ຄະນະໂຄສະນາອົບຮົມນະຄອນຫຼວງວຽງຈັນ ໄດ້ຈັດພິທີປາຖະກະຖາລະນຶກວັນເກີດປະທານສຸພານຸວົງ ຄົບຮອບ 115 ປີ (13/07/1909-13/07/2024), ວັນເຊັນສົນທິ ສັນ ຍາມິດຕະພາບ-ການຮ່ວມມື ຄົບຮອບ 47 ປີ (18/07/1977-18/07/2024) ແລະ ການສ້າງຕັ້ງສາຍພົວ ພັນການທູດລາວ-ຫວຽດນາມ ຄົບຮອບ 62 ປີ (05/09/1962-05/09/2024), ໃນວັນທີ 18 ກໍລະກົດ ທີ່ຫ້ອງວ່າການປົກຄອງ ນວ.
ຈຸດປະສົງຂອງການປາຖະກະຖາ ເພື່ອໃຫ້ສະມາຊິກພັກ, ພະນັກງານຫຼັກແຫຼ່ງຂອງນະຄອນຫຼວງວຽງຈັນຮັບຮູ້, ເຂົ້າໃຈ ແລະ ກໍາແໜ້ນຂະບວນການຕໍ່ສູ້ຕ້ານກັບຈັກກະພັດຜູ້ຮຸກຮານ ແລະ ໃຫ້ຮູ້ເຖິງ ສາຍພົວພັນອັນເປັນມູນເຊື້ອແຫ່ງຄວາມສາມັກຄີພິເສດ ລະຫວ່າງສອງປະເທດ ລາວ-ຫວຽດນາມ-ຫວຽດ ນາມ-ລາວ ທີ່ໄດ້ຮ່ວມສໍາພັນສູ້ຮົບ, ຮ່ວມຂຸມຄອງດຽວກັນ, ຄຽງບ່າຄຽງໄຫຼ່ກັນລຸກຂຶ້ນຈາກການກົດຂີ່ຂູດຮີດ ຂອງພວກສັກດີນາຕ່າງດ້າວ, ສອງປະເທດ ໄດ້ຊ່ວຍເຫຼືອຊຶ່ງກັນ ແລະ ກັນ ໃນໄລຍະຕໍ່ສູ້ກູ້ຊາດ ຈົນເຖິງປັດຈຸບັນ.
ປາຖະກະຖາໂດຍ ສະຫາຍ ນາງ ວິລະວອນ ພັນທະວົງ ຄະນະປະຈໍາພັກ, ຮອງຫົວໜ້າຄະນະໂຄສະນາອົບຮົມສູນກາງພັກ. ມີບັນດາສະຫາຍກໍາມະການພັກ ນວ, ຫົວໜ້າພະແນກການການ, ເລຂາ-ຮອງເລຂາເມືອງ, ຄະນະພັກເມືອງ ແລະ ຫົວໜ້າໂຄສະນາອົບຮົມ ທັງ 9 ຕົວເມືອງ ພ້ອມດ້ວຍແຂກຖືກເຊີນພາຍໃນ ນວ.
ສະຫາຍ ນາງ ວິລະວອນ ພັນທະວົງ ກ່າວບາງຕອນທີ່ສໍາຄັນວ່າ: ປະທານ ສຸພານຸວົງ ເກີດວັນທີ 13 ກໍລະກົດ 1909 ທີ່ຫຼວງພະບາງ ໃນຄອບຄົວເຊື້ອເຈົ້າ, ເປັນໂອຣົດຂອງເຈົ້າມະຫາອຸປະຣາດບຸນຄົງ ແລະ ໝ່ອມຄໍາອ້ວນ ມີເອື້ອຍ 2 ຄົນ ຄື: ເຈົ້າຍິງທະວີວັນ ແລະ ເຈົ້າຍິງຈິນດາ ຣັດສະໝີ, ມີອ້າຍຕ່າງມານດາ 2 ຄົນ ຄື: ເຈົ້າເພັດຊະຣາດ ແລະ ເຈົ້າສຸວັນນະພູມມາ. ປະທານສຸພານຸວົງ ແມ່ນຜູ້ນຳສູງສຸດ ຂອງພັກ ແລະ ລັດ ຄົນໜຶ່ງທີ່ຕິດພັນກັບຂະບວນການປະຕິວັດ, ເພິ່ນໄດ້ຮ່ວມກັບຜູ້ນໍາຄົນອື່ນໆ ນໍາພາຂະບວນການຕໍ່ສູ້ປົດປ່ອຍຊາດ ກໍຄື ການປົກປັກຮັກສາ ແລະ ສ້າງສາພັດທະນາປະເທດຊາດ, ປະທານ ສຸພານຸວົງ ເປັນເຈົ້າຊາຍແດງ, ເປັນສັນຍາລັກຂອງຄວາມສາມັກຄີ, ເປັນວິສາວະກອນເອກຂອງປະເທດລາວ ແລະ ເປັນນັກການເມືອງທີ່ມີຈິດໃຈສາກົນອັນຜ່ອງໃສ, ເພິ່ນເປັນຜູ້ນຳທີ່ມີຈິດໃຈຮັກຊາດອັນສູງສົ່ງ, ຍອມເສຍສະຫຼະທຸກສິ່ງທຸກຢ່າງ ເພື່ອປະເທດຊາດ, ເພື່ອປະຊາຊົນ. ປະທານສຸພານຸວົງ ເພິ່ນເປັນຄົນດຸໝັ່ນ, ຮຽນເກັ່ງ ແລະ ມີພອນສະຫວັນຫຼາຍດ້ານ, ຜົນການຮຽນຂອງເພິ່ນ ໄດ້ຄະແນນດີເລີດຕະຫຼອດຈົນຈົບຊັ້ນປະຖົມ; ເປັນຄົນດຸໝັ່ນ ມັກໃນການຮຽນຮູ້, ບໍ່ວ່າຈະເປັນທາງດ້ານທິດສະດີ ກໍຄື ການລົງຝຶກຫັດ-ປະຕິບັດຕົວຈິງ, ນອກຈາກນັ້ນ ເພິ່ນກໍມັກເດີນທາງໄປຫຼາຍໆປະເທດໃນທະວີບເອີຣົບ ແລະ ບັນດາປະ ເທດໃນທະວີບອາຟຣິກກາ ເພື່ອສໍາຜັດກັບຄວາມເປັນຈິງ ແລະ ຊອກຮູ້ປະສົບການໃນດ້ານຕ່າງໆ, ເພິ່ນ ດໍາລົງຊີວິດແບບງ່າຍ, ບໍ່ຟຸມເຟືອຍ, ເພິ່ນມີພອນສະຫວັນໃນດ້ານພາສາ, ສາມາດເວົ້າໄດ້ດີເຖິງ 10 ພາ ສາ. ປີ1937 ທ່ານ ສຸພານຸວົງ ເປັນຄົນລາວຜູ້ທໍາອິດ ທີ່ຮຽນຈົບວິສາວະກອນຂົວທາງຢູ່ປະເທດຝຣັ່ງ.
