ພິທີອັດກອງປະຊຸມສະໄໝສາມັນ ເທື່ອທີ 07 ຂອງສະພາປະຊາຊົນ ນວ ຊຸດທີ II

 

        ການດໍາເນີນກອງປະຊຸມສະໄໝສາມັນ ເທື່ອທີ 07  ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ໄດ້ດໍາເນີນມາເປັນເວລາ 04 ວັນເຄິ່ງ, ນັບແຕ່ວັນທີ 08-12 ກໍລະກົດ 2024 ດ້ວຍບັນຍາກາດອັນຟົດຟື້ນ ໃນການຄົ້ນຄວ້າພິຈາລະນາ, ປະກອບຄໍາເຫັນ, ຕັ້ງຄໍາຊັກຖາມ ແລະ ຄໍາສະເໜີ ແນະນໍາວິທີການແກ້ໄຂບັນ ຫາຂໍ້ຄົງຄ້າງຢ່າງມີປະຊາທິປະໄຕ, ມີເຫດມີຜົນ , ເຈາະຈົງ ເຂົ້າແຕ່ລະບັນຫາຢ່າງລະອຽດຖີ່ຖ້ວນ ແລະ ມີ ຄວາມເປັນເອກະພາບສູງ ຂອງບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ແລະ ສະມາ ຊິກສະພາປະຊາຊົນ ນະຄອນຫຼວງ ໃນຖານະເປັນຕົວແທນ ຂອງປະຊາຊົນຊາວນະຄອນຫຼວງ ເພື່ອຄົ້ນຄວ້າ, ພິຈາລະນາ ແລະ ຮັບຮອງເອົາບັນຫາສໍາຄັນ ຂອງນະຄອນຫຼວງວຽງຈັນ ດັ່ງນີ້: 1. ຮັບຮອງເອົາ ບົດລາຍງານຂອງອົງການປົກຄອງ ນະຄອນ ຫຼວງວຽງຈັນ ກ່ຽວກັບການຈັດຕັ້ງປະຕິ ບັດແຜນພັດທະນາເສດຖະກິດ-ສັງຄົມ, ແຜນງົບປະມານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2024 ຂອງນະຄອນຫຼວງ, ຕິດພັນກັບການກະກຽມຄວາມພ້ອມ ໃນການເປັນເຈົ້າພາບການ ດໍາເນີນກອງປະຊຸມອາຊຽນ ຂອງນະຄອນຫຼວງວຽງຈັນ; 2. ຮັບຮອງເອົາ ບົດລາຍງານກ່ຽວກັບການຈັດຕັ້ງປະຕິບັດ ບັນດາຄາດໝາຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ຢູ່ນະຄອນຫຼວງວຽງຈັນ; 3. ຮັບຟັງການລາຍງານ ບາງບັນຫາສໍາຄັນພື້ນຖານ ດັ່ງນີ້:

1. ຮັບຟັງລາຍງານ ການຈັດຕັ້ງປະຕິບັດ ແລະ ການຊົດເຊີຍໂຄງການກໍ່ສ້າງສາຍສົ່ງໄຟຟ້າແຮງສູງ 230 ກິໂລໂວນ ແຕ່ສະຖານີເພຍລາດ-ສະຖານີໄຟຟ້າ ນາຊາຍທອງ ນະຄອນຫຼວງວຽງຈັນ;

2. ຮັບຟັງການລາຍງານ ກ່ຽວກັບມາດຕະການໃນການຈັດຕັ້ງປະຕິບັດວຽກງານ ສ.ສະຫວ່າງ ຢູ່ ນະຄອນຫຼວງວຽງຈັນ;

3. ຮັບຟັງການລາຍງານ ກ່ຽວກັບຄວາມຄືບໜ້າ ໃນການຈັດຕັ້ງປະຕິບັດໂຄງການປັບປຸງ ແລະ ສ້ອມແປງເສັ້ນທາງຫຼວງແຫ່ງຊາດ ເລກທີ 13 ເໜືອ ຊ່ວງສາມແຍກສີໄຄ-ສີເກີດ;

4. ຮັບຟັງການລາຍງານ ກ່ຽວກັບມາດຕະການຕ້ານ ແລະ ແກ້ໄຂບັນຫານໍ້າຖ້ວມຂັງ ໃນນະຄອນ ຫຼວງວຽງຈັນ;

5. ຮັບຟັງການລາຍງານ ກ່ຽວກັບການດໍາເນີນການຈັດຕັ້ງປະຕິບັດການຜັນຂະຫຍາຍ ແລະ ຊຸກຍູ້ ສົ່ງເສີມການທ່ອງທ່ຽວ ຢູ່ນະຄອນຫຼວງວຽງຈັນ;

