ໃນວັນທີ 11 ກໍລະກົດ 2024 ໂຮງຮຽນການເມືອງ ແລະ ການປົກຄອງ ນະຄອນຫຼວງວຽງຈັນ ໄດ້ຈັດພິທີປິດຊຸດຮຽນທິດສະດີການເມືອງຂັ້ນຕົ້ນ ຮຸ່ນທີ V ແລະ ເປີດຊຸດຮຽນທິດສະດີການເມືອງຂັ້ນຕົ້ນ ຮຸ່ນທີ VI ຢູ່ທີ່ສະໂມສອນຂອງໂຮງຮຽນການເມືອງ ແລະ ການປົກຄອງ ນະຄອນຫຼວງວຽງຈັນ ພາຍໃຕ້ການເປັນປະທານຂອງສະຫາຍ ຊົງເລົ່າ ຢົງນູ ຮອງເລຂາຄະນະພັກ ນະຄອນຫຼວງວຽງຈັນ ມີບັນດາສະຫາຍທີ່ຕາງໜ້າຈາກຂັ້ນສູນກາງ, ຕາງໜ້າຈາກພະແນກການ-ອົງການທຽບເທົ່າຂັ້ນ ນະຄອນຫຼວງວຽງຈັນ ນັກຮຽນ-ນັກສຶກສາ ແລະ ພະນັກງານຫຼັກແຫຼ່ງ ເຂົ້າຮ່ວມ.
ທ່ານ ພວນສະຫວັນ ອອນລັດບຸນມີ ໄດ້ລາຍງານສະພາບ ແລະ ຈຸດພິເສດຂອງຊຸດຮຽນ ຊຶ່ງມີນັກສຶກສາທັງໝົດທີ່ເຂົ້າຮຽນ 59 ສະຫາຍ, ຍິງ 14 ສະຫາຍ ໃນນີ້ມີນັກສຶກສາທີ່ເປັນພຣະສົງ 02 ອົງ ແລະ ນັກສຶກສາທີ່ມາຈາກແຂວງໄຊສົມບູນຈໍານວນ 05 ສະຫາຍ, ຍິງ 01 ສະຫາຍ ຄະນະໂຮງຮຽນ ແລະ ຄະນະຮັບຜິດຊອບ ໄດ້ເອົາໃຈໃສ່ປະຕິບັດໜ້າທີ່ວຽກງານຂອງຕົນຮັບຜິດຊອບຢ່າງມີຜົນສໍາເລັດ ໃນລະດັບຄາດໝາຍ ການສຶກສາຄົ້ນຄວ້າຮໍ່າຮຽນຂອງນັກຮຽນ-ນັກສຶກ ແມ່ນມີສ່ວນຮ່ວມໃນການແລກປ່ຽນສົນທະນາປະກອບຄໍາເຫັນນໍາຄູ-ອາຈານ, ໝູ່ເພື່ອນໃນຫ້ອງຮຽນ ພິເສດແມ່ນໄດ້ຮຽນຮ່ວມໃນລະບົບວີດີໂອທາງໄກ (Video-Conference) ນໍາໂຮງຮຽນພັກກອມມູນິດ ແຂວງຫູໜານ ແລະ ໄດ້ນໍາພານັກຮຽນ-ນັກສຶກສາ ໄປທັດສະນະສຶກສາຢູ່ພິພິທະພັນ ໄກສອນ ພົມວິຫານ, ອະນຸສອນສະຖານ ໜູຮັກ ພູມສະ ຫວັນ, ຫ້ອງວ່າການປົກຄອງ ນະຄອນຫຼວງວຽງຈັນ, ສວນຜັກຂອງສະຫະກອນທ່າຊ້າງ ແລະ ສະຖານທີ່ທ່ອງທ່ຽວນໍ້າປ່ຽນຢໍລະປາ ເມືອງປາກງື່ມ ຜ່ານການຄົ້ນຄວ້າຮໍ່າຮຽນທິດສະດີການເມືອງຂັ້ນຕົ້ນ ຮຸ່ນທີ V ສາມາດຕີລາຄາໄດ້ວ່ານັກສຶກສາແຕ່ລະສະຫາຍມີຄວາມສາມັກຄີກັນແໜ້ນແຟ້ນ, ມີຄວາມຫ້າວຫັນ, ບຸກບືນສຸມທຸກເຫື່ອແຮງສະຕິປັນຍາເຂົ້າໃນການຮໍ່າຮຽນ, ສັງລວມຄວາມຮູ້ທາງດ້ານທິດສະດີ, ແລກປ່ຽນບົດ ຮຽນ ແລະ ພຶດຕິກໍານໍາຄູ-ອາຈານ ແລະ ນັກສຶກສາດ້ວຍກັນ ສາມາດຍາດໄດ້ຜົນງານດ້ານການຮໍ່າຮຽນ ເປັນຕົ້ນແມ່ນ ນັກສຶກສາຮຽນເກັ່ງ, ມີວິໄນດີ ປະເພດ I ຈໍານວນ 33 ສະຫາຍ, ຍິງ 06 ສະຫາຍ; ນັກ ສຶກສາຮຽນເກັ່ງ, ມີວິໄນດີ ປະເພດ II ຈໍານວນ 20 ສະຫາຍ, ຍິງ 06 ສະຫາຍ ນອກຈາກນີ້ບັນດານັກຮຽນ-ນັກສຶກສາ ຍັງໄດ້ປະກອບສ່ວນໃນການຊຸກຍູ້ທາງດ້ານທຶນຮອນ ແລະ ວັດຖຸຈໍານວນໜຶ່ງ ເພື່ອບູລະນະຮັກສາພັດທະນາໂຮງຮຽນ ພ້ອມດຽວກັນນີ້ຍັງມີພິທີເປີດຊຸດຮຽນທິດສະດີການເມືອງຂັ້ນຕົ້ນ ຮຸ່ນທີ VI ອີກດ້ວຍ.
ໃນພິທີດັ່ງກ່າວ ຍັງໄດ້ຟັງການໂອ້ລົມຂອງສະຫາຍຮອງເລຂາຄະນະພັກ ນະຄອນຫຼວງວຽງຈັນ ເພື່ອເປັນເຂັມທິດເຍືອງທາງໃນການຈັດຕັ້ງປະຕິບັດວຽກງານໃນຕໍ່ໜ້າ ພ້ອມທັງໃຫ້ບັນດາຄູ-ອາຈານ ເອົາ ໃຈໃສ່ໃນການສິດສອນ ແລະ ຖ່າຍທອດຄວາມຮູ້ຢ່າງເຕັມປ່ຽມ ໃຫ້ບັນດານັກຮຽນ-ນັກສຶກສາ ເພື່ອໃຫ້ບັນດານັກຮຽນ-ນັກສຶກສາ ສາມາດນໍາໄປໃຊ້ຄວາມຮູ້ທີ່ໄດ້ຮຽນມາຢ່າງມີໝາກຜົນຈິງ.