາມທຸກຍາກແລະສ້າງຄວາມຮັ່ງມີຂຶ້ນທີ່ອຸດສະຫະກຳພັດທະນາຢ່າງຈະເລີນ, ພື້ນຖານໂຄງລ່າງດີເລີດ, ມີລະດັບສູງ ແລະມີການຮັບປະກັນທີ່ດີ, ປະຊາຊົນມີຊີວິດການເປັນຢູ່ດີຂຶ້ນ.
ເມື່ອສິ່ງແວດລ້ອມພາຍໃນບ້ານດີຂຶ້ນ, ມີໂອກາດຫຼາຍຂຶ້ນແລ້ວ, ຊ່າວໜຸ່ມທີ່ອອກໄປເຮັດວຽກຢູ່ຕ່າງຖິ່ນກໍເລີ່ມພາກັນກັບຄືນມາບ້ານເກີດ. ທ້າວ ຊືຄ່າງ ນັກສຶກສາທີ່ກັບຄືນມາສ້າງທຸລະກິດຢູ່ບ້ານເກີດ, ໄດ້ນຳໃຊ້ຕິກຕ໋ອກໂຄສະນາຂາຍຜະລິດຕະພັນກະສິກຳທີ່ມີເອກະລັກພິເສດ, ຊ່ວຍແກ້ໄຂບັນຫາຊ່ອງທາງການຈຳໜ່າຍໃຫ້ແກ່ຊາວບ້ານອ້ອມຂ້າງໄດ້ເປັນຈຳນວນຫຼວງຫຼາຍ. ທ້າວໂຫຼງຊ່ຽນລານ ຄົນຂີ້ເຫຼົ້າໃນເມື່ອກ່ອນໄດ້ກາຍເປັນລາຊາລ້ຽງເຜີ້ງ, ຫຼັງຈາກຫຼຸດພົ້ນອອກຈາກຄວາມທຸກຍາກແລະຮັ່ງມີຂຶ້ນແລ້ວ ລາວໄດ້ສ້າງຄອບຄົວ, ພ້ອມທັງໄດ້ລູກສາວຜູ້ໜຶ່ງໃນປີ 2020 ໂດຍໄດ້ຕັ້ງຊື່ວ່າ ໂຫຼງຊືເອີ່ນ ເຊິ່ງມີຄວາມໝາຍວ່າຮູ້ບຸນຄຸນ. ບ້ານສິບແປດຖ້ຳໄດ້ຈັດງານນັດພົບຄູ່ບ່າວສາວຢ່າງຕໍ່ເນື່ອງ, ເຮັດໃຫ້ຊາວໜຸ່ມແກ່ 42ຄົນຫຼຸດພົ້ນຈາກຄວາມເປັນໂສດ, ດັດຊະນີຄວາມສຸກຂອງຊາວບ້ານໄດ້ເພີ່ມຂຶ້ນຢ່າງຫຼວງຫຼາຍ, ຊີວິດການເປັນຢູ່ນັບມື້ນັບດີຂຶ້ນ.
ເດືອນກຸມພາປີ 2017, ບ້ານສິບແປດຖ້ຳໄດ້ບັນລຸເປົ້າໝາຍລຶບລ້າງຄວາມ ທຸກຍາກແລ້ວນຳໜ້າປະຕິບັດຍຸດທະສາດພັດທະນາຊົນນະບົດໃຫ້ຈະເລີນ. ປີ 2022, ລາຍໄດ້ສຸດທິສະເລ່ຍຕໍ່ຫົວຄົນຂອງປະຊາຊົນໃນທົ່ວບ້ານໄດ້ເພີ່ມຈາກ 1,668 ຢວນ ເມື່ອປີ 2013 ຂຶ້ນເປັນ 23,505 ຢວນ. ເສດຖະກິດລວມໝູ່ຂອງບ້ານໄດ້ຈາກ0ເມື່ອປີ 2013 ເພີ່ມຂຶ້ນເປັນເປັນ 3,8 ລ້ານຢວນ. ວັນທີ 25 ກຸມພາ 2021, ສູນກາງພັກ ແລະ ລັດຖະບານຈີນໄດ້ມອບລາງວັນຕົວແບບລຶບລ້າງຄວາມທຸກຍາກທົ່ວປະເທດໃຫ້ແກ່ບ້ານສິບແປດຖ້ຳ. ນອກນີ້, ບ້ານສິບແປດຖ້ຳຍັງໄດ້ຮັບນາມມະຍົດຫຼາຍຢ່າງເຊັ່ນ: ການຈັດຕັ້ງຮາກຖານພັກກ້າວໜ້າທົ່ວປະເທດ, ສູນສາທິດການສຶກສາອົບຮົມລັດທີຮັກຊາດທົ່ວປະເທດ,ສູນສຶກສາອົບຮົມຊາວໜຸ່ມ-ເຍົາວະຊົນທົ່ວປະເທດ, ບ້ານສິວິໄລທົ່ວປະເທດ, ບ້ານຕົວແບບຄຸ້ມຄອງຊົນນະບົດທົ່ວປະເທດ, ສູນແລກປ່ຽນບົດຮຽນລຶບລ້າງຄວາມທຸກຍາກທົ່ວປະເທດ ເປັນຕົ້ນ.
