ຜົນສຳເລັດການເປັນເຈົ້າພາບຂອງ ນວ ໄດ້ເປັນພື້ນຖານອັນດີ ແກ່ກອງປະຊຸມສຸດຍອດອາຊຽນ
ສປປ ລາວເຮົາ ຈະໄດ້ຈັດກອງປະຊຸມສຸດຍອດອາຊຽນ ຄັ້ງທີ 44-45 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ ໃນເດືອນຕຸລາ 2024, ທີ່ນະຄອນຫຼວງວຽງຈັນ. ໜ້າທີ່ອັນສຳຄັນນັ້ນ, ພາກສ່ວນຕ່າງໆ ກໍໄດ້ສົມທົບກັນໃນການຈັດກອງປະຊຸມທີ່ ນວ ເປັນປະທານໝູນວຽນນະຄອນຫຼວງອາຊຽນ ຈັດກອງປະຊຸມຄູ່ຂະໜານຄື: ກອງປະຊຸມເຈົ້າຄອງນະຄອນຫຼວງອາຊຽນ(MGMAC), ກອງປະຊຸມເວທີເຈົ້ານະຄອນອາຊຽນ (AMF) ແລະ ກອງປະຊຸມເຄືອຂ່າຍບັນດານະຄອນອາຊີຕາເວັນອອກສ່ຽງໃຕ້ ຂອງສະມາຄົມບັນດາເຈົ້າຄອງນະຄອນ ທີ່ນໍາໃຊ້ພາສາຝຣັ່ງ (RVASE AIMF)ໃນລະຫວ່າງວັນທີ 17-19 ກັນຍາຜ່ານມາ, ມີຜົນສໍາເລັດຢ່າງຈົບງາມ ຊຶ່ງ ທ່ານ ອາດສະພັງທອງ ສີພັນດອນ ເຈົ້າຄອງ ນວ ກໍໄດ້ຕີລາຄາສູງ ໂດຍໃຫ້ຮູ້ວ່າ: ຜົນສໍາເລັດດັ່ງກ່າວ ເປັນການສ້າງພື້ນຖານອັນດີໃຫ້ແກ່ການຈັດບັນດາກອງປະຊຸມສຸດຍອດອາຊຽນ ທີ່ຈະມາເຖິງນີ້.
ໃນປີ 2016, ນວ ໄດ້ຮັບໜ້າທີ່ເປັນປະທານໝູນວຽນນະຄອນຫຼວງອາຊຽນ ເປັນຄັ້ງທໍາອິດ ແລະ ໃນປີ 2024 ນີ້, ກໍເປັນຄັ້ງທີສອງ ແລະ ເປັນປີທີ່ພິເສດ ທີ່ພວກເຮົາ ໄດ້ຈັດກອງປະຊຸມຄູ່ຂະໜານ ຊຶ່ງມີບັນດາທ່ານເຈົ້າຄອງ, ຮອງເຈົ້າຄອງ ແລະ ຜູ້ຕາງໜ້າບັນດານະຄອນຫຼວງ, ນະຄອນຂອງອາຊຽນ ແລະບັນດານະຄອນ ທີ່ໃຊ້ພາສາຝຣັ່ງ ຈຳນວນ 189 ທ່ານ ເຂົ້າຮ່ວມ. ໃນນີ້, ລວມທັງຜູ້ຕາງໜ້ານະຄອນຫຼວງດີລີ ປະເທດຕີມໍເເລັດສະເຕ ເຂົ້າຮ່ວມ ໃນນາມຜູ້ສັງເກດການ. ໃນພິທີເປີດກອງປະຊຸມ ທີ່ໄດ້ຈັດຂຶ້ນໃນວັນທີ 18 ກັນຍາ 2024, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດເຂົ້າຮ່ວມ ແລະ ກ່າວເປີດກອງປະຊຸມ.