ຄຸນລັກສະນະທີ່ພົ້ນເດັ່ນຂອງ ປະທານສຸພານຸວົງ ແມ່ນເປັນຜູ້ນຳທີ່ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ ຍາມໃດກໍໄດ້ຍົກສູງສະຕິ ມີລະບຽບວິໄນຕໍ່ການຈັດຕັ້ງ, ນັບຖືໝູ່ຄະນະ, ເອື້ອເຟື່ອຮັກແພງມິດສະຫາຍຢ່າງຈິງໃຈ, ດໍາລົງຊີວິດຢ່າງສັດຊື່ສຸຈະລິດ ແລະ ງ່າຍດາຍ. ປະທານສຸພານຸວົງ ໄດ້ເລີ່ມຈາກນັກຮັກຊາດທີ່ແທ້ຈິງກາຍເປັນນັກປະຕິວັດທີ່ກຳແກ່ນ, ເປັນໜຶ່ງໃນບັນດາຜູ້ນໍາທີ່ດີເດັ່ນ ແລະ ເຄົາລົບຮັກ ຂອງປະຊາຊົນລາວເຜົ່າຕ່າງໆ.
ພາຍຫຼັງປະເທດຊາດໄດ້ຮັບການປົດປ່ອຍ, ທັງສອງປະເທດ ລາວ ແລະ ຫວຽດນາມ ລ້ວນແຕ່ຕົກຢູ່ໃນສະພາບທີ່ຫຍຸ້ງຍາກສັບສົນທີ່ສຸດ ບໍ່ວ່າທາງດ້ານການເມືອງ, ເສດຖະກິດ-ສັງຄົມ, ວັດທະນະທຳ, ການທະຫານ, ການຕ່າງປະເທດ ແລະ ອື່ນໆ ແຕ່ລາວ-ຫວຽດນາມ ກໍໄດ້ສືບຕໍ່ພົວພັນກັນຢ່າງສະໜິດ ແໜ້ນ, ໃຫ້ການສະໜັບສະໜູນຊ່ວຍເຫຼືອກັນ ແລະ ຮ່ວມມືກັນໃນດ້ານຕ່າງໆຢ່າງໃກ້ຊິດ ສະແດງອອກ ຄື: ວັນທີ 18/7/1977 ລາວ-ຫວຽດນາມ ໄດ້ເຊັນສົນທິສັນຍາມິດຕະພາບ ແລະ ການຮ່ວມມືນໍາກັນໂດຍ ແມ່ນ ປະທານໄກສອນ ພົມວິຫານ ປະທານສະພາລັດຖະມົນຕີ ແລະ ທ່ານ ຟ້າມວັນດົງ ນາຍົກລັດຖະ ມົນຕີ ຂອງຫວຽດນາມເປັນຜູ້ລົງນາມ. ເຫດການດັ່ງກ່າວໄດ້ເປັນຂີດໝາຍໜຶ່ງທີ່ສໍາຄັນ ປະກອບສ່ວນເຂົ້າໃນການປັບປຸງ ແລະ ເສີມຂະຫຍາຍມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງລາວ-ຫວຽດນາມ, ຕັ້ງແຕ່ນັ້ນມາ ການຮ່ວມມືຮອບດ້ານລະຫວ່າງ ລາວ-ຫວຽດນາມ, ຫວຽດນາມ-ລາວ ໄດ້ເລີ່ມຕົ້ນສັກກະລາດໃໝ່ໃນເງື່ອນໄຂໃໝ່. ເຫດການປະຫວັດສາດອັນໜຶ່ງທີ່ມີຄວາມໝາຍສໍາຄັນໃນວັນທີ 05/09/1962 ລັດຖະບານສາທາລະນະລັດ ປະຊາທິປະໄຕ ຫວຽດນາມ ແລະ ລັດ ຖະບານແຫ່ງອານາຈັກລາວ ກໍໄດ້ສ້າງສາຍພົວພັນການທູດນໍາກັນຢ່າງເປັນທາງການ. ເຫດການດັ່ງກ່າວນີ້ ມີຄວາມໝາຍສໍາຄັນທາງປະຫວັດສາດ ຂອງສອງຊາດລາວ-ຫວຽດນາມ.