ປີ 2016, ໃນກອງປະຊຸມຄັ້ງທີ4ຂອງສະພາປະຊາຊົນແຫ່ງຊາດຈີນຊຸດທີ 12, ທ່ານສີຈິ້ນຜິງ ໄດ້ເອົາໃຈໃສ່ອີກຄັ້ງໜຶ່ງຕໍ່ສະພາບຫຼ້າສຸດຂອງການຫຼຸດຜ່ອນຄວາມທຸກຍາກຢ່າງຖືກເປົ້າໝາຢູ່ບ້ານສິບແປດຖ້ຳ, ເມື່ອໄດ້ຮູ້ວ່າ ປະຊາຊົນບ້ານນີ້ມີຊີວິດການເປັນຢູ່ນັບມື້ນັບດີຂຶ້ນ, ເພິ່ນໄດ້ຊີ້ໃຫ້ເຫັນຢ່າງເລິກເຊິ່ງວ່າ: ການລຶບລ້າງຄວາມທຸກຍາກບໍ່ແມ່ນຈຸດໝາຍປາຍທາງ, ແຕ່ເປັນຈຸດເລີ່ມຕົ້ນແຫ່ງຊີວິດໃໝ່ ແລະການສູ້ຊົນຄັ້ງໃໝ່. ໃນຖານະເປັນສະຖານທີ່ສັນຍາລັກປະຫວັດສາດການປະຕິວັດໃນຍຸກໃໝ່, ບ້ານສິບແປດຖ້ຳບໍ່ພຽງແຕ່ໄດ້ສ້າງສິ່ງມະຫັດສະຈັນໃນປະຫວັດການພັດທະນາພັນປີຂອງບ້ານເຜົ່າມົ້ງກິ່ງແຂວງຊ່ຽງຊີ່, ແລະສ້າງແບບຢ່າງທີ່ມີຊີວິດຊີວາຂອງບັ້ນລຶບລ້າງຄວາມທຸກຍາກເທົ່ານັ້ນ, ບ້ານນີ້ຍັງພວມພະຍາຍາມສູ້ຊົນສ້າງໃຫ້ເປັນເຂດສາທິດພັດທະນາຊົນນະບົດໃຫ້ຈະເລີນຂອງເຂດທີ່ພົ້ນທຸກ, ຕັ້ງໜ້າຄົ້ນຫາບົດຮຽນທີ່ດີ ແລະເສັ້ນທາງທີ່ດີດ້ານການພັດທະນາຊົນນະບົດໃຫ້ຈະເລີນທີ່ສາມາດຮຽນແບບໄດ້, ສາມາດເຜີຍແຜ່ໃຫ້ກວ້າງຂວາງອອກໄປ.
ປີ 2021, ໜ່ວຍງານພັດທະນາຊົນນະບົດໃຫ້ຈະເລີນຊຸດທຳອິດໄດ້ຮັບໜ້າທີ່ໂດຍສະຫຼຸບບົດຮຽນອັນປະເສີດໃນໄລຍະຜ່ານມາ, ຈະສືບຕໍ່ຍຶດໝັ້ນພັດທະນາອຸດສາຫະກຳທີ່ມີເອກະລັກພິເສດ, ສືບທອດເອກະລັກເກົ່າແກ່ຂອງເຂດຊົນເຜົ່າສ່ວນໜ້ອຍ, ພັດທະນາຊັບພະຍາກອນທຳມະຊາດສີຂຽວຕາມເງື່ອນໄຂເອື້ອອຳນວຍຂອງທ້ອງຖິ່ນ. ຊຸກຍູ້ການພັດທະນາອຸດສາຫະກຳ, ຊັບພະຍາກອນມະນຸດ, ວັດທະນະທຳ, ສິ່ງແວດລ້ອມທຳມະຊາດ, ການຈັດຕັ້ງຊົນນະບົດໃຫ້ຈະເລີນ, ມຸ່ງໜ້າກ້າວໄປສູ່ຄວາມຮັ່ງມີຮ່ວມກັນ.
“ພາຍໃຕ້ການຊີ້ນຳຈາກທິດທາງຍຸດທະສາດຫຼຸດຜ່ອນຄວາມທຸກຍາກ ຢ່າງຖືກເປົ້າໝາຍ, ການຫຼຸດພົ້ນຈາກຄວາມທຸກຍາກຢ່າງສຳເລັດຜົນຂອງບ້ານສິບແປດຖ້ຳເປັນພາບຫຍໍ້ໜຶ່ງຂອງຈີນທີ່ເປີດບັ້ນລຶບລ້າງຄວາມທຸກຍາກຢ່າງຮອບດ້ານໃນທົ່ວປະເທດ, ເຊິ່ງໄດ້ສ່ອງແສງໃຫ້ເຫັນຢ່າງເຕັມສ່ວນເຖິງກຳລັງແຮງສັດຈະທຳແລະກຳລັງແຮງອັນຍິ່ງໃຫຍ່ດ້ານພຶດຕິກຳຂອງແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກ ໃໝ່. ຂ້າພະເຈົ້າເຊື່ອໝັ້ນວ່າ, ມຸ່ງໜ້າກ້າວເດີນໄປຕາມທິດຊີ້ນຳຂອງທ່ານສີຈິ້ນຜິງບົນເສັ້ນທາງຊີ້ນຳຕາມກອງປະຊຸມໃຫຍ່ຄັ້ງທີ 20 ຂອງພັກ, ກໍ້ແຂນເສື້ອຂຶ້ນເຮັດວຽກຢ່າງຫ້າວຫັນ ແລະ ເຮັດໄປວຽກຕໍ່ວຽກຢ່າງບໍ່ລົດລະ, ບ້ານສິບແປດຖ້ຳຍ່ອມຈະພັດທະນານັບມື້ນັບດີຂຶ້ນບົນຂະບວນການໃໝ່ແຫ່ງການຊຸກຍູ້ການພັດທະນາຊົນນະບົດໃຫ້ຈະເລີນ.”