6. ຮັບຟັງການລາຍງານ ກ່ຽວກັບການຈັດຕັ້ງປະຕິບັດການຊົດເຊີຍໃຫ້ປະຊາຊົນ ທີ່ຖືກຜົນກະທົບ ຈາກໂຄງການພັດທະນາເນື້ອ ທີ່ດິນ 51,1 ເຮັກຕາ ຂອງໂຄງການທ່າບົກ-ທ່ານາແລ້ງ ແລະ ເຂດໂລຈິສຕິກ ນະຄອນຫຼວງວຽງຈັນ;

7. ຮັບຟັງການລາຍງານ ກ່ຽວກັບມາດຕະການຊຸກຍູ້ສົ່ງເສີມ ການຜະລິດເປັນສິນຄ້າ ໃຫ້ສາມາດ ຕອບສະໜອງສະບຽງອາຫານ ແລະ ສະກັດກັ້ນການນໍາເຂົ້າສິນຄ້າຈາກພາຍນອກ ຢູ່ນະຄອນຫຼວງວຽງຈັນ;

8. ຮັບຟັງການລາຍງານ ກ່ຽວກັບຄວາມຄືບໜ້າ ໃນການຈັດຕັ້ງປະຕິບັດການລົບລ້າງໃບຕາດິນ 16 ຕອນ ທີ່ນອນໃນເຂດໂຄງການພັດທະນາ ສໍາປະທານບຶງສາລາຄໍາ ຂອງບໍລິສັດມິດຕະພາບພັດ ທະນາການກະເສດຈໍາກັດ ຢູ່ເມືອງຫາດຊາຍຟອງ ນະຄອນຫຼວງວຽງຈັນ;

9. ຮັບຟັງການລາຍງານ ການເກັບກໍາຂໍ້ມູນການບຸກລຸກຈັບຈອງ ແລະ ອອກໃບຕາດິນ ຢູ່ເຂດປ່າ ສະຫງວນແຫ່ງຊາດພູພະນັງ;

10. ຮັບຟັງການລາຍງານ ກ່ຽວກັບວຽກງານທີ່ຕິດພັນກັບ ກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ.

1. 1 ຮັບຮອງເອົາ “ຮ່າງ” ຂໍ້ຕົກລົງວ່າດ້ວຍ ການຮັບຮອງເອົາລາຄາຫົວໜ່ວຍທົດແທນ ຕໍ່ຊັບສິນທີ່ໄດ້ ຮັບຜົນກະທົບຈາກໂຄງການປັບປຸງ ແລະ ສ້ອມແປງເສັ້ນທາງຫຼວງແຫ່ງຊາດ ເລກທີ 13 ໃຕ້;
2. 1 ຮັບຮອງເອົາ ບົດລາຍງານ ການຈັດຕັ້ງປະຕິບັດ ມະຕິກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ນະຄອນຫຼວງ ຊຸດທີ II ວ່າດ້ວຍການຮັບຮອງ ເອົາບົດລາຍງານການເຄື່ອນໄຫວວຽກງານປີ 2023 ແລະ ແຜນການຈຸດສຸມປີ 2024 ຂອງອົງການໄອຍະການປະຊາຊົນ ແລະ ສານປະຊາຊົນພາກກາງ, ອົງການໄອຍະການປະຊາຊົນ ແລະ ສານປະຊາຊົນ ນະຄອນຫຼວງວຽງຈັນ ສະບັບເລກທີ 005/ສປນວ, ລົງວັນທີ 10 ມັງກອນ 2024 ໃນໄລຍະ 06 ເດືອນຕົ້ນປີ 2024;
3. 3 ຮັບຟັງການລາຍງານ ກ່ຽວກັບການຈັດຕັ້ງປະຕິບັດຄໍາຕັດສິນຂອງສານ ໄລຍະ 06 ເດືອນຕົ້ນປີ 2024 ແລະ ການຈັດຕັ້ງປະຕິບັດດໍາລັດສະບັບເລກທີ 280/ນຍ, ລົງວັນທີ 09 ສິງຫາ 2022 ວ່າດ້ວຍຊັບສິນທີ່ຖືກ ຍຶດ, ອາຍັດ ແລະ ຮິບເປັນຂອງລັດ;
4. 4 ຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2024 ຂອງສະພາປະຊາຊົນ ນະຄອນຫຼວງ,​ ຕິດພັນ ກັບແຜນການເຄື່ອນ ໄຫວພົບປະ ປະຊາຊົນ ແລະ ເຜີຍແຜ່ຜົນສໍາເລັດ ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດ ທີ IX ແລະ ສະພາປະຊາຊົນ ນະຄອນຫຼວງວຽງຈັນ ຊຸດທີ II.

