ກອງປະຊຸມໃຫຍ່ຂອງຊາວໜຸ່ມ ເມືອງໄຊເສດຖາ ຄັ້ງທີ X
ກອງປະຊຸມໃຫຍ່ ຂອງຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ເມືອງໄຊເສດຖາ ຄັ້ງທີ X ໄດ້ຈຈັດຂຶ້ນ ແລະ ອັດລົງຢ່າງເປັນທາງການ ໃນວັນທີ 9 ສິງຫາ 2024 ຜ່ານມາທີສະໂມສອນເມືອງດັ່ງກ່າວ ພາຍໃຕ້ການເປັນປະທານຂອງສະຫາຍ ໄຊຍະເດດ ທາດາວົງ ເລຂາຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ເມືອງໄຊເສດຖາ ນະຄອນຫຼວງວຽງຈັນ ມີສະຫາຍ ນາງ ວິໄລວອນ ຈັນທະລາຕີ ກຳມະການພັກນະຄອນຫຼວງວຽງຈັນ ເລຂາພັກເມືອງ-ເຈົ້າເມືອງໄຊເສດຖາ ສະຫາຍ ຫຸມແພງ ສີສົມບັດ ເລຂາຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ນະຄອນຫຼວງວຽງຈັນ ພ້ອມດ້ວຍອົງການຈັດຕັ້ງມະຫາຊົນ ບັນດາສະຫາຍສະມາຊິກຊາວໜຸ່ມ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.
ໃນກອງປະຊຸມສະຫາຍ ໄຊຍະເດດ ທາດາວົງ ເລຂາຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ເມືອງໄຊເສດຖາ ໄດ້ຕີລາຄາຄືນການຈັດຕັ້ງປະຕິບັດວຽກງານຊາວໜຸ່ມໃນໄລຍະ 5 ປີ ແລະ ທິດທາງແຜນການໃນຕໍ່ໜ້າພ້ອມກັນປະກອບຄໍາຄິດເຫັນໃສ່ຮ່າງລາຍງານການເມືອງທັງສອງພາກຢ່າງກົງໄປກົງມາ ແລະ ມີເນື້ອໃນຄົບຖ້ວນ ເຊີ່ງສະແດງອອກໃນໄລຍະ 5 ປີຜ່ານມາ ໄດ້ເອົາໃຈໃສ່ຊຸກຍູ້ສົ່ງເສີມປຸກລະດົມສະມາຊິກຂອງຕົນຕັ້ງໜ້າຮໍ່າຮຽນແນວທາງນະໂຍບາຍຂອງພັກ ປະຕິບັດລະບຽບກົດໝາຍຂອງລັດວາງອອກໃນແຕ່ລະໄລຍະຢ່າງ ເຂັ້ມງວດ ເຊັ່ນ: ມະຕິຄໍາສັ່ງ ແຈ້ງການ ລະບຽບການຕ່າງໆ ມາເຊື່ອມຊຶມໃຫ້ສະມາຊິກພາຍໃນເມືອງຂອງຕົນເຕົ້າໂຮມປຸກລະດົມສະມາຊິກຊາວໜຸ່ມ ເພື່ອປະກອບສ່ວນເຂົ້າໃນວຽກງານການເຄື່ອນໄຫວຊ່ວຍເຫຼືອສັງຄົມຕາມຄວາມຮຽກຮ້ອງຕ້ອງການໃນແຕ່ລະໄລຍະ ຖືເອົາວຽກງານສຶກສາອົບຮົມການເມືອງ-ແນວຄິດເປັນກົກ ວຽກງານກວດກາເປັນໜ້າທີ່ສໍາຄັນໃນການຈັດຕັ້ງປະຕິບັດວຽກງານ ແລະ ປະກອບສ່ວນວຽກງານຂະບວນການຂອງໜ່ວຍຊາວໜຸ່ມຢ່າງຫ້າວຫັນ ແລະ ກວ້າງຂວາງ ໂດຍສະເພາະແມ່ນຂະບວນການແຂ່ງຂັນ 4 ບຸກ ແລະ ຂໍ້ ແຂ່ງຂັນ 3 ດີ 4 ຮູ້ຂອງເຍົາວະຊົນທັນວາ ຕິດພັນກັບຂະບວນການແຂ່ງຂັນ ຮັກຊາດ ແລະ ພັດທະນາ ກາຍເປັນສະມາຊິກຊາວໜຸ່ມດີເດັ່ນ.