ກອງປະຊຸມຄັ້ງນີ້, ໄດ້ເຕົ້າໂຮມເອົາບັນດາທ່ານເຈົ້າຄອງ-ຮອງເຈົ້າຄອງນະຄອນຫຼວງອາຊຽນ, ບັນດາທ່ານເຈົ້ານະຄອນ, ການນໍາຂັ້ນທ້ອງຖິ່ນ ພ້ອມທັງບັນດາຊ່ຽວຊານ, ວິຊາການ, ຜູ້ຕາງໜ້າຈາກຄູ່ຮ່ວມມື ແລະ ພາກສ່ວນຕ່າງໆ ມາຮ່ວມປະຊຸມ ເພື່ອແລກປ່ຽນບັນຫາຄຳຄິດເຫັນ ກ່ຽວກັບພາລະບົດບາດໜ້າທີ່ຂອງອົງການປົກຄອງຂັ້ນທ້ອງຖິ່ນ ໃນການປະກອບສ່ວນເຂົ້າໃນການສ້າງປະຊາຄົມອາຊຽນ ແລະ ແລກປ່ຽນບົດຮຽນ, ປະສົບການ ໃນການພັດທະນາ, ແກ້ໄຂບັນຫາ ແລະ ສິ່ງທ້າທາຍຕ່າງໆ ທີ່ບັນດານະຄອນກໍາລັງປະເຊີນຢູ່ໃນປັດຈຸບັນນີ້.
ກອງປະຊຸມດຳເນີນພາຍໃຕ້ຄໍາຂວັນ; “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງເພື່ອການພັດທະນາແບບຍືນຍົງຂອງບັນດານະຄອນອາຊຽນ” ຊຶ່ງສອດຄ່ອງກັບຄໍາຂວັນ ການເປັນປະທານອາຊຽນຂອງ ສປປ ລາວ ປີນີ້ຄື: “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”. ກອງປະຊຸມ ໄດ້ກໍານົດ 5 ຂົງເຂດວຽກງານທີ່ສໍາຄັນ ເພື່ອນໍາມາປຶກສາຫາລືຄື: (1) ຕົວເມືອງທີ່ໜ້າຢູ່ ແລະ ຍືນຍົງ, (2) ການທ່ອງທ່ຽວສີຂຽວ, (3) ການພັດທະນາເສດຖະກິດແບບຍືນຍົງ, (4) ຕົວເມືອງທີ່ມີຄວາມຍືນຍົງທາງດ້ານສິ່ງແວດລ້ອມ; (5) ຄວາມເຂັ້ມແຂງທາງດ້ານການປ່ຽນແປງດິນຟ້າອາກາດ.
ຜ່ານການຮ່ວມມືອັນດີ, ການປະກອບສ່ວນຢ່າງຫ້າວຫັນ ແລະ ການປຶກສາຫາລື ຢ່າງສ້າງສັນ ຂອງບັນດາທ່ານເຈົ້າຄອງ-ຮອງເຈົ້າຄອງນະຄອນຫຼວງອາຊຽນ, ບັນດາທ່ານເຈົ້ານະຄອນ, ການນໍາຂັ້ນທ້ອງຖິ່ນ ພ້ອມທັງບັນດາຊ່ຽວຊານ, ວິຊາການ, ຜູ້ຕາງໜ້າຈາກຄູ່ຮ່ວມມື ແລະ ພາກສ່ວນຕ່າງໆ ກໍໄດ້ຮັບຮອງເອົາຖະແຫຼງການນະຄອນຫຼວງວຽງຈັນ ຊຶ່ງມີ 6 ວຽກງານ ກໍຄືເພີ່ມທະວີການເຊື່ອມຈອດ, ການສ້າງຄວາມເຂັ້ມແຂງ ຮັບຮູ້ສິ່ງທີ່ທ້າທາຍ, ສ້າງຄວາມເຂັ້ມແຂງໃຫ້ແກ່ຊຸມຊົນ, ສົ່ງເສີມນະວັດຕະກຳ, ສົ່ງເສີມການແລກປ່ຽນວັດທະນະທໍາ ແລະ ຄວາມໝາຍໝັ້ນໃນການເປັນຄູ່ຮ່ວມມື ຊຶ່ງລາຍລະອຽດຂອງຖະແຫຼງການນະຄອນຫຼວງວຽງຈັນ ກໍກຳລັງມີຫຼາຍພາກສ່ວນ ທັງສື່ສູນກາງ ແລະ ສື່ນະຄອນຫຼວງ ເຜີຍແຜ່ຢ່າງກວ້າງຂວາງ ດ້ວຍເນື້ອໃນໃຈຄວາມທີ່ສຳຄັນ.