ນອກຈາກນີ້ ກອງປະຊຸມຍັງໄດ້ຮັບຟັງການຊີ້ແຈງ ບາງບັນຫາສໍາຄັນຈໍານວນໜຶ່ງທີ່ພົວພັນກັບສະ ພາບພົ້ນເດັ່ນຂອງສັງຄົມ ແລະ ຕິດພັນກັບຊີວິດການເປັນຢູ່ຂອງປະຊາຊົນ ເຊິ່ງຜູ້ແທນໄດ້ຊັກຖາມ ແລະ ຍົກຂຶ້ນໃນກອງປະຊຸມຈາກອົງການປົກຄອງ, ສານປະຊາຊົນ, ອົງການໄອຍະການປະຊາຊົນ ແລະ ພາກສ່ວນ ທີ່ກ່ຽວຂ້ອງ. ຕໍ່ບັນຫາທີ່ໄດ້ມີການລາຍງານ ແລະ ຊີ້ແຈງ ທີ່ກ່າວມານັ້ນ, ກອງປະຊຸມໄດ້ມອບໃຫ້ອົງການ ປົກຄອງນະຄອນຫຼວງວຽງຈັນ, ພະແນກການ, ສານປະຊາຊົນ, ອົງການໄອຍະການປະຊາຊົນ ແລະ ບັນດາພາກສ່ວນທີ່ກ່ຽວຂ້ອງເອົາໃຈໃສ່ຈັດຕັ້ງປະຕິບັດບັນດາເນື້ອໃນ, ວິທີການ, ມາດຕະການໃນການຈັດຕັ້ງປະ ຕິບັດ ແລະ ແກ້ໄຂບາງບັນຫາບັນຫາຕ່າງໆທີ່ໄດ້ລາຍງານ, ຊີ້ແຈງແຕ່ລະຫົວຂໍ້ ແລະ ໃຫ້ຄໍາໝັ້ນສັນຍາ ໃນກອງປະຊຸມຄັ້ງນີ້ ໃຫ້ມີປະສິດທິຜົນ ແລະ ມີຜົນສັກສິດ, ພ້ອມທັງມີການລາຍງານຄືນໃຫ້ສະພາປະຊາຊົນ ນະຄອນຫຼວງວຽງຈັນ ເປັນລາຍລັກອັກສອນ ເພື່ອສະພາປະຊາຊົນ ກໍຄືສະມາຊິກສະພາປະຊາຊົນ ຈະສືບຕໍ່ຕິດຕາມກວດກາ ຢ່າງໃກ້ສິດຕື່ມອີກ.

ໃນ 06 ເດືອນທ້າຍປີ ຕໍ່ຈາກນີ້ ປະເທດຂອງພວກເຮົາຍັງຈະສືບຕໍ່ປະເຊີນກັບແຮງກົດດັນ ຈາກສະພາບແວດລ້ອມ ຂອງພາກພື້ນ ແລະ ສາກົນ ທີ່ຍັງຈະມີການຜັນແປຢ່າງສະຫຼັບ ຊັບຊ້ອນທີ່ຄາດຄະເນໄດ້ຍາກ ເວົ້າລວມ, ເວົ້າສະເພາະ ນະຄອນຫຼວງຂອງພວກເຮົາ ກໍຍັງຈະສືບຕໍ່ປະເຊີນກັບສະພາບຄວາມຫຍຸ້ງຍາກທາງ ດ້ານເສດຖະກິດ-ການເງິນ, ບັນຫາລາຄານໍ້າມັນເຊື້້ອໄຟທີ່ເພີ່ມຂຶ້ນສູງ, ອັດຕາເງິນເຟີ້, ອັດຕາແລກປ່ຽນທີ່ ມີການເໜັງຕີງແຮງ, ອັນເປັນສາເຫດຕົ້ນຕໍທີ່ສົ່ງຜົນກະທົບຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ພົບກັບອຸປະສັກ ແລະ ສິ່ງທ້າທາຍ, ເຮັດໃຫ້ລາຄາສິນຄ້າ ແລະ ບໍລິການຕ່າງໆ ເພີ່ມຂຶ້ນຢ່າງຫຼີກລ້ຽງບໍ່ໄດ້. ຄຽງຄູ່ກັນນັ້ນ ສປປ ລາວ ພວກເຮົາຍັງຈະໄດ້ຮັບກຽດເຈົ້າພາບ ຈັດກອງປະຊຸມສຸດຍອດອາຊຽນ ແລະ ກອງປະຊຸມສຸດຍອດປິ່ນອ້ອມອື່ນໆ ຢູ່ນະຄອນຫຼວງວຽງຈັນ. ດ້ວຍເຫດນີ້, ກໍຖືໄດ້ວ່າປີນີ້ເປັນປີໜຶ່ງ ທີ່ທົ່ວ ອົງການຈັດຕັ້ງພັກ-ລັດ ຂອງນະຄອນຫຼວງວຽງຈັນ, ກໍາລັງປະກອບອາວຸດ ແລະ ປວງຊົນຊາວນະຄອນຫຼວງ ຈະຕ້ອງ ໄດ້ສືບຕໍ່ເພີ່ມທະວີຄວາມສາມັກຄີເປັນປຶກແຜ່ນ, ສູ້ຊົນຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍທົດສອບຕ່າງໆ ເພື່ອພ້ອມກັນຈັດຕັ້ງປະຕິບັດບັນດາຄາດໝາຍທີ່ໄດ້ກໍານົດ ໃນມະຕິກອງປະຊຸມຄັ້ງນີ້ໃຫ້ບັນລຸຜົນສໍາ ເລັດຕາມແຜນການທີ່ວາງໄວ້, ສູ້ຊົນສືບຕໍ່ຈັດຕັ້ງ 02 ວາລະແຫ່ງຊາດໃຫ້ແຂງແຮງ ແລະ ເປັນຂະບວນການ ທີ່ຟົດຟື້ນກວ່າເກົ່າ. ພວກເຮົາຕ້ອງຕັດສິນໃຈ ສືບຕໍ່ພັດທະນາເສດຖະກິດ-ສັງຄົມ ຂອງນະຄອນຫຼວງວຽງຈັນ ໃຫ້ເຂັ້ມແຂງຢ່າງບໍ່ຢຸດຢັ້ງ, ປະກອບ ສ່ວນໃນການກະກຽມປະຕິບັດໜ້າທີ່ເປັນເຈົ້າພາບທີ່ດີ ໃນຖານະເປັນປະທານກອງປະຊຸມສຸດຍອດອາຊຽນ ຢູ່ນະຄອນຫຼວງວຽງຈັນ ໃຫ້ມີຄວາມຮັບປະກັນຄວາມສະຫງົບປອດໄພ ຮອບດ້ານ ແລະ ສໍາເລັດຜົນຕາມລະດັບຄາດໝາຍທີ່ວາງໄວ້.

ຜົນສໍາເລັດ ກອງປະຊຸມສະໄໝສາມັນ ເທື່ອທີ 07 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ຄັ້ງນີ້, ແມ່ນໝາກຜົນຂອງການລວມສູນສະຕິປັນຍາ, ການຍົກສູງຄວາມຮັບຜິດຊອບທາງດ້ານການເມືອງ, ຄວາມເປັນເຈົ້າການ ຂອງບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ ໃນການຄົ້ນຄວ້າ, ພິຈາລະນາ ແລະ ຮັບຮອງເອົາບັນຫາສໍາຄັນ ພື້ນຖານຂອງນະຄອນຫຼວງ, ແມ່ນການຕັດສິນໃຈສູງຂອງອົງການປົກຄອງ, ບັນດາພະແນກການ, ອົງການທີ່ ກ່ຽວຂ້ອງໃນການສືບຕໍ່ຈັດຕັ້ງປະຕິບັດແຜນການ ທີ່ແຕ່ລະອົງການໄດ້ຮັບຜິດຊອບ ໃນການແກ້ ໄຂຄວາມ ຫຍຸ້ງຍາກທາງດ້ານເສດຖະກິດ-ການເງິນ ທີ່ນະຄອນຫຼວງເຮົາພວມປະເຊີນຢູ່ໃນປະຈຸບັນ ເພື່ອສືບຕໍ່ຈັດຕັ້ງບັນດາແຜນກການ ແລະ ຄາດໝາຍຂອງແຜນການປີ 2024 ໃຫ້ບັນລຸຜົນ.

ເພື່ອສືບຕໍ່ຈັດຕັ້ງປະຕິບັດເນື້ອໃນ ຜົນສໍາເລັດກອງປະຊຸມຄັ້ງນີ້, ກອງປະຊຸມຮຽກຮ້ອງມາຍັງຄະນະປະຈໍາສະພາປະຊາຊົນ, ບັນດາຄະນະກໍາມະການ, ຄະນະເລຂາທິການ, ອົງການປົກຄອງ, ສານປະຊາຊົນ, ອົງການໄອຍະການປະຊາຊົນ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1, ສະມາຊິກສະພາປະຊາຊົນ ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງ ຈົ່ງໄດ້ຜັນຂະຫຍາຍບັນດາມະຕິ ກອງປະຊຸມຄັ້ງນີ້ ທີ່ໄດ້ຮັບຮອງ ເຂົ້າໃນການປະຕິບັດວຽກໃນຂອບເຂດຄວາມຮັບຜິດຊອບຂອງຕົນ ໃຫ້ໄດ້ຮັບຜົນສໍາເລັດເປັນຢ່າງດີ.