ຕະຫຼອດໄລຍະຜ່ານມາ ໄດ້ມີບຸກຄົນນິຕິບຸກຄົນທີ່ໄດ້ປະກອບສ່ວນເຫື່ອແຮງສະຕິປັນຍາ ວັດຖຸອຸປະກອນ ແລະ ງົບປະມານຕ່າງໆ ເຂົ້າໃນການເຄື່ອນໄຫວວຽກງານຊາວໜຸ່ມ-ເຍົາວະຊົນທັນວາ ຈຶ່ງມີຜົນງານດີເດັ່ນໄດ້ຮັບການຍ້ອງຍໍຈາກການນໍາພັກເມືອງ ຂັ້ນນະຄອນຫຼວງ ສູນກາງຊາວໜຸ່ມໃນຂະບວນການຕ່າງໆ ຈົນໄດ້ຮັບການຍ້ອງຍໍປະເພດຕ່າງໆ ເຊັ່ນ: ສະມາຊິກຊາວໜຸ່ມປະເພດດີໄດ້ 4.289 ສະຫາຍ ຍິງ 2.365 ສະຫາຍ ປະເພດກາງໄດ້ 2.156 ສະຫາຍ ຍິງ 1.521 ສະຫາຍ ໄດ້ຮັບຫຼຽນໄຊ ຊັ້ນ II ຈຳນວນ 45 ສະຫາຍ ໄດ້ຮັບຫຼຽນໄຊຊັ້ນ III ຈຳນວນ 161 ສະຫາຍ ໄດ້ຮັບຫຼຽນກາແຮງງານ ຈໍານວນ 326 ສະຫາຍ ໄດ້ຮັບຫຼຽນຊາວໜຸ່ມກາລະນຶກ 65 ປີ 7 ສະຫາຍ ໄດ້ຮັບຫຼຽນແນວລາວສ້າງ ຊາດ ຄົບຮອບ 70 ປີ 3 ສະຫາຍ ໄດ້ຮັບໃບຍ້ອງຍໍລັດຖະບານ 4 214 ສະຫາຍ ໄດ້ຮັບໃບຍ້ອງຍໍຂັ້ນສູນກາງຊາວໜຸ່ມ 2.217 ສະຫາຍ ໄດ້ຮັບ ໃບຍ້ອງຍໍຊາວໜຸ່ມຂັ້ນນະຄອນຫຼວງ 6.298 ສະຫາຍ ໄດ້ຮັບໃບຍ້ອງຍໍຂັ້ນເມືອງ 461 ສະຫາຍ ໄດ້ຮັບໃບຢັ້ງຢືນ 4 ບຸກ 181 ໃບ ແລະ ທຸງໄຊ ນໍາໜ້າ 4 ບຸກ ຈໍານວນ 2 ຜືນ.
ກອງປະຊຸມໃຫຍ່ ຍັງໄດ້ພ້ອມກັນປ່ອນບັດເອົາ ຄະນະບໍລິຫານງານຊາວໜຸ່ມຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕຖືກຕ້ອງ ແລະ ສອດຄ່ອງກັບມາດຖານເງື່ອນໄຂທີ່ກຳນົດໄວ້ ເຊິ່ງມີຜູ້ລົງຮັບສະໝັກເລືອກຕັ້ງທັງໝົດ 27 ສະຫາຍ ຍິງ 7 ສະຫາຍ ແລະ ເລືອກເອົາ 25 ສະຫາຍ ໃນກອງປະຊຸມຄັ້ງປະຖົມມະລຶກຂອງ ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ເມືອງໄຊເສດຖາ ໄດ້ເລືອກເອົາຄະນະປະຈຳ 9 ສະຫາຍ ຍິງ 2 ສະຫາຍ ໄດ້ເລືອກເອົາສະຫາຍ ໄຊຍະເດດ ທາດາວົງ ເປັນເລຂາ ສະຫາຍ ພູວິໃສ ສີສຸພັນທອງ ເປັນຮອງເລຂາ ສະຫາຍນາງ ແຕັບ ຫຼວງຜ່ານ ເປັນຮອງເລຂາ ທັງເປັນປະທານກວດກາ.