ໃນນັ້ນ ຍັງໄດ້ເປີດເປີດສັນຍາລັກເຄື່ອງດົນຕີອາຊຽນ ແລະ ປູກຕົ້ນໄມ້ ທີ່ສວນປະຕູໄຊພາກຂະຫຍາຍ ທ່ານ ອາດສະພັງທອງ ສີພັນດອນ ກ່າວວ່າ: ກິດຈະກໍາປູກຕົ້ນໄມ້ໃນຄັ້ງນີ້, ມີຄວາມໝາຍສໍາຄັນເປັນຢ່າງຍິ່ງ ເພື່ອສະແດງຄວາມຂໍ່ານັບຊົມເຊີຍຜົນສໍາເລັດຂອງກອງປະຊຸມເຈົ້າຄອງນະຄອນຫຼວງອາຊຽນ, ກອງປະຊຸມເວທີເຈົ້ານະຄອນອາຊຽນ ແລະ ກອງປະຊຸມເຄື່ອຂ່າຍບັນດານະຄອນອາຊີຕາເວັນອອກສ່ຽງໃຕ້ ແລະ ເພື່ອສ້າງສະພາບແວດລ້ອມທີ່ດີ, ເພີ່ມເຂດຂຽວໃຫ້ສວນປະຕູໄຊພາກຂະຫຍາຍ ທີ່ຕັ້ງຢູ່ໃຈກາງຕົວເມືອງນະຄອນຫຼວງວຽງຈັນໃຫ້ສວຍສົດງົດງາມ, ທັງເປັນການສືບຕໍ່ປະຕິບັດວຽກງານການປູກຕົ້ນໄມ້ຕາມຂີດໝາຍຂອງປະເທດສະມາຊິກອາຊຽນ ໃນການປະຕິບັດບັນ ດາມາດຕະການ ເພື່ອຫຼຸດຜ່ອນການປ່ອຍອາຍພິດກາກບອນ ແລະ ເຮັດໃຫ້ຕົວເມືອງມີສີຂຽວເພີ່ມຂຶ້ນ.
ສວນປະຕູໄຊພາກຂະຫຍາຍ ໄດ້ເປັນຕົວແທນ ແລະ ຊຸກຍູ້ສົ່ງເສີມການຮ່ວມມື ໃນຂອບນະຄອນ ຫຼວງອາຊຽນ ຊຶ່ງໃນເວທີການສົນທະນາໃນກອງປະຊຸມບັນດາເຈົ້າຄອງນະຄອນຫຼວງອາຊຽນໃນຄັ້ງນີ້ໄດ້ປິ່ນອ້ອມຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງຂອງອາຊຽນ” ໂດຍຜ່ານການປຶກສາຫາລືກ່ຽວກັບ 5 ຫົວຂໍ້ຕົ້ນຕໍຄື: ການທ່ອງ ທ່ຽວສີຂຽວ, ການພັດທະນາເສດຖະກິດແບບຍືນຍົງ, ຕົວເມືອງທີ່ໜ້າຢູ່ ແລະ ຍືນຍົງ, ຕົວເມືອງທີ່ມີຄວາມຍືນຍົງດ້ານສິ່ງແວດລ້ອມ ແລະ ຄວາມເຂັ້ມແຂງທົນທານຕໍ່ການປ່ຽນແປງດິນຟ້າອາກາດ; ພິເສດໃນຂອບເຂດສວນປະຕູໄຊ ໄດ້ມີຕົ້ນໄມ້ນ້ອຍ ແລະ ໃຫຍ່ຫຼາຍຊະນິດ ທີ່ເປັນໄມ້ພື້ນເມືອງຂອງ ສປປ ລາວ ນອກຈາກຕົ້ນໄມ້ ແລ້ວໃນສວນຍັງມີການສ້າງປະຕິມາກຳສັນຍາລັກ ເຄື່ອງດົນຕີປະຈຳຊາດ ຂອງບັນດານະຄອນຫຼວງອາຊຽນ ຊຶ່ງເປັນການສະແດງໃຫ້ເຫັນເຖິງຄວາມມຸ່ງໝັ້ນເສີມຂະຫຍາຍການຮ່ວມມືຕາມນະໂຍບາຍຂອງນະຄອນຫຼວງອາຊຽນ ກໍຄືນະໂຍບາຍຂອງບັນດາປະເທດອາຊຽນ ຕີມໍແລັດສະເຕຢ່າງຕັ້ງໜ້າ ເພື່ອຊຸກຍູ້, ສົ່ງເສີມການພົວພັນມິດຕະພາບທີ່ເປັນມູນເຊື້ອຂອງບັນດານະຄອນຫຼວງອາຊຽນທີ່ມີຈຸດພິເສດດີເດັ່ນແຕກຕ່າງກັນໃຫ້ນັບມືແຕກດອກອອກຜົນສວຍສົດງົດງາມຍິ່ງໆຂຶ້ນດັ່ງດອກໄມ້ທີ່ເບັ່ງບານໃນສວນແຫ່ງນີ້.
ຜົນສຳເລັດການເປັນເຈົ້າພາບຂອງ ນວ ໃນການເປັນປະທານໝູນວຽນນະຄອນຫຼວງອາຊຽນເກີດຂຶ້ນ ໄດ້ຍ້ອນການຊີ້ນໍາ-ນໍາພາຂອງອົງຄະນະພັກ ນວ, ບັນດາອະນຸກຳມະການກຽມຄວາມພ້ອມຮອບດ້ານຮັບໃຊ້ກອງປະຊຸມ ແລະ ການຮ່ວມມືເປັນຢ່າງດີຈາກທຸກພາກສ່ວນ ຈຶ່ງເຮັດໃຫ້ ນວ ມີຜົນສຳເລັດຢ່າງຈົບງາມ. ພ້ອມກັນນັ້ນ, ເປັນການສ້າງພື້ນຖານອັນດີໃຫ້ແກ່ບັນດາກອງປະຊຸມສຸດຍອດອາຊຽນ ທີ່ຈະຈັດຂຶ້ນຢູ່ນະຄອນຫຼວງວຽງຈັນ ໃນຕົ້ນເດືອນຕຸລາ ທີ່ຈະມາເຖິງນີ້ ໃຫ້ໄດ້ຮັບຜົນສໍາເລັດ.
ສະນັ້ນ, ພາກສ່ວນຕ່າງໆ ທີ່ກ່ຽວຂ້ອງ ເປັນຕົ້ນແມ່ນ ບັນດາພາກສ່ວນທີ່ຮັບໃຊ້ກອງປະຊຸມMGMAC, ກອງປະຊຸມ AMFແລະ ກອງປະຊຸມ RVASE AIMF ທີ່ຈະໄດ້ສືບຕໍ່ເຂົ້າຮັບໃຊ້ກອງປະຊຸມສຸດຍອດອາຊຽນຄັ້ງທີ 44 – 45 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ ຈົ່ງກຽມພ້ອມຢ່າງເຕັມກຳລັງ ພ້ອມທີ່ຈະເປັນກຳລັງໃຫ້ການເປັນເຈົ້າພາບຂອງ ສປປ ລາວ ໃນການຈັດບັນດາກອງປະຊຸມສຸດຍອດອາຊຽນ ປີ 2024 ປະສົບຜົນສໍາເລັດຢ່າງຈົບງາມ ຈາລຶກໃນປະຫວັດສາດຂອງຊາດລາວ ໃນການເປັນປະທານອາຊຽນ ຄັ້ງທີ 3 ຂອງ ສປປ ລາວ ທີ່ໄດ້ມີບົດບາດ ແລະ ປະກອບສ່ວນໃນການສ້າງປະຊາຄົມອາຊຽນ.
